Ờ pơrgon lài mơya tàm tìp, ală ngai lồi nam mờr tus sa tềp, gờm chờ Đảng, gờm chờ nam pa, bol hi tus thôn Phú Hữu, sàh Hoà Thịnh, tiah tờm gơbàn dà tih dà lìu đah mat tơngai lik càr Dăk Lăk dê di tàm ngai hìu bơnhă bi Lê Thị Kim Ngân geh gal ngan nac. Kwang bàng kwang àng càr Đồng Nai, Mpồl broă cau ùr Kwang àng càr Dăk Lăk tus jàu pà hìu bơnhă in hìu nùs nhơm. Bi Ngân chờ hờp ngan tài phan pà kuơmàng tàm ală ngai kuơmàng: “Ngan là añ chờ hờp ngan, tŭ do ờ git đơs bơta lơi tai. Ală wa, ală mơi rê nting bơr gờm chờ sa tềp, nting bơr ală oh mi nam pa bềng lìu pràn kơldang să jan mờ gơboh gơbài”.

Kung geh mat tàm ngai jàu hìu sơl, ồng Phương Văn Lành, Ƀí thư Đảng ủy sàh Hoà Thịnh chờ hờp yal là, tềl lời wơl bơh dà tih dà lìu dờng ngan bơh lài tus tŭ do neh geh jùt jơh. Hoà Thịnh gam tàm tŭ tơngai bơtàu tơnguh wơl niam ngan: “Ngai do, ală oh mi tus ndo den ờ gam tềl lơi bơh dơ̆ mìu dà tih dà lìu dờng ngan bơh lài tus tŭ do tai, mờ rài kis làng bol dê neh gơ rê bè ờs wơl tàm bơta pa. Hơ̆ là kơnòm bơta đơng lam, sồr lơh bơh ală kâp ủy đảng, bơta pơgồp bal bơh jơh gùt anih lơh broă cíñ trị, bơta at tê bal bơh ală cau geh nùs nhơm niam dê den hơ̆ sồng gơtùi lơh geh cồng nha bè tŭ do”.

Ơm ngài hìu bi Ngân dùl ƀlàng sre là Mpồl 13 thôn Phú Phong, tiah gơtìp dà tih dà lìu lơh aniai kơn jơ̆ kơn jut ngan rlau jơh kung là tiah mờ Thủ tướng ồng Phạm Minh Chính neh lòt sền là lam lơh Broă lơh Quang Trung. Bơh gơnru tơrlah tơrlơm, tŭ do tiah do neh geh hìu sa chờ hờp jơh nam yau bơh gờñ. Bè ồng Trần Văn Khánh neh bơyai lơh chờ sa tơn jơh nam yau bơh gờñ. Tus tŭ do, ồng neh iang nùs, rơcang sa tềp mờ jơh bal tơnơ̆ do in tai: “Tŭ do den tam gơl tus broă sơngka sền gàr lŏ sre, ơn phơng, jì nhơt àr, ƀồm sơnơm, lòt srồt kòi mờ rơcang chi che, tờm bơkàu wă rò sa tềp tai, hơ̆ sồng lơh niam wơl suơn chi. Đơs bal là hìu bơnhă geh uă ngan broă pal lơh”.

Geh bơta niam ngan, ồng Trần Văn Khánh kung sùm geh hòi là Trần Quốc Khánh. 4 nă kòn klau ồng dê dơ̆ dùl dơ̆ geh sơnđan là Hòa, Hội, Nghĩa, Nam… jat jơnau đơs dà lơgar he dê là “Kộng hòa – Sàh hội – Củ Nghĩa – Việt Nam”. 5 nơm hìu bơh hìu bơnhă 5 nă bèp mờ kòn: Quốc Khánh – Kộng Hòa – Sàh hội- Củ Nghĩa- Việt Nam” dê geh lơh pa bơh broă lơh Quang Trung neh brồ guh, mpờl gŏ tàm ƀlàng sre gơs tơlir. Jat bi Trần Chủ Nghĩa đơs, broă lơh bơt bơtàu wơl dờng ngan bơh broă lơh dờng mờ Thủ tướng lam lơh, ờ mìng cèng wơl hìu đam pa, nàng làng bol in bơt bơtàu wơl rài kis mờ gam lơh  gơ pờ bồ tơngoh tai: “Dilah mờ he moat jrum den ờ gơtùi lơh broă lơi, tài bồ tơngoh pal gơ pờ. Ờ gơ pờ bồ tơngoh den àñ gri kung gŏ kơn jơ̆ sơl. He chờ hờp, ngac ngar den he lơh broă lơi kung niam lơm, ờ huan bòl, gơ chờ hờp chờ hờn tàm nùs”.

Tàm ală ngai gờm chờ Đảng, gờm chờ nam pa, bi Trần Chủ Nghiã kung gam ờ ru ngan mờ broă crăp tai rơkàng jơm ai jơh gùt ƀlàng bồ đap hìu nàng lơh anih wă nac, ơn rơndeh. Bi Nghĩa kung crăp tai 1 gơl ding lòs mờ 2 jrong mpồng hìu nàng lơh jơng tồt bồng bi. Bi đơs là, broă tồt bồng bi dà lơgar tàm hìu pa tàm tiah bơtàu tơnguh wơl tơnơ̆ dà tih dà lìu do là broă geh gơtha kuơmàng ngan: “Pal tồt 2 nơm bồng bi tàm 2 nơm jrong hơ̆ gơ in kơ̆. Sền gŏ hìu đam geh bồng bi den hơ̆ sồng niam. Bal mờ hơ̆, đah ne là hìu bèp añ dê. Nam do ồng neh 45 sơnam geh Đảng, añ kung neh rlau 10 nam geh Đảng sơl”.

Tàm bơta gơ klŏ gơ crà nam pa nam ơseh dê gờm chờ Đảng, gờm chờ nam pa, ală bồng bi pơrhê par tềng đap mpồng hìu pa ờ mìng yal tơnggit dùl sa tềp wil tơl rlau mờ gam là jơnau đơs nền ai bơta kơp kờñ iang nùs ơm kis, bơt bơtàu tơnơ̆ do kơnhăp kơ̆ tàm ù tiah neh geh tŭ pal pơnđơl tàm càl rbut dờng, dà tih dà lìu.