Ngai ală hìu bơnhă tàm tiah tờm dà tih dà lìu Hoà Thịnh, càr Dăk Lăk tơngăc ồng Táo rê hơđang trồ, tơn jơh wơl 1 nam Bơs, kung là ngai hô hơng ală broă lơh bơh broă lơh “Sơnam pa tiah 5 tam klăc bal bềng lìu nùs nhơm ling klàng làng bol”. Tàm suơn dờng Tiah tềl lời wơl kah yau dà lơgar Hoà Thịnh, làng bol, kwang bàng, cau ling bal mờ gơ̆p klơm mbar mờ gơm mbar kơnâm lơm pòng; tàm pơrlòng tàp pràn să jan, tìp mat lơh kwèng đơs crih tam ya. Oh dềt, kơnòm dềt, cau dờng geh mpồl ling koh siăt sŏ ờ sa priă. Ală mè, ală bi lơh ngan blơi phan sa tềp tàm ală anih ràng tăc phan zero đông.

Ồng Phạm Văn Mạnh, làng bol sàh Hòa Thịnh, brơn brài pà gĭt: “Lài ngan añ ưn ngài bơta đơng lam bơh Đảng, bơta dong kờl bơh mpồl ling klàng dê. Dơ̆ dà tih dà lìu pa do pal đơs là sền gròi phan bơna, phe, dà. Ală mpồl ling, ală mpồl, gah broă, mpồl cau kung sền gròi, kung geh piang, geh phe sa, wơl geh bơta ram mhŭ, hìu đam kung bơt bơtàu kơnhăp kơ̆ wơl”.

Hòa Thịnh là tiah tờm jrô ngan rlau jơh tàm dơ̆ dà tih dà lìu kah yau nhai 11 nam 2025. Tàm tŭ tơngai kal ke ngan rlau jơh, dà tih dà lìu ngơr jơh hìu đam, 4 gah dà sơkal hoài tus, ală mpồl ling phàu crong neh geh mat di tŭ bal mờ kấp ủy, gơnoar atbồ tiah do bal mờ làng bol bơh dong kờl tus jòi cau gơtìp rềs àr, bơsong jơnau gơ lời wơl tài bơh trồ tiah lơh aniai tus bơt bơtàu wơl hìu đam, bơt bơtàu wơl rài kis cèng wơl săp ñiŏ ai làng bol in tơnơ̆ mìu càl rơbŭt dờng dà tih dà lìu. Tơnơ̆ “Broă lơh Quang Trung” geh cồng nha tàm sàh Hoà Thịnh, rùp hin cau ling Wa Hồ cih kah jrô tàm nùs nhơm làng bol mờ bơta pin dờn dùl nùs bal đòm jat.

Đại tá ồng Đinh Văn Hưng, Cíñ ủy Gah đơng lam Mpồl ling klàng càr Dăk Lăk đơs sùm, broă lơh “Sơnam pa tiah 5 tam klăc bal - sa tềp bềng lìu nùs nhơm ling klàng làng bol” dơ̆ do dùl dơ̆ tai đơs nền nùs nhơm ling klàng làng bol sơlơ kơ̆ wền ngan: “Broă lơh do bol he pơn jat tai đơs nền dùl bơta tờm ngan là bơt bơtàu broă lơh sền gàr dà lơgar gùt làng bol, lơngăp lơngai làng bol ờ mìng mờ nùs nhơm rcang gàr lài, mpồl ling lơm mờ lài ngan mờ bơta tam klăc đềt mềr bal dồ nùs dồ tồr bal đah ling klàng mờ làng bol. Tŭ nùs nhơm làng bol iang nùs, tŭ làng bol dòn den hơ̆ là bơnàng jă kơnhăp kơ̆ ngan rlau jơh ai bơta kơ̆ kơl jăp bơtàu tơnguh kơnhăp kơ̆ bơh jơi bơtiàn dê”.

Jat ồng Phương Văn Lành, Ƀí thư Đảng ủy sàh Hòa Thịnh, bơh tàm mìu dờng dà tih dà lìu tus ală ngai gơ jal ngan bơt bơtàu wơl bơh “broă lơh Quang Trung”, tus tàm tŭ do, Hoà Thịnh kung gam dờp geh uă bơta dong kờl jơh bal bè phan bơna mờ nùs nhơm bơh Đảng mờ Dà lơgar, ală mpồl cíñ trị, mpồl bơtiàn, ală mpồl ling phàu crong, ală mpồl geh nùs nhơm niam mờ gam mhar ngan sơm bời wơl ală bơta jê sồt tài bơh trồ tiah dê lơh aniai. Broă lơh Sơnam pa tiah 5 tam klăc bal dơ̆ do, dùl dơ̆ tai lơh geh tai bơta gơn kơnờm ai gơnoar atbồ tiah do in tàm broă lơh tus geh ală kơnòl broă nam 2026.

Ồng Phương Văn Lành pà git: "Bal mờ ală kấp ủy đảng, gơnoar atbồ, ală mpồl ling den neh tơrgùm sền gròi ai làng bol in. Is ồn tŭ do Ling tiah 5 ai Sơnam pa tiah 5 tam klăc bal - Sa tềp bềng lìu nùs nhơm ling klàng làng bol tus mờ làng bol sàh Hoà Thịnh, do là dùl dơ̆ geh kwơ ngan dong làng bol, tàm sơm bat tê bal mờ làng bol bơsong ală kal ke, ai làng bol in geh bơta chờ hờp brơn brài mờ dong làng bol geh dùl dơ̆ sa tềp ram mhŭ, chờ hờp chờ hờñ, gơboh gơbài...”.

Tơl nă làng bol sàh Hoà Thịnh pơn yờ să mờ bơhiàn tam lơh kăc màng, lơh geh dơ̆ sơnđờm ntào tam lơh Hoà Thịnh ală nam 60, tŭ do kơ̆ nùs nhơm sơr lèt gan kal ke tài bơh trồ tiah lơh aniai. Sa tềp do làng bol tiah dà tih dà lìu geh dùl dơ̆ sa tềp ram mhŭ bềng nùs nhơm tàm nđàc bal bơh bơta tàm sơm bat tê bal bơh jơh mpồl bơtiàn dê. Rài kis pa gam geh tàm tơl nơm hìu. Dùl sơnam pa gam rê tàm ƀòn lơgar sơnđờm mut lơh wơl Hoà Thịnh dê.