Uă nam do, cau chài ồng Phạm Văn Rôm tàm sàh Ba Vinh, càr Quảng Ngãi jơh nùs jơh tồr ngan bơto yal wơl bơta chài dròng Cing Pe ai rơnàng kơnòm să cau H’re in. Ồng pà gĭt, do là bơta phan ngui đơs crih mùl gŏ is ngan bơh cau H’re dê, cèng bềng bơta kwơ đah hwềng, là gai was bơta pas sơm mờ anih ơm bơh cau hìu bơnhă dê tàm mpồl bơtiàn:

 “Lài ngan là he sền gàr mờ prăp gàr niam chài bơh kòn cau H’rê he dê. Dơ̆ bàr, bơta chài Cing Pe geh bơh jŏ rài ngan, den tàng Cing Pe cau H’re dê geh bơta kwơ is ồn ngan, he pal prăp gàr bơta kwơ niam bơnĕ is làng bol kòn cau H’re dê”.

Bơta chài dròng Cing Pe bơh cau H’re dê neh geh dờn dờp là Phan lời wơl niam chài ờ di phan bơna dà lơgar dê. Mò Trần Thị Thanh Thúy, Phó Chủ tịch Anih duh broă Làng bol sàh Ba Vinh dê pà gĭt, ƀòn lơgar lam lơh ală jơnau neh lơh nền prăp gàr, ngui niam bơta kwơ phan lời wơl do tàm jòi lơh lòt nhơl. Tus tŭ do, sàh neh tơnggơs geh 4 mpồl niam chài – đơs crih tam ya tàm 4 thôn mờ gam pơn jăt tai lơh ală jơnau neh lơh nền prăp gàr, sền gàr mờ ngui niam bơta kwơ Cing Pe bal mờ ală jơnau tam ya ờs mờng bơh yau bơh ùr ơruh kòn cau H’re dê. Sàh neh pờ uă ơdŭ bơto yal wơl bơta chài Cing Pe mờ broă Tàñ ồi, nàng prăp gàr ală bơta kwơ niam chài ờs mờng bơh yau bơh cau H’re dê, pơgồp bơnah bơtàu tơngguh lòt nhơl mpồl bơtiàn, lơh gơlik geh broă lơh broă sa ai làng bol in:

 “Do là ală broă lơh geh dong kờl bơh Broă lơh jơnau kờñ dà lơgar dê mờ rơ̆p pơn jăt tai geh rề ơnàng lơh uă mờ lơh gơgơs ală phan bơna ai làng bol in bè jŏ jòng. Ƀòn lơgar kơ̆p kờñ rơ̆p pơgồp bal jơh ală broă lơh nàng bơcri priă lơh gơlik geh phan bơna tờm ngan ai làng bol in bơh ală ơdŭ bơto yal wơl bè do”.

Bơh broă lơh jơnau kờñ dà lơgar, uă bơta kwơ niam chài ờs mờng bơh yau bơh làng bol kòn cau Cor dê kung gam geh prăp gàr mờ ngui niam. Tàm ală sàh tiah bơnơm jơnhoa càr Quảng Ngãi dê, ală broă lơh bơta chài bè tàm pơrlòng cing, tam ya Cà đáo, bơtàu tờm gơnơng bal mờ ală lơh yàng lơh chờ ờs mờng bơh yau geh lơh wơl, bơto yal wơl ai rơnàng kơnòm să in. Uă nam do, Cau chài Làng bol ồng Hồ Ngọc An tàm sàh tiah bơnơm Trà Bồng jơh nùs jơh tồr ngan mờ broă bơto yal wơl niam chài kòn cau Cor tàm hìu bơsram in. Ồng chờ hờp tŭ ngai sơlơ geh uă bơyô kơnòm să gơboh kờñ niam chài jơi bơtiàn dê.

“Pal đơs là añ pơniờ să ngan tŭ lơh geh ai jơi bơtiàn he dê in, sền gàr mờ prăp gàr. Să tờm añ kung là cau să tờm tơn bơto yal wơl ai ală sau là kơnòm bơsram in, bè hìu bơsram ơm sa bĭc tơn jơi bơtiàn Trà Bồng den añ gŏ gơlơh chờ hờp ngan. Tơl dơ̆ lơh yàng lơh chờ Ngả Rạ bơh ală hìu bơsram dê khi ndrờm bơyai lơh geh niam chài làng bol kòn cau Cor dê lơm”.

Gĭt nền niam chài hơ̆ ngan là bơnàng jă nàng bơtàu tơngguh lòt nhơl kơnhăp jŏ, ală ƀòn lơgar tiah bơnơm càr Quảng Ngãi pơn jăt bal prăp gàr phan lời wơl mờ bơtàu tơngguh lòt nhơl mpồl bơtiàn, rơhời lơh gơlik geh broă lơh broă sa ai làng bol in. Ồng Đỗ Khắc Phi, Phó Chủ tịch Anih duh broă Làng bol sàh Trà Bồng, đơs nền:

“Bơh priă bơcri Rơndăp broă lơh 6 bơh Broă lơh jơnau kờñ dà lơgar dê bơtàu tơngguh lơh sa- mpồl bơtiàn tiah làng bol jơi bơtiàn dồ êt nă cau, Anih duh broă Làng bol sàh neh tơrgùm dong kờl nàng bơcri priă kung bè lơh jăt niam broă prăp gàr ală phan lời wơl niam chài tàm ù tiah ƀòn lơgar dê. Mùl màl là bơto yal wơl ală phan lời wơl niam chài; blơi prăp dong kờl phan ngui măy mŏk kung bè bơcri priă bơ̆t bơtàu phan bơna niam chài ai ală thôn in. Tơngai tus, bol hi pơn jăt tai tơrgùm bơta pràn priă jền bơh ală broă lơh dê, nàng bơtàu tơngguh lơh sa – mpồl bơtiàn tiah làng bol jơi bơtiàn dồ êt nă cau mờ tiah bơnơm”.