VOV4.K’ho - Càr Dak Nông tu\ do geh mờr 3 rơbô 300 broă lơh sa suơn sre ngui công nghệ cao, tàm hơ\ geh di pơgăp 1 rơbô 560 broă lơh bơh ală công ty, hợp tác xã, mpồl lơh broă bal.

Tus tu\ do, tàm càr Dak Nông broă lơh sa suơn sre neh tơnguh bơtàu jăt broă lơh gơs phan kă bro, lơh gơs ală tiah tam phan geh bơta pràn tàm pơrlòng, mờ ală bơta phan geh lơh bơh broă lơh sa suơn sre bè: gar điều, kơphe, tiêu, cao su mờ ờ uă bơta tòm chi sa plai ndai.

Priă geh bơh phan tam jo\ tơngai geh rơlao 70% khà priă geh bơh gah tam phan mờ rơlao 90% khà priă tăc phan mờ lơgar bơdìh.

Cồng nha geh pơnrơ tàm broă ngui bơta gơguh jăk kỹ thuật tàm broă lơh sa suơn sre là broă kơlôi sơnơng mờ tam jào ală sơntìl pa ờ jo\ tơngai, pràn sơndră mờ tu, kòp, sơndră mờ trồ prang, geh cồng nha, bơta niam uă.

Cau mblàng Ndong Brawl