Tàm càr Sơn La, càr geh rlau 1 tơlak 300 rbô nă làng bol, tàm hơ̆ jơi bơtiàn dồ êt nă cau geh rlau 83% khà kờp làng bol, gơnoar broă mờ mpồl ùr kwang bàng jơi bơtiàn dồ êt nă cau lòt bal, tam pà bal, àñ ơnòng bal kơnòl broă bal mờ kwang đơng lam bồ ală tiah geh tơngŏ loh làng ngan. Bơta mùl gŏ is tàm càr Sơn La là tơrgùm ai bơtàu tơnguh lơh broă sa sươn sre ngui măy mok pa, lơh broă sa sươn sre sàng goh, lơh broă sa sươn sre hữu kơ. Cau ùr geh gơnoar broă kwơmàng tàm jơh ală kơnòl broă mờ càr Sơn La gam lam lơh. Jăt ồng Lưu Minh Quân, Kwang ătbồ Mpồl Hòi jà làng bol Tỉñ ủy càr Sơn La dê đơs, càr sùm sền gròi dong kờl ai broă lơh kwang bàng in, ngan là ùr kwang bàng. Khà ùr kwang bàng Quôk hội, ùr kwang bàng Hội đồng Ñân zân, khà ùr kwang bàng lơh broă tàm kâp ủy, khà tơmŭt đảng viên là cau ùr...ndrờm jơnhoa rlau pơndờm mờ tơngai lơh broă lài. Mìng is khà ùr đảng viên geh tơmŭt đảng bơh sơnrờp tơngai lơh broă tus tŭ do gơguh tus rlau 42% kờp jơh khà đảng viên pa tơmŭt đảng. Pà gĭt bàr pe cồng nha tàm broă lơh ring bal ùr klau mờ tơnguh uă gơnoar broă mờ cau ùr dê tàm tiah do, ồng Lưu Minh Quân, đơs: Broă tờm tàm càr Sơn La, hơ̆ là broă kwang đơng lam bồ sồr lơh pràn broă lơh dong kờl cau ùr tơrmù rƀah kơ̆ kơl jăp bơh broă lơh lơh sa càr dê. Sơn La là 1 tàm 14 càr bơh jơh gùt lơgar dê lơh sră dan mờ Mpồl kâp dà lơgar ngui măy mok tàm ătbồ mpồl tềm pềr càn priă nàng kờñ tơnguh uă cồng nha lơh broă gơdờp mờ jơnau sồr pa. Sơn La kung neh lam lơh jăt Broă rơndăp lơh dong kờl cau ùr bơsram broă lơh, lơh geh broă lơh ai rlau 9 rbô 700 nă oh mi cau ùr in. Lơh pràn ală srơh tàm pơrlòng bơ̆t bơtàu cau ùr Việt Nam rài pa, lơh broă sùm 651 broă lơh, 2 rbô 818 nă cau pơnrơ bal mờ 1 rbô 292 nă cau ùr lơh geh sră jờng rơ cau ùr Việt Nam rài pa.

Tàm càr Lai Châu, jăt ồng Vũ Mạnh Hà, Kwang bàng rơcăng lài Đảng Dà lơgar, Phó Ƀí thư Tỉñ ủy càr Lai Châu, yal: càr Lai Châu neh sền gròi ngui niam gơnoar broă, broă lơh cau ùr dê, broă lơh cau ùr mờ broă ring bal ùr klau. Tàm hơ̆ geh ală Kơrnoăt, ală jơnau lơh nền bè bơtàu tơnguh lơh sa tiah làng bol jơi bơtiàn dồ êt nă cau geh gơdờp tơn tus cau ùr, kơnòm dềt tiah làng bol jơi bơtiàn dồ êt nă cau. Mùl màl, Tỉñ ủy càr Lai Châu neh geh Kơrnoăt sồ 06 ngai 15/03/2021 bè tơnguh uă cồng nha mpồl kwang bàng đơng lam bồ, cau ătbồ là cau jơi bơtiàn dồ êt nă cau mờ kwang bàng tờm ală kâp xã tơngai lơh broă bơh nam 2021- 2025, pơlam gùng tus nam 2030; Jơnau sồr sồ 09 nam 2021 bơh Mpồl Lơh kơnòl broă sùm Tỉñ ủy càr Lai Châu dê bè sơlơ tơnguh tai bơta lam bồ bơh kâp ủy Đảng dê gơ wèt mờ broă tơrmù ƀà bơta bau gờñ mờ bau mờ cau rềp jơi nòi bal; broă rơndăp lơh dong kờl cau ùr sơnđờm mŭt lơh broă; ai lơh jăt broă dong kờl gơ wèt mờ ùr lơh broă, broă dong kờl deh dùh, sền gàr pràn kơldang să jan, ƀảo hiểm xã hội, deh dùh di kơrhia tàm hìu bơnhă, sền gàr gơnoar mờ bơta kwơ bơh cau ùr dê tềng đăp adat boh lam...Ồng Vũ Mạnh Hà, đơs: Broă dong kờl rơcăng lài bơto bơtê mờ tề lam ùr kwang bàng bơh 5 nam den cồng nha lơh geh bàr pe broă: lài ngan là bơta gĭt wă, kơnòl mờ broă lơh bơh kâp ủy gơnoar ătbồ bơh jơh gùt mpồl bơtiàn dê, tàm hơ̆ să tờm cau ùr bè gơnoar broă, broă lơh bơh cau ùr dê mờ broă lơh cau ùr tàm bơta pa geh uă bơta gơ tam gơl niam ngan. Dơ̆ bàr là bè broă ring bal ùr klau tàm jơh ală gah broă: cíñ trị, lơh sa, niam chài mpồl bơtiàn lơh geh ală cồng nha gơguh jak. Mpồl ùr kwang bàng đơng lam bồ ătbồ ai ală anih lơh broă, ală tiah in gơguh jơh bal bè khà mờ cồng nha lơh broă.

