Geh “Làng bol pin dờn, Đảng sồr” nam do là tơngai lơh broă dơ̆ 2 ồng Đỗ Hiền Lương dờp ăt gơnoar broă Ƀí thư Ci ƀộ ăt tơn Gơnoar broă Kwang ătbồ thôn 2, thị trấn Sa Thầy, kơnhoàl Sa Thầy. Nàng lơh sir tơl gơnoar broă Ƀí thư Ci ƀộ bal mờ 67 nă đảng viên mờ kwang ătbồ thôn tàm ƀòn lơgar tiah tờm kơnhoàl dê, geh jơnau sồr uă bè bơtàu tơnguh jơh bal bè lơh broă sa sươn sre mờ kă bro, drơng broă, jăt ồng Lương yal, pal ngan ngồn là cau bơh Đảng dê, bơh làng bol dê, là anih tờm tam klăc dê. Ồng Đỗ Hiền Lương, đơs: Ală broă lơh tàm ƀòn lơgar den rơ̆ ru mờ uă ngan, ờ gŏ kờp tŭ jiơ khăt tŭ lơi broă tus là pal bơsong. Làng bol pin dờn pồ he guh den he pal kah wơl bơta pin dờn hơ̆ bơh làng bol dê bơsong dipal broă làng bol dê ờ lơi cau lơi mờ lời gơlik geh đah gơ̆p ƀòn mờ gơ̆p hơ̆ sồng đah thôn do mờ thôn ndai. Bơh tŭ añ lơh tus tŭ do là ờ hềt dùl broă lơi kâp hơđang đơs lah. Đơs bal broă bơsong niam lơm.

Nàng lơh jăt jơnau sồr tơrgùm bal gơnoar broă Ƀí thư Ci ƀộ ăt tơn gơnoar broă Kwang ătbồ thôn mờ Ƀí thư Ci ƀộ ăt tơn gơnoar broă Kwang ătbồ Mpồl lơh broă Mặt trận thôn, tàm ală nam do, Huyện ủy kơnhoàl Sa Thầu sền gròi lơh jăt niam broă lơh săc rwah kwang bàng pal geh tơl bè bồ tơngoh jak, broă lơh jak, nùs nhơm niam, nùs nhơm lơh broă mờ geh bơngă pin dờn. Kơnờm bè hơ̆ mờ mpồl ƀí thư ci ƀộ ăt tơn gơnoar broă kwang ătbồ thôn neh tơngŏ geh gơnoar broă cau tờm đơng lam cíñ trị, anih tờm tam klăc tàm ală ci ƀộ, thôn, ƀòn. Mò Y Sâm, Phó Ƀí thư Duh broă sùm Huyện ủy kơnhoàl Sa Thầy mơkung là Củ tịc Hội đồng Ñân zân kơnhoàl Sa Thầy pà gĭt: Broă bơh sơnrờp pal gĭt nền hơ̆ là broă săc rwah kwang bàng. Săc rwah ală cau geh bơngă pin dờn, ală cau gĭt wă jrô gùng dà, jơnau sồr bơh Đảng dê, broă dong kờl, adat boh lam Dà lơgar dê. Làng bol pal pin dờn, Đảng sồr lơh. Tiah kal ke sồr ƀòn lơgar kờp sền gơ wèt mờ kwang bàng kơnòm să, ơruh pơnu mờ kwơmàng là gơ wèt mờ ală sau neh bơsram geh sră cơng tàng jơh bơsram. Dơ̆ bàr tai là gơ wèt mờ ală sau mờ lòt ling rê nàng tơmŭt Đảng bơto lài mpồl cau rơcăng lài lơh kwang bàng tàm ƀòn lơgar.

Mờ bơta jơh nùs lơh ngan lơh sir jơnau sồr bơh Dà lơgar mờ bơh càr dê, tus nhai 08 nam 2023 tàm 64 thôn, ƀòn gơ wèt 11 xã, thị trấn bơh kơnhoàl Sa Thầy dê neh geh 53 nă Ƀí thư Ci ƀộ ăt tơn gơnoar broă Kwang ătbồ thôn mờ 11 nă Ƀí thư Ci ƀộ ăt tơn gơnoar broă Kwang ătbồ Mpồl lơh broă Mặt trận thôn. Bơta geh ngan pà gŏ, broă tơrgùm dùl gơnoar broă Ƀí thư Ci ƀộ ăt tơn gơnoar broă Kwang ătbồ thôn halà Kwang ătbồ Mpồl lơh broă Mặt trận thôn neh dong tơrmù ƀà kwang bàng lơh broă sa priă nhai dà lơgar, tơrmù geh 64 gơnoar broă ờ lơh kơnòl broă sùm tàm thôn mờ broă tơrgùm tàm dùl anih ƀươn ai broă lam lơh mờ lơh jăt in.

