Geh mat tàm ƀòn ơm kis pa bơh gờñ ngan, ồng Nay Ơn ơm tàm ƀòn Nông Siu, sàh Ia Dreh chờ hờp ngan tŭ rơ wah sră dờp bă ù pa. Ồng pà git, uă nam do, hìu bơnhă ồng kis tàm tiah sùm gơtìp ngơr bam jrô, gơtìp dà wềl tàm nhai mìu. Dơ̆ do, ồng là dùl tàm 20 hìu bơnhă làng bol tàm ală ƀòn Ia Klon, Gom Gốp, Bhă Nga mờ Blăk geh ai lài rơndap ƀòn ơm kis pa lài ngan. Tiah ơm kis pa Ia Dreh ơnàng 5,77 lồ, kờp jơh priă bơcri lơh 127 tơmàn đong, tŭ do neh lơh sir phan bơna bơt bơtàu, gùng che đèng lơh geh mờr 75% mờ broă tồt jrong tam pà bă ù neh lơh gơs. Ồng Nay Ơn pà git:

“Tiah ơm yau ờ kơ̆, ờ niam, sùm gơtìp dà bam, rơngòt ngan. Tŭ do geh dà lơgar ai geh bơta niam, dong tơl hìu bơnhă ntrờn ơm kis tus ală tiah lơngăp lơngai. Añ chờ hờp ngan mờ ưn ngài ngan dà lơgar dong kờl”.

Ờ mìng tàm Ia Dreh, 953 hìu bơnhă làng bol gơ wèt tiah trồ tiah lơh aniai tàm ală sàh Ia Tul, Ia Hiao, Ia Rsai, sàh Uar, Đăk Song mờ Ia Ly kung rơp geh rơndap tiah ơm pa lơngăp lơngai, rơhời tơn jơh bơta kơlôi rơcang, ờ suk pah dơ̆ kàl mìu càl rbut dờng.

Gia Lai là ƀòn tờm bơtau Quang Trung dê. “Broă lơh dờng Quang Trung” geh càr Gia Lai lam lơh bơh tŭ do tus ngai 15/12/2026 mờ jơnau kờñ ai jơh tơl nă làng bol lik bơh ală tiah pơhìn gơtìp tơrlah, ngơr bam lài mờ nhai mìu càl rbut dờng. Jơh gùt càr lam lơh 16 rơndap broă lơh, broă rơndap lơh rơndap ai, gàr kơ̆ làng bol ơm kis tiah trồ tiah lơh aniai. Tàm hơ̆, tiah đah mat tơngai mut càr geh 7 rơndap broă lơh bơt bơtàu ƀòn ơm kis pa geh kờp jơh priă bơcri lơh rlau 875 tơmàn đong. Ală tiah ơm kis pa geh bơcri priă lơh ndrờm bal gùng lòt, ồs đèng, ai pà dà, yuh tơlik dà, đèng sòl àng, hìu bơsram, hìu pơrjum mpồl bơtiàn mờ ală broă lơh pal geh ndai, lơh gơlik bơta tờm nàng làng bol in gàr kơ̆ rài kis jŏ jòng.

Nàng lơh di tŭ tơngai hơ pơrgon, Anih duh broă Làng bol càr Gia Lai sồr lơh gơs broă sơn đờm lam lơh jơh ală ƀòn ơm kis pa lài mờ ngai 31/8, jàu 100% hìu ơm lài mờ ngai 30/11 mờ lơh sir broă ntrờn làng bol lài mờ ngai 15/12. Gơ wèt mờ ală hìu bơnhă ờ gơtùi lơh is, ală ƀòn lơgar rơp sồr cau lơh broă, ai phan bơna, priă tă lơh jat broă lơh “khoă hìu jàu tus tê”, dong làng bol geh hìu ơm tơnơ̆ tŭ hìu geh lơh gơs. Ồng Dương Mah Tiệp - Phó Chủ tịch Anih duh broă Làng bol càr Gia Lai sồr:

“Mpồl atbồ bơcri priă bơt bơtàu càr dê mờ ală cau tờm lơh rơndap broă tơrgùm uă ngan rlau jơh măi mok, phan bơna, phan bơt bơtàu jal mhar lơh gơs ală bơnah broă pal geh, gàr bơta niam, gàr bơta kơnhăp kơ̆ mờ gàr di tơngai hơ pơrgon. Anih duh broă Làng bol sàh lơh niam broă lơh mblàng yal, hòi jà lơh geh bơta ring bal tàm làng bol, di tŭ bơsong ală kal ke gơ wèt gơnăp gơnoar mờ jàu ù pal gàr bơta loh làng, song dơpă, di jơnau sồr. Mờ kung rơcang lài ală bơnah priă jền dipal jat bơta kờñ is nàng dong kờl làng bol lơh hìu ơm, dong kờl lài hìu bơnhă rƀah, hìu bơnhă geh rài kis kal ke, hìu bơnhă ờ geh priă jền nàng gơtùi lơh is hìu”.