Tàm suơn ơnàng rlau 1 lồ tàm sàh Ea Na, càr Dăk Lăk, cau ling sồt să ồng Trần Quốc Đài bal mờ pơ ùr ờ ru ngan tàm kàl tơnhào sầu riêng. Cau lơh broă sa tơryang tơryồng hơ̆ kung gam cèng tàm să jan he dê uă nsàng gar phàu tơnơ̆ rài tam lơh. Ồng Đài lòt ling nam 1976, tam lơh tàm tiah tam lơh lơgar Campuchia. Tàm dùl dơ̆ jòi gơ sơ̆t ling Khmer Đỏ, ồng gơ tìp phào bol sò tơm dê lơh sồt să tàm ngkời, tê mờ jơng. Tơnơ̆ tŭ sơm sồt, ồng pơn jat tai tam lơh tus di tŭ lơh sir kơnòl broă den hơ̆ sồng lik ling nam 1981. Rê wơl mờ rài kis bè ờs, ồng kơ̆ nùs tam kơphê, tiêu den khin cha ai sầu riêng tàm broă tam phan. Tus tŭ do, suơn rlau 1 lồ cèng wơl priă lơh geh pơgăp 900 tơlak đong pah nam. Mờ ồng Trần Quốc Đài, sồt să lơh tơl broă lơh kơ̆ jơ̆ kơn jŭt rlau mờ cau ndai, mơya ờ gŏ di là jơnau tờm nàng ơm wơl ờ:

“Lơh khat dùl broă lơh lơi kung bòl ngan gơ, cau bè ờs lơh mìr neh bòl glar ngan rao, bè añ là cau ling sồt să den rơ̆p kal ke bòl glar rlau. Den tàng tŭ lơh den he sền bơta pràn he dê nàng lơh, lơh 6 jiơ ơm rlô, pơndrờm mờ cau bè ờs den lơh 8 jiơ. Añ pơlam tàp hời rơ hời rơ̆p tơn jŏ geh bơta pràn să jan dê”.

Ờ ngài mờ tiah suơn ồng Trần Quốc Đài dê là suơn kơphê tam tàm bơrlŭ bal mờ sầu riêng tơlir niam bơh cau ling kòp tê jê să ồng Hà Văn Quảng. Tơnơ̆ ală nam nhai lơh kơnòl broă ală lơgar tàm tiah tam lơh lơgar Campuchia, ồng mut tàm càr Dăk Lăk lơh broă sa jat mpồl lơh sa pa. Bơh cau ling, ồng pơn jat tai tă pơgồp dà kơl hề tàm mpồl kwang àng, ling klàng ƀòn lơgar den at gơnoar broă Bí thư Đảng ủy sàh Ea Bông lài mờ tŭ ơm rlô lơh broă. Lik bơh kơnòl broă anih lơh broă dê, cau ling yau wơl rê wơl mờ suơn mìr. Tàm bă ù ơnàng 1 lồ kơphê tam tàm bơr lŭ bal mờ sầu riêng, hìu bơnhă ồng lơh geh priă jền sùm bơh 600 tus 700 tơlak đong pah nam.

Mờ làng bol tàm ƀòn lơgar, bơta kwơ ngan tàm ồng Quảng dê ờ mìng là tiah suơn ai cồng nha lơh sa uă lơm mờ gam là nùs nhơm lam lài bơh cau ling nam lài do dê. Tŭ ƀòn lơgar pờ ơnàng gùng lòt rê ƀòn lơgar, ồng pà is mờr 100 thơk vuông ù. Geh mờng chài lơh sa, ồng crăp rcang bơto pơlam cau tàm mpồl Cau ling yau mờ làng bol in bơta chài sơng ka sền gàr kơphê, sầu riêng nàng tơnguh bal priă lơh geh. Ồng Hà Văn Quảng pà gĭt:

“Añ rlô lơh broă den wơl pơn jat tai tus bal sơng ka sền gàr suơn chi bơh hìu bơnhă dê. Mờ dùl nă cau ling, đòm jat niam nùs nhơm Cau ling Wa Hồ, añ sùm crăp rcang lòt lài lơh krơh niam nàng làng bol gùt dar in lơh jat bal”.

Tơnơ̆ tŭ tơmŭt bal mpồl lơh broă sră pơ àr gơnoar atbồ kấp sàh, Mpồl Cau ling yau sàh Ea Na, càr Dăk Lăk geh 861 nă cau tàm mpồl, tàm hơ̆ geh 39 nă là cau ling sồt să, cau ling kòp tê jê să. Uă cau tàm mpồl bulah sơnam neh dờng, pràn kơl dang să jan gơmù uă kung gam tus bal ală srơh tàm ƀòn lơgar dê. Ồng Trần Quốc Đài mờ ồng Hà Văn Quảng là cau ling yau pơn rơ jak ngan geh mpồl rơwah nàng rề ơnàng broă lơh lơh broă sa. Ồng Phương Toại Nguyện, Phó Chủ tịch Mpồl Cau ling yau sàh Ea Na, pà gĭt, ồng Đài mờ ồng Quảng kung sùm bơto pơlam cau tàm mpồl in bơta chài sơngka sền gàr kơphê, sầu riêng, tiêu; dong kờl ală hìu bơnhă gam kal ke in brồ guh bè ờs wơl rài kis.

“Pơrjum ờs mờng pah nhai, pah qúy, bol añ ndrờm lơh broă lơh lòt sền ală broă lơh bơtàu tơnguh lơh sa geh cồng nha. Bol añ neh mblàng yal, rề ơnàng broă lơh do tus mờ ală cau tàm mpồl gam ờ hoan gĭt bè bơta chài sơng ka sền gàr kơphê, sầu riêng, tiêu mờ broă lam ală cau tàm mpồl tus tơn tàm suơn bơh 2 nă ồng do dê nàng lòt sền mờ jòi gĭt...”

Tam lơh neh lòt ngài, ală bơta sồt să tàm să jan kung gam wơl tàm hơ̆, mơya nùs nhơm lơh ngan bơh cau ling dê ờ ơm wơl tàm ngai lik bơh mpồl ling. Bơh tiah tam lơh nam lơi tus ală suơn kơphê, sầu riêng tŭ do, khi kung gam ngềt ngơ̆t tă pơgồp broă lơh, mờ nùs nhơm lam lài mờ kơnòl mờ mpồl bơtiàn. Hơ̆ kung là rùp hin rềp mềr, ngan ngồn bè nùs nhơm Cau ling Wa Hồ dê tàm rài lơngăp lơngai: Ờ mìng gĭt tam lơh tŭ Dà lơgar tờm kờñ lơm mờ gam kơ̆ nùs kong jai bòl glar kal ke nàng bơt bơtàu ƀòn lơgar tờm tŭ dà lơgar ring lơngai.