Tàm dơ̆ ai ling lòt lơh broă, kwang đơng lam bồ càr Gia Lai bal mờ kwang đơng lam bồ Gah đơng lam Ling klàng càr Gia Lai neh pơyua jơnau còp să, pơndờm pơnđiang ală cau ling lòt lơh kơnòl broă dơ̆ do. Jơh mpồl K52 pal gĭt nền ală jơnau cih bơh adat boh lam dê bè gĭt gơ̆p dunia, lơh jăt niam bơta lơh glài ling klàng dê, ală jơnau cih bơh adat boh lam Ƀộ Quôk phòng dê, bơh Ling tiah do dê tàm gĭt gơ̆p lơh broă mờ lơgar ndai. Gĭt nền broă gơlik geh tàm ƀòn lơgar, ală jơnau yal bè bơtô ƀồc cau ling chơ̆t màng tàm ù tiah ƀòn lơgar dờp lơh kơnòl broă, jơh ală jơnau yal ndrờm geh sền swì, lùp nền.

Do là dơ̆ 23 Mpồl K52 lòt gùng lơh kơnòl broă tàm đah lơgar gơ̆p bơyô Campuchia. Tus tŭ do, Mpồl K52 neh lòt jòi, rờ tơrgùm mờ jun rê hờ lơgar tờm geh 1 rbô 468 ƀồc ntìng cau ling chơ̆t màng, ling lơh broă dong kờl is mờ cau jak chài lơgar Việt Nam dê phi să tàm ală rài tam lơh tàm lơgar Campuchia.