Mò Tôn Thị Ngọc Hạnh, Phó Củ tịc Mpồl Tam klăc Cau ùr Việt Nam pà gĭt, đơs dồ êt bè cồng nha lơh jăt broă lơh cau ùr, neh lơh geh uă cồng nha niam ngan mờ tam gơl mpờl gŏ loh làng ngan tàm bơta gĭt wă. Kơnòl bơh ală kâp, ală gah, ală tiah dê tàm tơngai pa do kung sơlơ tơnguh tai. Mờ, bơh geh bơta sền gròi uă ngan, cau ùr ngai sơlơ tus bal lơh uă rlau tàm ală gah broă bơh rài kis mpồl bơtiàn dê, đơs nền geh gơnoar broă, bơngă pin dờn mờ bơta pràn bơceh lơh, tă pơgồp tàm ală cồng nha lơh geh bal bơh ală tiah dê kung bè bơh jơh gùt lơgar dê. Bulah bè hơ̆, bơta tam cah bè ùr klau ală bơta kal ke bè niam chài, broă dong kờl, kung gam sơl gơrềng uă tus bơta bơtàu tơnguh bơh cau ùr dê. Pơn jăt tai sền gròi tus broă lơh cau ùr mờ broă lơh jăt broă dong kờl tàm mpồl cau ùr krơi is tàm tơngai tŭ do rơ̆p là bơnàng jă bơh sơnrờp tơnguh uă gơnoar broă bơh cau ùr  dê kung bè lơh jăt broă lơh ring bal ùr klau tàm jơh ală gah broă cíñ trị, lơh sa- mpồl bơtiàn, niam chài. Mò Tôn Thị Ngọc Hạnh, pà gĭt: Gơ wèt mờ broă lơh jăt ală broă dong kờl bal gơ wèt mờ mpồl cau ùr krơi is, lài ngan tŭ do ală broă dong kờl adat boh lam nàng kờñ sền gàr gơnoar bơh cau ùr dê ngai sơlơ geh lơh sir, broă dong kờl bè sền gàr lơngăp lơngai rài kis mpồl bơtiàn neh geh lơh tàm làm gùt jơh ală tiah. Dong kờl ală mpồl cau bè cau ùr jơi bơtiàn dồ êt nă cau, cau ùr kwĕt kơlte, cau ùr ntrờn ơm kis, cau ùr dờng sơnam...mùl màl broă dờp lèng mờ cồng nha lơh jăt broă dong kờl kung gam sơl uă broă pal sền gròi.

Cồng nha broă lơh cau ùr tàm tơngai pa do neh ngai sơlơ dong đơs nền gơnoar broă dờng màng ngan bơh mpồl ùr kwang bàng dê. Broă lơh jăt broă dong kờl gơ wèt mờ ală mpồl cau ùr krơi is tiah đah tô dà lơgar tàm tơngai lài dồ dơ̆ tai đơs nền bơta sền gròi, sồr lơh kràñ cê jơh nùs bơh kâp ủy, bơta mŭt lơh bal dồ ròt bal, bơta jơh nùs bơh ală kâp, ală gah lơh broă, ală mpồl cau dê gơ wèt mờ broă lơh cau ùr; kwơmàng là bơta rơcăng lài, bơceh lơh mờ jăt thàn mhar mờ jơnau sồr tàm rài kis mùl màl bơh ală broă lơh Mpồl dê tàm tơngai pa do.