Tàm hìu pa geh lơh ơnàng 80 thơ̆k vuông tàm ƀòn Bu Boong, sàh Tuy Đức, càr Lâm Đồng dê, lŏ Thị Duyên, kòn cau Mnông bal mờ bơklao mờ bàr nă kòn gam pơs hìu nàng rơcang wă rò Satềp. Hìu geh lơh kơl jăp, geh lơh bơh broă tơn jơh hìu sèt, lơh gơs mờr nggùl nam do, là bơta chờ dờng ngan hìu nhă lŏ dê. Geh hìu pa, suơn kơphe neh mŭt tàm tơngai geh plai sơnrờp ngan, mờ geh tai phe sa bal mờ phan Satềp bơh cau ling jào pà, nam pa nam do gơwèt mờ hìu nhă lŏ Thị Duyên tài bè hơ̆ den tàng chờ hờp ngan: “Hìu nhă añ geh Dà lơgar dong kờl 90 tơlăk đong nàng lơh hìu bơh tàm broă lơh tơn jơh hìu sèt, pơs wàs nàng mŭt ơm neh rơlao 3 nhai do bloh, ală cau tàm hìu ndrờm chờ hờp lơm. Geh hìu ơm kơl jăp, bol añ iang nùs lơh sa, drơng oh kòn in lòt bơsram. Satềp do gam geh Ling tiah 7 sền gròi, jào priă mờ phan sa, den tàng hìu nhă tă ai dùl bơnah nàng blơi tai phan sa, blơi ào mpha pa nàng ală kòn in wă rò Satềp nam pa. Hìu nhă añ ưn ngài Đảng, Dà lơgar uă ngan”.

Kung bè tàm Tuy Đức dê sơl, bơta chờ wă rò Satềp tơl gam geh tus mờ uă hìu gơtìp kal ke jăt gah gùng nhàr lơgar tàm ù gờl càr Lâm Đồng dê. Tàm thôn Bình Minh, sàh Dăk Wil, mò Lữ Thị Đan, kòn cau Thái, dùl nă să ròng is kòn tơnơ̆ mờ tŭ bơklao chơ̆t gờñ. Nggùl nam lài, bơh broă lơh dong kờl rài kis lơh broă sa, mò geh pà 250 nơm iar bal mờ phan sa nàng ròng mờ geh kwang bàng sàh bơto sồr lơh wàng ròng. Mờr Satềp, mpồl iar sơnrờp ngan tăc geh uăngan priă. Nggùl khà priă do mò lời nàng ròng tai, bơnah priă gam tai drơng tàm broă bơsram sră kòn in bal mờ mai ào mpha pa ai oh kòn in. Tàm ală ngai mờr Satềp, 30 kĭ phe dong kờl bơh Cíñ phủ bal mờ mbar, phan ngui geh cau ling jào pà dong kờl bàr nă mè mờ kòn gơtùi sa tơl tàm ală nhai pơn jăt tai. Mò Lữ Thị Đan pà git: “Geh dờp phe dong kờl bơh Cíñ phủ dê, phan pà Satềp bơh cau ling, mè mờ kòn añ gơboh gơbài ngan, ưn ngài Đảng mờ Dà lơgar. Satềp do bàr nă mè mờ kòn geh tơl phan sa, phan ngui nàng Satềp bloh. Nam pa nam Ơseh, di lah gơtùi, kơ̆p kờñ Đảng, Dà lơgar sền gròi rơlao tai nàng bàr nă mè mờ kòn lik klàs mờ rài kis kal ke do”.

