Ồng Y Đheh Ayun là kra ƀòn, nam do 65 sơnam, kòn cau Rơđê ơm tàm ƀòn Phơng, xã Ea Tul, kơnhoàl Cư Mgar, càr Dăk Lăk mŭt Đảng bơh tŭ 25 sơnam. Ồng geh làng bol tàm ƀòn jơh nùs pin dờn dòn jăt tài bơh ồng sùm bơr đơs gơ lòt bal mờ tê lơh. Tàm ƀòn, dilah hìu bơnhă lơi tìp kal ke bè lơh sa ồng ñă ntàu tai hòi jà, dong kờl bè priă jền mờ bơto pơlam broă lơh sa. Tàm ală dơ̆ pơrjum ƀòn, ồng Y Đheh Ayun kung lời uă tŭ jiơ đơs bè ală broă lơh niam, broă lơh pa mờ làng bol tàm ƀòn gơtùi đòm jăt nàng bơtàu tơnguh lơh sa hìu bơnhă. Să tờm ồng kung sùm pơgồp bal mờ kâp ủy, gơnoar ătbồ xã tă pơgồp jơnau đơs ai Ƀí thư Ci ƀộ in bè broă lơh gĭt bơta lơngăp lơngai rơndăp tăp sèng tàm ƀòn lơgar. Ồng Y Đheh Ayun, đơs: Bơh lài tus tŭ do, làng bol tiah jơi bơtiàn dồ êt nă cau tàm ƀòn Phơng đơs bal là ờ gŏ cau lơi jăt ờ gŏ cau lơh iăt jơnau bơchồt bơh bol iơh dê, nàng sơmờm làng bol jơi bơtiàn dồ êt nă cau tàm do. Dơ̆ 2 tai là mblàng yal là làng bol bol he pal prăp gàr bơhiàn niam chài ờs mờng bơh yau bơh làng bol kòn cau Rơđê ơm kis bơh jŏ dùl bă tiah dê.

Gơ wèt mờ ồng Y Ngôn Knul, ơm tàm ƀòn Tria, xã Ea Tul, kơnhoàl Cư Mgar, càr Dăk Lăk 30 nam là đảng viên Đảng Kộng sản Việt Nam sùm bơto tơngkah ồng bè gơnoar broă lơh krơh mờ lam lài tàm broă lơh jăt niam jơnau sồr, gùng dà bơh Đảng dê, broă dong kờl mờ adat boh lam bơh Dà lơgar dê. Pah ngai, ồng Y Ngôn Knul kung gam sùm lòt tus tơl hìu tàm jơi nòi nàng kờñ gĭt broă gơlik geh, jơnau kơlôi sơnơng, bơta kơ̆p kờñ, nùs nhơm, bơto tơngkah, bơto sồr oh kòn, kòn sau tàm jơi nòi he dê lơh jăt adat boh lam, ờ gŏ di lơh tìs ală jơnau ờ niam tàm mpồl bơtiàn. Ờ mìng bè hơ̆ lơm, ồng Y Ngôn Knul gam là cau pơnrơ tàm broă lơh mblàng yal, hòi jà làng bol tam klăc bal, tàm kờñ gơboh bal dong kờl ƀòn lơgar. Ồng Y Ngôn Knul, đơs: Tàm tơngai lài, bol hi neh bơyai lơh mblàng yal ai làng bol tàm ƀòn Tria in, ngan là bơyai lơh tơrña bơyai bàr pe dơ̆ tàm gơjrañ tàm hìu bơnhă, bè ùr bơklau, oh kòn tàm hìu bơnhă tam lah tàm gơjrañ. Lài mờ tŭ tơrña bơyai den bol hi kung lòt lùp sơl nàng kờñ gĭt ală jơnau bơh tài bè lơi mờ gơbàn, jơnau bơh tài bè lơi gơlam tus bơta tàm gơjrañ tàm hìu bơnhă. Jăt tàm ală bơta hơ̆ den bol hi geh gùng, broă lơh nàng tơrña bơyai. Đơs bal ală dơ̆ broă bol hi ndrờm bơsong tơrña bơyai sền bal niam.

Jăt ồng Lê Quang Bất, Củ tịc Ủy ƀan Ñân zân xã Ea Tul, kơnhoàl Cư Mgar yal, tàm ală ƀòn kòn cau Rơđê dê, kra ƀòn là cau geh bơngă pin dờn nàng gàr sùm bơta rơndăp tăp sèng mpồl bơtiàn bơh ƀòn lơgar dê. Ngai do, bal mờ gơnoar broă là đảng viên, khi geh uă tă pơgồp kwơmàng, là dang tê tò jòng bơh gơnoar ătbồ dê tàm mblàng yal broă dong kờl, adat boh lam, lòt lài tàm tŭ lơh jăt jơnau sồr, sền gàr bơhiàn niam chài krơi is, pơgồp bơnah kơ̆ kơl jăp rài kis mờ lơngăp lơngai ƀòn lơgar. Ồng Lê Quang Bất, đơs: Kra ƀòn mờ cau geh bơnhă pin dờn là cau geh jơnau đơs kwơmàng ngan tàm tiah làng bol jơi bơtiàn dùl êt nă cau. Khi geh gùng mblàng yal is nàng làng bol in pin dờn tàm bơta đơng lam bơh Đảng, Dà lơgar dê kung bè broă dong kờl, adat boh lam bơh Dà lơgar dê. Pơgồp bơnah kơ̆ kơl jăp bè lơh sa mpồl bơtiàn tàm ù tiah xã dê tàm tơngai pa do.

Nàng pơn jăt tai lơh niam gơnoar broă kra ƀòn, cau geh bơngă pin dờn tàm ƀòn lơgar ală jơi bơtiàn tàm tiah he dê, mò Nay H’Nan, Phó Ƀí thư Duh broă sùm Huyện ủy kơnhoàl Cư Mgar, càr Dăk Lăk, pà gĭt: Cau geh bơngă pin dờn là cau lơh kòn gùng rơ̆p mblàng yal ală jơnau yal, broă dong kờl, kơrnoăt boh lam bơh Đảng, Dà lơgar dê tus mờ làng bol in. Khi là ală cau geh kâp ủy kung bè gơnoar ătbồ bơyai lơh bơto pơlam, bơsram ală bơta gĭt wă nàng bơh hơ̆ să tờm khi tơnguh uă bơta gĭt wă nàng bơh hơ̆ mblàng yal làng bol tàm ƀòn lơgar geh cau bơngă pin dờn ơm kis in. Bơh hơ̆ nàng hòi jà làng bol lơh jăt ală broă dong kờl tàm bơtàu tơnguh lơh sa- mpồl bơtiàn, sền gàr lơngăp lơngai rơndăp tăp sèng, bơ̆t bơtàu rài kis niam chài pa, bơh hơ̆ gàr geh bơta bơtàu tơnguh tàm ƀòn làng bol jơi bơtiàn dồ êt nă cau ơm kis.

Dăk Lăk tŭ do geh 942 nă kra ƀòn mờ cau geh bơngă pin dờn tàm ală ƀòn làng bol jơi bơtiàn dùl êt nă cau. Do là mpồl cau geh tă pơgồp kwơmàng tàm broă lơh bơ̆t bơtàu Đảng, gơnoar ătbồ, ală anih lơh broă cíñ trị ƀòn lơgar; dong kờl bơtàu tơnguh lơh sa- mpồl bơtiàn, sền gàr rài kis niam chài ală jơi bơtiàn tàm ƀòn lơgar.