Mờr 70 sơnam, bơta pràn kơl dang să jan neh ờ pràn tai uă ngan, mơya ồng Bùi Văn Tạc, tàm ƀòn Mrông Yố, sàh Ia Phí, càr Gia Lai gam kah sùm bi klao là cau chơ̆t màng Bùi Văn Tửu, phi să tàm nam 1954 tàm tiah tam lơh đah Tô dà lơgar. Geh kwang bàng ƀòn lơgar cèng tus sơnah ƀòn Pleiku nàng ai mẫu drơng tàm broă sền swì git nền ADN, ồng Bùi Văn Tạc ngoh rơngăc ngan: “Kơ̆p gơn dờng màng ngan là tŭ do jòi gŏ măt, jòi gŏ ƀồc nàng cèng rê mờ mò ồng, rê mờ jơi nòi. Cau pròc mhàm tàm hìu nhă tŭ do chơ̆t mờr jơh bloh”.

Kung tus bal bơh gờñ tàm anih ai mẫu là mò Lê Thị Hoà, tàm sàh Đăk Đoa. Hìu mò geh 2 nă cau bi klao là cau chơ̆t màng Lê Thắng, phi să tàm nam 1972 mờ cau chơ̆t màng Lê Lợi, phi să tàm nam 1974, ndrờm chơ̆t tàm tiah tam lơh Quảng Trị. Uă nam do, mò bal mờ ală cau tàm hìu nhă neh lòt jòi jơnau yal tơngit, lùp sền gùt tiah mờ jơnau kơ̆p gơn jòi gŏ anih neh tơ̆p ală bi dê, mơya tus tŭ do kung gam ờ hềt jòi gŏ sơl. Den tàng, broă ai mẫu ADN dơ̆ do sòl àng tàm hìu nhă dùl nùs nhơm kơ̆p gơn pa. “Tŭ do hìu nhă kơ̆p gơn ngan kờñ jòi gŏ bàr nă bi, gŏ măt tàm ƀlàng tơ̆p ƀồc nàng hìu nhă pah nam tus còp ală bi”.

Tàm tiah dà lềng Quy Nhơn, nùs nhơm chờ mờ kơ̆p gơn gŏ loh làng ngan tàm muh măt ồng Nguyễn Văn Phước tŭ geh ai mẫu ADN mờ jơnau kơ̆p kờñ jòi gŏ bi klao là cau chơ̆t màng Nguyễn Tỷ, phi să tàm nam 1969. Mè bèp chơ̆t gờñ, ală jơnau kah wơl bè bi klao mìng gam là bơh jơnau yal cau pròc mhàm dê. Rơlao 50 nam neh rơlao, hìu nhă ồng Phước kung gam duh khoai cau chơ̆t màng Nguyễn Tỷ, mơya ờ hềt dùl dơ̆ lơi git bi klao neh phi să mờ tơ̆p tàm tiah lơi. “Ngai do geh broă lơh ai mẫu ADN cau pròc mhàm, añ chờ hờp ngan. Lài do kung gam duh khoai bi mơya ờ git bi tàm tiah lơi den tàng moăt ngan. Kơ̆p kờñ bi añ geh tơrgùm rê tàm ƀlàng tơ̆p ƀồc cau chơ̆t màng nàng añ geh anih tus còp”.

Dơ̆ lik lơh broă uă nàng ai mẫu ADN cau pròc mhàm cau chơ̆t màng ờ hềt git đal măt tàm càr Gia Lai geh lơh tàm 9 anih tàm gùt càr. Mpồl kwang àng, kwang bàng lơh sơnơm bal mờ cau lơh broă nùs nhơm dong kờl geh ai tus lơh broă sùm tàm tơngai ai mẫu. Thượng tá Nguyễn Hoà Bình, Phó Kwang lam bồ Cơl dŭ lơh broă Cảnh sát atbồ broă lơh sră nggal bè lơngăp lơngai mpồl bơtiàn, Kwang àng càr Gia Lai pà git, cau pròc mhàm cau chơ̆t màng geh bơto sồr lơh gơs sră nggal, sền jơnau cih bơh să tờm dê đal git pròc mhàm, ai mẫu ADN mờ tơrgùm jơnau yal tơngit di jăt mờ bơta chài broă geh ai. “Sồr lơh, bơto sồr kwang àng kấp sàh tàm broă sền wơl, tơrgùm ală jơnau yal bè cau chơ̆t màng ờ hềt git đal măt kung bè cau pròc mhàm nàng ai mẫu ADN, ală mpồl ling neh ờ ngòt ngai kung bè mang tus tơl hìu làng bol nàng lam, mblàng nàng làng bol tus bal”.

Tus tŭ do, càr Gia Lai neh lơh gơs broă sền wơl, đal git mờ tơrgùm jơnau yal tơngit cau chơ̆t màng, cau pròc mhàm cau chơ̆t màng tàm Tơngu me jơnau yal tơngit dà lơgar bè làng bol. Gùt càr neh tơrgùm jơnau yal tơngit bơh rơlao 32 rơbô ƀồc cau chơ̆t màng; tàm hơ̆ geh rơlao 8 rơbô cau chơ̆t màng ờ hềt đal git măt. Mờ đal git di pơgăp 4 rơbô 200 nă cau pròc mhàm gơwèt tàm mpồl cau ai mẫu ADN. Mò Nguyễn Thị Thanh Lịch, Phó Chủ tịch Anih duh broă Làng bol càr Gia Lai pà git: “Lơh jăt broă lơh dờng 500 ngai mang, bơdìh mờ broă ai mẫu ADN nàng pơyoa tus đal, bol añ kung jòi mờ kờp jơh cau pròc mhàm ală cau chơ̆t màng, ală cau ờ hềt jòi gŏ ƀồc ntìng cau chơ̆t màng nàng lơh ndrờm bal, jơnau yal tơngit di pal, dong kờl jòi mờ đal git ADN cau chơ̆t màng. Do kung là dơ̆ nàng ală mpồl rơnàng tơnơ̆ do ưn ngài broă lơh dờng màng bơh ală cau chơ̆t màng dê tus mờ rài khăt gơboh krơi is Dà lơgar, nàng gờñ ai cau chơ̆t màng rê mờ cau pròc mhàm mờ hìu nhă”.

Geh ală hìu nhă neh kơ̆p gơn sùm rơlao 50 nam do mìng nàng git cau pròc mhàm gam tàm tiah lơi. Tơngai hơ̆ di gơlan gam uă rơlao, mơya tơl nơm mẫu sinh phẩm ADN geh dờp ngai do là geh tai dùl dơ̆ niam nàng ală jơnau yal tơngit gam ờ mùl màl geh tơrbŏ tai. Mờ hơ̆ kung là broă ală kấp, ală gah lơh broă bal mờ mpồl bơtiàn pơn jăt tai lơh jăt nùs nhơm niam gơwèt mờ ală cau neh phi să tài Dà lơgar, nàng ngai sơlơ uă cau chơ̆t màng geh rê mờ măt sơnđan tờm bal mờ jơnau kơ̆p gơn bơh hìu nhă dê.