Nùs nhơm chờ hờp hờm ram gam tus mờ tiah nhàr lơgar càr Lâm Đồng dê là cồng nha bơh broă tus bal bơh ală mpồl lơh broă cíñ trị. Pah nam, Ling tiah 7 pơgồp bal mờ gơnoar atbồ ală tiah nàng bơyai lơh broă lơh “Nam pa cau ling”. Tàm càr Lâm Đồng, broă lơh nam do geh lơh ndrờm bal tàm 5 sàh tiah nhàr lơgar, tàm hơ̆ geh Tuy Đức, Đắk Wil, Thuận An, Thuận Hạnh mờ Quảng Trực. Bal mờ broă sơn đờm lơh ƀòn ơm kis rềp mờ pôs ling bal mờ làng bol tàm sàh Quảng Trực, broă lơh do neh jào rơlao 2 rơbô 600 pò phan geh di pơgăp 5 tơmàn đong ai ling klàng bal mờ làng bol tàm tiah nhàr lơgar in. Git nđờ rơbô nơm mbar geh klơm pà hìu rơƀah, hìu pa lik klàs rơƀah in; uă dơ̆ kham kòp, pà sơnơm ờ sa priă geh bơyai lơh; drà ràng tăc phan “0 đong” drơng làng bol in blơi phan Satềp. Đại tá Nguyễn Văn Sơn, Cíñ ủy Mpồl Đơng lam Ling klàng càr Lâm Đồng pà git: “Bơh ală broă lơh “Nam pa cau ling” nam do neh cèng geh bơta kwơ màng cíñ trị uă ngan, ai tơngŏ nùs nhơm tam klăc bal đah Ling klàng mờ Làng bol. Bơh tŭ hơ̆ “bơta pràn nùs nhơm làng bol” ngai sơlơ geh tơnguh, bơ̆t bơtàu kơl jăp rơlao tàm tiah nhàr lơgar càr Lâm Đồng dê”.

Tơnơ̆ mờ tŭ tơmŭt bal bơh ală càr Dăk Nông, Lâm Đồng mờ Bình Thuận, càr Lâm Đồng pa geh bă ù ơnàng mờr 24 rơbô 300 kơi sồ vuông, dờng ơnàng ngan gùt lơgar dê, mờ geh gùng nhàr lơgar tàm ù gờl mờ geh nhàr lơgar tàm dà lềng. Mìng is gơl gùng nhàr lơgar tàm ù gờl jòng rơlao 142 kơi sồ, mờ 5 sàh, mờr 100 rơbô nă làng bol ơm kis bal, mờr nggùl khà kờp làng bol là jơi bơtiàn ờ gal cau. Bŭ lah neh rơlao mờ broă tơmŭt bal mpồl lơh broă, càr kung gam geh cồng nha ală broă lơh tơrmù rơƀah uă bơta, tơrgùm tàm tiah kal ke. Di Satềp nam pa nam Ơseh, càr neh lam jào 1 rơbô 600 pò phan, kờp jơh geh 1 tơmàn 600 tơlăk đong tus mờ ală hìu kal ke tàm tiah nhàr lơgar. Mò H’ Vy Êban, Phó Củ tịc Anih duh broă Mặt trận Dà lơgar Việt Nam càr Lâm Đồng pà git: “Bơh broă lơh, làng bol geh tai bơta nàng chờ nam pa, wă rò Satềp hờm ram mờ tơl rơlao. Do kung là broă lơh mùl màl, geh cồng nha, pơgồp bal tàm broă lơh jăt gùng dà broă lơh bơh Đảng, Dà lơgar dê mờ nùs nhơm “ờ lời cau lơi gơtìp sơrbì is hờ tơnơ̆”.

Bơh ală rơkàng hìu geh lơh kơl jăp nàng ala mờ hìu neh sèt, ală broă lơh rài kis broă lơh broă sa gam lơh geh cồng nha, tus mờ ală pò phan nùs nhơm geh jào pa di tŭ, rài kis bơh làng bol tàm tiah nhàr lơgar càr Lâm Đồng gam rơhời geh gơguh. Nam pa tiah nhàr lơgar ờ mìng là bơta niam bơkào, là mbar, mờ gam là nùs nhơm pin dờn geh bơtơl, là mpồl tam klăc bal gùt jơi bơtiàn pơn jăt tai gơguh, bơ̆t bơtàu kơl jăp nùs nhơm làng bol, gàr kơl jăp gơnoar tờm ù tiah lơngăp lơngai tàm tiah nhàr Dà lơgar dê.