Kơnờm săc rwah geh ală cau geh bơta pràn jak lam bồ, ătbồ, đơng lam, ngac ngar, khin kơlôi, khin lơh, jơh nùs jơh tồr mờ kơnòl broă mờ geh bơngă pin dờn uă tàm làng bol den tàng neh lơh geh cồng nha broă lơh. Ồng Phan Chí Thiện, Ƀí thư Đảng ủy xã Ya Ly, kơnhoàl Sa Thầy, đơs nền: Pe ƀòn làng bol jơi bơtiàn dùl êt nă cau den ồng Ƀí thư Ci ƀộ ăt tơn gơnoar broă Kwang ătbồ thôn là cau tàm ƀòn lơgar, gĭt wă ngan bè làng bol, broă lơh sa, bơta is rơmis rài kis làng bol ƀòn lơgar den tàng ƀươn ngan mờ gơnoar broă bơh Ƀí thư Ci ƀộ dê là ai gùng dà mờ dơ̆ bàr là lam lơh jăt gơnoar broă bơh kwang ătbồ thôn dê. Ƀươn ngan tàm broă lam lơh jăt ală jơnau sồr bơh Đảng dê, adat boh lam Dà lơgar dê.

Ai ồng Nguyễn Minh Thuận, Ƀí thư Đảng ủy thị trấn Sa Thầy, kơnhoàl Sa Thầy, pà gĭt: Đảng ủy kung neh pơđơl pràn lơh sir 100% broă lơh tơrgùm dùl do. Ƀươn là cau să tờm tơn dờp, kơlôi sơnơng di tŭ geh jơnau sồr, broă dong kờl bơh Đảng dê, mờ cau să tờm tơn lơh jăt ngan ngồn, geh broă rơndăp lơh nàng lam lơh jăt tàm ƀòn lơgar tiah làng bol ƀòn lơgar he dê. Ƀươn dơ̆ 2 tai là gŏ là bơh broă lơh bơ̆t bơtàu Đảng den kung neh tơnguh uă mờ tam gơl geh gùng dà broă lơh, gơnoar broă lam bồ bơh Đảng dê, kwơmàng là gơnoar broă kwang bàng Ƀí thư dê tàm ƀòn lơgar tiah làng bol ơm kis.

Bơh ală cồng nha bơh sơnrờp bơh broă lơh jăt broă lơh tơrgùm gơs dùl gơnoar Ƀí thư Ci ƀộ ăt tơn gơnoar broă kwang ătbồ thôn mờ Bí thư Ci ƀộ ăt tơn gơnoar broă Kwang ătbồ Mpồl lơh broă Mặt trận thôn, Huyện ủy kơnhoàl Sa Thầy gam pơn jăt tai jăt sền, sồr ngan, lòt sền mơkung geh bơta tam gơl di tŭ nàng ală cau geh “Làng bol pin dờn, Đảng sồr lơh” lơh jăt niam gơnoar broă, kơnòl broă he dê. Bè jŏ jòng Huyện ủy kơnhoàl Sa Thầy rơ̆p sùm kờp sền, sền swì bồ tơngoh gĭt wă, bơta pràn jak, bơngă pin dờn bơh mpồl kwang bàng tàm thôn, ƀòn dê, đảng viên tàm ală ci ƀộ dê nàng săc rwah kwang bàng; sền gròi broă tề lam, tơnguh uă bồ tơngoh gĭt wă, bơta pràn jak mờ geh broă dong kờl dipal nàng mpồl cau do in iang nùs lơh broă. Kờp bal jơh gùt càr Kon Tum neh geh 360 tàm kờp jơh 756 thôn, ƀòn, mpồl làng bol ơm kis geh Ƀí thư Ci ƀộ ăt tơn gơnoar broă Kwang ătbồ thôn, kwang ătbồ mpồl làng bol ơm kis mờ Ƀí thư Ci ƀộ ăt tơn gơnoar broă Kwang ătbồ Mpồl Lơh broă Mặt trận thôn. Broă tơrgùm dùl 2 gơnoar broă pơgồp bơnah tơrmù uă ngan mpồl kwang bàng lơh broă sa priă nhai da lơgar tàm ală thôn, ƀòn dê.