Ồng Nguyễn Phan Ngọc Dung sồr Anih duh broă làng bol càr kờñ pal lam lơh ring bal, di mờ bơta geh ngan bơh tơl tiah dê. Bal mờ hơ̆ pal lơh pràn mblàng yal bè broă lơh dong kờl kòn cau, tơrmù rƀah, bơta chài lơh sa, sơn đờm mut lơh broă mờ bơt bơtàu broă lơh sa is ồn. Broă lòt sền, rơ wah mpồl hìu bơnhă rƀah, ndrờm bè cau rƀah kờñ pal geh lơh nền nòn nàng dong kờl geh bơta tờm, tơrgùm tàm broă lơh sa jat mpồl lơh phan. Bơdìh hơ̆ tai, càr kung kờñ pal sơlơ tơnguh tai dong kờl bơta chài măi mok, ai càn priă dong kờl priă cồng, bơto broă lơh tàm ƀòn lơgar dê, tàm tơrbŏ mờ anih blơi ai ală phan lơh gơs bơh suơn sre in nàng kờñ lơh geh uă ngan rlau jơh cồng nha lơh geh priă bơcri dê mờ tam gơl broă lơh sa ai làng bol kòn cau in.