Hìu nhă lŏ Vũ Thị Thúy tàm thôn Ea Bring, xã Băng Adrênh, kơnhoàl Krông Ana gơtìp uă ngan kal ke. Bơklao sùm gơtìp kòp tê jê să, să tờm lŏ ờ geh broă lơh kơ̆ kơl jăp, den tàng rài kis gơtìp ờ tơl sùm. Nam 2021, hìu lŏ Thúy geh Ủy ƀan Mặt trận Dà lơgar Việt Nam kơnhoàl Krông Ana dong kờl 50 tơlăk đong nàng lơh hìu ơm tam klăc dờng. Bal mờ priă càn, broă dong kờl ngai lơh broă bơh ală cau kis tàm ƀòn lơgar dê, hìu geh lơh rơlao 100 tơlăk đong neh geh lơh gơs. Tơnơ̆ mờ tŭ geh hìu ơm kơ̆ kơl jăp, lŏ Thúy neh càn tai priă sa priă cồng ờ uă bơh ngân hàng cíñ sác xã hội nàng tă blơi phan ngui tàm broă lơh sa, sơntìl phan tam phan ròng nàng rề ơnàng broă ròng phan. “Bàr nă ùr bơklao kờñ lơh geh hìu ơm, mơya hìu nhă gơtìp kal ke ngan. Geh đah Mặt trận bal mờ ală mpồl lơh broă dong kờl hìu nhă añ tă geh khà priă nàng lơh gơs dùl nơm hìu dờng kloh niam, tơnơ̆ mờ hơ̆ añ kung geh broă dong kờl bơh mpồl cau ùr, mpồl cau ùr neh dong kờl añ dùl khà priă nàng ròng phan. Añ neh dan lik klàs hìu rơƀah nàng ai wơl ală hìu cau ndai in, tài añ neh dờp geh broă dong kờl uă ngan, añ ưn ngài”.

Ồng Lãnh Như Biểu, kis tàm ƀòn Ea Pri, xã Ea Wer, kơnhoàl Buôn Đôn kung là cau geh ơm kis tàm hìu tam klăc dờng tơnơ̆ mờ uă nam rơƀah gơtìp kal ke. Tàm hơ̆ uă ngan là bơh tŭ gơtìp rềs àr kơnàs còng, bơta pràn kơl dang să jan gơmù, hìu tam klăc dờng geh lơh kơ̆ kơl jăp, ram, sơlơ kwơ màng gơwèt mờ ồng: “Lài do kis tàm hìu dềt, hăt, sèt tài gơtìp kal ke ir den tàng ờ jai lơh geh hìu, den tàng tŭ mìu nhàc den gơtìp ñhăt, tŭ do đah Mặt trận dong kờl lơh hìu do den añ ưn ngài ngan đah Mặt trận, ưn ngài uă ngan”.

Ồng Mai Tri Phúc, Phó Củ tịc Ủy ƀan Mặt trận Dà lơgar Việt Nam kơnhoàl Buôn Đôn pà git, tàm kơnhoàl geh 18 jơi bơtiàn ơm kis bal, tàm hơ̆ jơi bơtiàn ờ gal cau geh rơlao 47%. Lơh sa kơnhoàl dê mìng là lơh sa suơn sre, mơya tài ù tiah geh is ờ niam, ù klàr, den tàng rài kis bơh làng bol gơtìp uă ngan kal ke, hìu rơƀah geh uă, khà hìu ờ hềt geh hìu ơm kơl jăp kung gam uă. Ală nam do Ủy ƀan Mặt trận Dà lơgar Việt Nam kơnhoàl Buôn Đôn neh tơnguh broă mblàng yal, lam sồr nàng lơh tŭ geh nùs nhơm kờñ lơh bal, bal mờ broă dong kờl bơh gùt mpồl bơtiàn dê nàng dong kờl ală cau rơƀah, cau gơtìp kal ke tàm kơnhoàl in geh tai ală hìu ơm niam, kơl jăp: “Geh uă ngan làng bol kung rơƀah, den tàng broă kờñ tơmù hìu sèt den kal ke ngan, priă den ờ tơl. Nam lơi bol añ kung di tàm nhai 11 là Nhai lơh broă tài cau rơƀah in nàng lơh geh broă lơh nàng tơnguh jơnau mblàng yal mờ lam sồr jơh gùt mpồl lơh broă cíñ trị tus bal nàng lơh bè lơi tă geh priă uă ngan”.

Kơnờm mờ broă tus bal bơh ală làng bol bal mờ mpồl bơtiàn mpồl lơh sa kă bro, bơh nam 2021 tus tŭ do, càr Dăk Lăk neh lam sồr tă geh mờr 60 tơmàn đong. Bal mờ rơlao 7  tơmàn đong bơh Kes priă “Tài cau rơƀah” geh Dà lơgar bal mờ ală càr ndai dong kờl càr Dăk lăk, tŭ do neh geh 1 rơbô 138 nơm hìu tam klăc dờng neh geh lơh mờ lơh niam wơl; 173 hìu geh dong kờl priă blơi phan lơh broă, sơntìl phan tam, phan ròng… Kơnờm mờ hơ̆ tơngai bơh nam 2021 tus 2023 khà hìu rơƀah tàm càr Dăk Lăk neh gơmù bơh 1,64 tus 1,81% tàm 1 nam, tàm hơ̆ khà hìu rơƀah tàm jơi bơtiàn ờ gal cau gơmù bơh 3,33% tus 3,66%. Ồng Y Giang Gry Niê Knơng, Củ tịc Ủy ƀan Mặt trận Dà lơgar Việt Nam càr Dăk Lăk pà git: “Broă đơng lam bơh kấp ủy ală kấp, hơ̆ sồng mpồl đảng mờ kwơ màng là broă pơgồp bal bơh gơnoar atbồ mờ uă ngan là broă tus bal bơh gùt làng bol dê nàng lơh gơs hìu tam klăc dờng ai làng bol in. Hìu pa lơh geh geh kwơ màng ngan gơwèt mờ hìu rơƀah, ai geh bơta pràn nàng cau rơƀah in bơtàu tơnguh lơh sa tơnơ̆ do; dơ̆ bàr tai là kung ai làng bol in gŏ broă dong kờl bơh Dà lơgar dê tàm broă tơn jơh jơgloh tơmù rơƀah, tus bal mờ broă lam lơh bơh Cíñ phủ dê den càr Dăk Lăk kung lam lơh broă lơh hìu ai cau rơƀah in tàm tơngai tus”.

Ală hìu “Tam klăc dờng” niam nùs nhơm geh lơh gơs ai ală hìu rơƀah tàm càr Dăk Lăk là phan pà geh kwơ ngan bơh ală kấp, gơnoar atbồ bal mờ broă tus bal bơh gùt mpồl bơtiàn ai hìu rơƀah, hìu kal ke bè hìu ơm in. Hơ̆ là jơnau pơn dờn pơn điang dờng màng ngan, cèng geh nùs nhơm chờ hờp, gơboh gơbài, dong kờl hìu rơƀah iang nùs lơh broă sa, bơtàu tơnguh lơh sa hìu nhă, lik klàs mờ rơƀah kơl jăp.