Thôn Đoàn Kết, xã A Yun Hạ, kơnhoàl Phú Thiện gam là tiah gơtìp hoàc huơr uă ngan tài bơh trồ prang lơh aniai. Neh geh rơlao 80 lồ sre lơh kòi gơtìp prang di gơlan gơtìp ờ geh tơnhào. Tềng đăp mờ bơta mùl màl do, UɃÑZ xã A Yun Hạ neh lơh geh mpồl rơcang kơrian mhar, bal mờ làng bol rơcang ơpah măi chŏ toah wàs rơbòng dà Ia Ake mờ ngui 21 tơlung khoàng nàng ƀồm dà tuh phan tam in.

UɃÑZ kơnhoàl Phú Thiện kung neh geh jơnau mblàng yal nàng pơyoa tus UɃÑZ càr Gia Lai bal mờ ală sở, gah lơh broă gơrềng bal in nàng dan geh jơnau dong kờl priă ai kơnhoàl do in tam dră mờ trồ prang, mờ dan bè jŏ jòng geh tă priă lơh anih ƀồm dà mờ ồs đèng ai ală ƀlàng sre tàm thôn Đoàn Kết in. Ồng Nguyễn Anh Tuấn, Phó Củ tịc UɃÑZ kơnhoàl Phú Thiện pà git: “Gơwèt mờ trồ prang tàm kơnhoàl neh đơng lam ală anih lơh broă tờm sền wơl bă ù tam phan di gơlan gơtìp prang uă mờ neh gơtìp prang nàng geh jơnau bơto sồr làng bol lơh geh ală dà tŭ do geh nàng tam dră mờ trồ prang mờ tuh dà tàm ală bă ù tam phan ờ jŏ tơngai gơtìp prang in. Lam sồr ală tiah sền wơl, kờp ală hoàc huơr tàm tơngu me hơ̆ geh broă dong kờl hoàc huơr tài trồ prang lơh gơtìp ai làng bol in”.

Trồ prang kung neh lơh git nđờ rơbô hìu làng bol ơm kis tàm xã tiah nhàr dà lơgar Ia Nan, kơnhoàl Đức Cơ, càr Gia Lai ờ geh dà ngui sa. Ồng Nguyễn Thanh Kiên, kis tàm thôn Đức Hưng, xã Ia Nan pà git, làng bol pal lòt ngài ngan hơ̆ sồng geh pơn diang dà, blơi dà bơh tàm tiah ndai cèng rê nàng ngui sa mờ khà priă kas ngan.

Ồng Nguyễn Thanh Kiên pà git: “Bè dà ngui sa pah ngai tàm hìu đơs is mờ gùt làng bol kis tàm do đơs bal là kal ke ngan, bè kàl prang là neh pe nhai do ờ geh dà ngui sa. Dà pal lòt pơn diang cèng rê rơcoah phe, ha là rào biăp den pal rào tai mờ dà tàm khàr, dùl ngai kung pal jơh 3 khàr dà”.

Tềng đăp mờ bơta trồ prang gơtìp kal ke, ồng Nguyễn Chúc, Phó Ci kụk atbồ, Ci kụk Bơtơ̆t rơbòng dà Gia Lai pà git ală broă lơh bơh càr do dê. “Nàng rơcang kơrian mờ bơta trồ prang mờ ờ tơl dà gơwèt mờ lơh sa suơn sre den bơh càr tus ală xã kung neh lơh uă broă lơh nàng lơh jăt gùng dà broă rơcang lài di pal mờ bơta mùl màl nàng tơmù ờ uă ngan hoàc huơr ai phan tam in, ai lài ală phan tam geh bơta kwơ uă nàng tơmù ờ uă ngan hoàc huơr, lơh jăt ală broă tuh dà pơdar bal, lơh sùh dà tàm tờm nàng ală phan tam in geh kis tus tàm kàl tơnhào. Lơh jơh pràn broă tuh dà bơh ală broă lơh nàng drơng mờ tơnguh uă cồng nha lơh ală broă lơh bơtơ̆t rơbòng dà nàng drơng bă ù geh tuh dà làng bol in”.

Ồng Lưu Trung Nghĩa, Kwang atbồ Sở Nông nghiệp mờ Phát triển Nông thôn càr Gia Lai pà git, tềng đăp mờ broă di gơlan trồ prang gơbàn tàm uă tiah, sở do geh sồr ală tơnao dơng dà hìu măi ồs đèng yuh dà nàng tuh phan tam in. Ồng Lưu Trung Nghĩa pà git tai: “Tàm nhai poan do là tŭ trồ prang dờng ngan, bol añ pơgồp bal mờ Tổng Kông ty Pờ tơlik ồs đèng 2 mờ Kông ty ồs đèng dà An Khê Ka Nak yuh dà tus tàm tiah đah jum dà dờng Ba nàng ală tiah in rơcang geh ală dà ƀồm tuh phan tam in. Bol añ kung neh dan tus Ƀộ Nông nghiệp mờ Phát triển Nông thôn, UɃÑZ càr tàm tơngu me bơh tàm bơta mùl màl do den tă geh priă nàng lơh gơs ală rơbòng dà nàng ai geh dà bơh ală tơnao bơtơ̆t dơng dà gam ờ hềt geh uă. Pơn jăt tai broă lơh do pal geh tă priă dà lơgar nàng lơh gơs rơbòng dà nàng tơl dà tuh niam, tuh tềm pềr dà den hơ̆ sồng geh bơsong bơta trồ prang tàm ù tiah càr bal mờ rề ơnàng broă lơh sa in”.