Pơgăp mờ do tòm 60 nam, ngai 15/4/1965, Kwang đơng lam Kwang àng làng bol phàu crong (tŭ do là Kwang đơng lam Mpồl ling sền gàr tiah nhàr lơgar neh trờn bàr pe nă kwang bàng geh uă mờng chài rơ̆ ru bơh ală càr tiah đah Tô Dà lơgar mut dong kờl ai càr Gia Lai in. Tus nhai 7 dùl nam bal, Mpồl Lơngăp lơngai phàu crong càr Gia Lai geh bơyai lơh dồ ròt bal tàm jơh bal 3 kấp, lam lơh geh cồng nha ală broă lơh gơ sơ̆t bol sò tơm jơh bơsak, bol blơ̆ blăc, sền gàr làng bol, koh tăc lòs, ai geh gơnoar lơh tờm. Tàm sùm 10 nam lài mờ ngai tơngklàs tiah đah Jum Dà lơgar, mpồl do neh tus bal tơn gĭt nđờ rơhiang dơ̆ tam lơh dờng dềt, gơ sơ̆t mờ lơh sồt să gĭt nđờ rơhiang nă bol sò tơm, pơgồp bơnah bal mờ ling klàng làng bol jơh gùt lơgar tơrgùm dùl Dà lơgar.

Tơnơ̆ nam 1975, Mpồl ling sền gàr tiah nhàr lơgar càr Gia Lai pơn jat tai kơ̆ dơn nùs nhơm sền gàr gơnoar tờm tiah nhàr lơgar Dà lơgar, pơn rơ ngan là ală tă pơgồp tàm rài tam lơh dră wơl mờ ling Khmer Đỏ. Tŭ do, Mpồl ling sền gàr tiah nhàr lơgar càr gam atbồ rlau 80 kơi sồ gùng tiah nhàr lơgar rềp nhàr bal mờ càr Rattanakiri (lơgar Campuchia), tàm ù tiah geh 7 sàh gơwèt 3 kơnhoàl tiah nhàr lơgar. Tàm bơta kal ke, kwang bàng, cau ling Mpồl ling sền gàr tiah nhàr lơgar càr Gia Lai kung gam lơh sir jak ngan kơnòl “2 dơ̆”, sền gàr kơ̆ kơl jăp lơngăp lơngai tiah nhàr lơgar jài, mơkung jơh nùs tus bal bơtàu tơnguh lơh sa- mpồl bơtiàn tàm tiah do dê tai.

Bơh uă broă lơh nùs nhơm niam bè “Dong kờl oh lòt bơsram”, “Hìu ơm ram mhŭ ai cau rƀah tiah nhàr lơgar”, “Kơnrồ dra ai cau rƀah in”... mpồl ling sền gàr tiah nhàr lơgar neh pơgồp bơnah tam gơl broă lơh sa ai làng bol kòn cau in, bơt bơtàu broă jơh gùt làng bol sền gàr tiah nhàr lơgar kơ̆ kơl jăp, pràn kơl dang, lơh kơ̆ kơl jăp rlau tai bơta pin dờn đah ling klàng mờ làng bol tiah nhàr lơgar.

