VOV4.K’ho - Mìu sơr tài gơrềng bal bơh mìu càl dờng sồ 6 tàm càr Dak Lak neh lơh rơlao 400 nơm hìu, rơlao 2 rơbô 600 lồ ù tam phan gơtìp gơbam dà, rơlao 250 thơ\k gùng lòt gơtìp tơrlah ha là pơrdô.

               Nggùl khà hìu làng bol tàm [òn Bang, xã Dak Liêng, kơnhoàl Lăk gơtìp gơbam tàm dà 

Tus mho òr (11/11), tàm càr Dak Lak gam geh mìu, dà tàm ờ uă dà dờng, croh dà pơn jăt tai gơguh tih, lơh gơbam phan tam, hìu đam tàm ală tiah thòng.

Kơnhoàl Lăk là tiah gơtìp dà bam kal ke ngan, mờ rơlao 300 hìu làng bol pal ntrờn làng bol bal mờ phan bơna kờ` pleh mờ hoàc huơr.

Tàm kơnhoàl Krông Bông kung gơtìp hoàc huơr uă, mờ mờr 1 rơbô 100 lồ phan tam gơtìp gơbam dà, 300 hìu làng bol tàm xã Hoà Phong gơtìp koh gơl tài gùng lòt gơtìp gơbam jrô dà mờ tơrlah gùng.

Mpồl lơh broă geh gơnoar ală kơnhoàl bal mờ càr Dak Lak neh tus tàm tiah gơtìp dà bam kờ` dong kờl làng bol tơmù hoàc huơr bơh mìu dờng càl pràn lơh aniai, rơcang sơndră mờ ală bơta gơbàn bơh dà cò tơrlah ù, yal lài ală tiah gùng lòt gơtìp gơbam dà kờ` dong kờl làng bol lòt rê niam ờ do ờ dă.

Cau mblàng Ndong Brawl