Di dơ̆ do, Gah đơng lam Mpồl ling sền gàr tiah nhàr lơgar càr Gia Lai chờ hờp dờp rò Gai lòng Sền gàr Dà lơgar khà 2 bơh Củ tịc lơgar dê jàu pà tài ală tă pơgồp dờng màng tàm broă sền gàr gơnoar tờm, lơngăp lơngai tiah nhàr lơgar. Củ tịc  Anih duh broă Làng bol càr kung pà Sră jờng rơ ai 6 mpồl cau mờ 9 nă cau dồ nă să pơn rơ jak geh uă tă pơgồp jak ngan tàm broă lơh sền gàr Dà lơgar. Thượng tá ồng Ngôn Ngọc Cương, Lam bồ Pôs đồng Ling sền gàr tiah nhàr lơgar Ia Puch, kơnhoàl Chư Prông- dùl tàm ală cau dồ nă să chờ hờp ngan geh pà Sră jờng rơ đơs: “Să tờm añ chờ hờp ngan geh Anih duh broă Làng bol càr pà sră jờng rơ di dơ̆ tơngkah kir sơnrai 60 nam. Tàm tơngai tus añ rơ̆p bal mờ mpồl cau, kấp ủy, Đảng ủy Mpồl đơng lam pôs đồng dê tơrgùm đơng lam, sồr mpồl ling lơh sir niam ngan kơnòl broă sền gàr gơnoar tờm lơngăp lơngai tiah nhàr lơgar Dà lơgar dê. Jơh nùs lơh ngan kràñ cê jơh nùs tơrgùm đơng lam, sồr kwang bàng, cau ling sơlơ tơnguh tai ală broă lơh lòt sền, sền gàr tiah nhàr lơgar. Mblàng yal hòi jà làng bol lơh jat niam gùng dà broă lơh bơh Đảng, adat boh lam bơh Dà lơgar dê”.

Đơs tàm dơ̆ tơngkah kir sơnrai, Thiếu tướng ồng Nguyễn Đức Mạnh, Phó Kwang lam bồ Mpồl ling sền gàr tiah nhàr lơgar jờng rơ mờ gờm chờ ală cồng nha lơh geh, cồng nha mờ ală rơnàng kwang bàng, cau ling Mpồl ling sền gàr tiah nhàr lơgar càr Gia Lai dê neh lơh geh tàm 60 nam bơt bơtàu, tam lơh mờ tào dờng. Ồng đơs nền, bơh tơl tơngai kah yau dê, Mpồl ling sền gàr tiah nhàr lơgar càr sùm geh lơh kơ̆ kơl jăp rlau tai bè rơndăp broă, bơt bơtàu pôs đồng, anih kơ̆ kơl jăp, yờ tơnguh uă bơta pràn jak mpồl kwang bàng nàng lơh geh jơnau sồr kơnòl broă tàm bơta pa.

Tàm dơ̆ tơngkah, ồng Hồ Văn Niên, Kwang bàng Đảng Dà lơgar, Ƀí thư Tỉñ ủy càr Gia Lai đơs cih dờp mờ jờng rơ uă ngan gơnoar bơh Mpồl ling sền gàr tiah nhàr lơgar càr dê tàm broă lơh tam lơh mờ bơt bơtàu, sền gàr tiah nhàr lơgar Tây Nguyên. Đơs nền Mpồl ling sền gàr tiah nhàr lơgar càr Gia Lai neh lơh jat niam gơnoar tờm tàm atbồ, sền gàr gơnoar tờm, lơngăp lơngai tiah nhàr lơgar Dà lơgar, sền gàr lơngăp lơngai rơndăp tăp sèng tiah nhàr lơgar, pơgồp bơnah bơtàu tơnguh lơh sa- mpồl bơtiàn tàm ală ƀòn lơgar tiah sar lơgar ngài.

Ƀí thư Tñ ủy càr Gia Lai sồr tàm tơngai tus, Đảng ủy, Gah đơng lam Mpồl ling sền gàr tiah nhàr lơgar càr pơn jat tai pơgồp bal niam mờ ală gah broă, mpồl lơh broă geh gơnoar bơh càr mờ mpồl sền gàr tiah nhàr lơgar Campuchia lam lơh ală broă lơh bơt bơtàu gùng tiah nhàr lơgar ring lơngai, lơh bơyô bal, lơh broă bal, bơtàu tơnguh kơ̆ kơl jăp; sơlơ tơnguh tai broă lơh mblàng yal, bơto bơtê, yờ tơnguh uă bơta gĭt wă bơh kwang bàng, đảng viên mờ làng bol dê bè sền gàr gơnoar tờm tiah nhàr lơgar mờ tiah, gơnoar bơh mpồl ling sền gàr tiah nhàr lơgar dê tàm rài pa.