Xã Trà Mai, kơnhoàl Nam Trà My, càr Quảng Nam geh 4 thôn mờ 15 tiah làng bol ơm kis. Jơh gùt xã geh rlau 1 rơbô 200 hìu bơnhă, rlau 5 rơbô nă cau, tàm hơ̆ mờr 80% là làng bol jơi bơtiàn dồ ết nă cau. Rlau 2 nam do, priă bơh ală rơndăp broă lơh gơwèt Broă lơh Jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm neh dong tiah do in bơtàu tơnguh. 100% hìu bơnhă tàm ù tiah xã dê geh ngui gùng che ồs đèng; jơh ală hìu bơsram tàm ù tiah xã dê lơh geh jơnau kờñ Dà lơgar kấp độ I. Rài kis làng bol tàm tiah kơh bơnơm geh tam gơl loh làng, priă lơh geh kờp bal tơl nă cau lơh geh mờr 38 tơlak đong dùl nă cau dùl nam. Ồng Nguyễn Thanh Út, làng bol kòn cau Ca Dong, Phó Bí thư Thường trực Đảng ủy xã Trà Mai, kơnhoàl Nam Trà My pà gĭt, xã sùm jàu kơnòl broă ai kwang bàng in lòt tus tàm thôn, ƀòn dong kờl làng bol tàm tiah do in lam lơh geh cồng nha ală rơndăp boă lơh gơwèt Broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm. Ồng Nguyễn Thanh Út, đơs: “Bol añ jàu kơnòl broă ai ală kwang bàng in là cau jat sền tơn tàm hơ̆. Dilah geh ală bơta kal ke kòl yan lơi hơ̆ den yal ai Lơh broă sùm Đảng ủy xã in. Tàm Mpồl Lơh kơnòl broă sùm rơ̆p cribơyai tă bơsong ală bơta kal ke kòl yan nàng lơh jat. Gơwèt mờ Ci ƀộ thôn den tàm pah nam ndrờm geh broă lơh mut lơh bal jơh lơm”.

Rlau 2 nam do, Cíñ phủ neh ai lơh jat uă gùng dà broă lơh, broă lơh pa nàng tă bơsong bơta kal ke kòl yan bè gah sră nggal, adat boh lam tàm broă atbồ, lam lơh jat Broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm. Mơya, tŭ do kung gam bàr pe tơngume pal pơn jat tai tam gơl. Ngan là, 10 rơndăp broă lơh bơnah phan bơh Broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm dê geh uă rơndăp broă lơh tơngume mờr gơlơh bè ndrờm bal, kal ke lam lơh. Bè Rơndăp broă lơh sồ 1: Bơsong bơta ờ tơl ù ơm, hìu ơm, ù lơh sa, dà ngui sa pah ngai mờ Rơndăp broă lơh sồ 2: Rơndăp ù tiah, rơndăp tăp sèng, kơ̆ kơl jăp làng bol ơm kis tàm ală tiah kờñ pal geh.... geh tơngume, jơnau kờñ mờ cau gơ lơh bè ndrờm bal. Uă tiah dan mờ Cíñ phủ tam gơl wơl, lơh niam wơl ală rơndăp broă lơh geh bal tơngume nàng tơrgùm priă jền bơcri lơh. Bơdìh hơ̆, geh uă anih lơh broă lơh bal, uă tơngume tàm rơndăp rơndồl đah kấp càr, kấp kơnhoàl mờ kấp xã. Pơn yơu bè Rơndăp broă lơh sồ 8; Lơh jat ring bal ùr klau mờ bơsong ală broă jal mhar gơwèt mờ cau ùr bal mờ kơnòm dềt, geh 3 anih lơh broă lơh jat bal là Mpồl cau ùr, Đoàn Ơruh pơnu mờ Anih lơh broă Jơi bơtiàn. Làng bol dùl dơ̆ lơh broă mờ uă anih lơh broă roh uă tŭ tơngai mờ ờ geh cồng nha tai. Jat Củ tịc Ủy ƀan Ñân zân kơnhoàl Nam Trà My, càr Quảng Nam Trần Duy Dũng đơs, khà sră nggal uă ir, ală tơngume tàm rơndăp rơndồl lơh kwang bàng kấp xã in kal ke gĭt, gơ lam tus nùs nhơm rơngòt lơh tìs tŭ lam lơh ală rơndăp broă lơh: “Bàr pe nă kwang bàng xã uă tŭ kơlôi sơnơng sră nggal ờ hềt loh làng, den uă tơngume sră nggal ờ di pal mờ bơta geh ngan, kal ke ngan lam lơh jat. Kơnhoàl neh bơsram lơh jat nùs nhơm ai kwang bàng in tơnguh uă nùs nhơm khin cha kơlôi, khin cha lơh, khin cha kong kơnòl. Mơya, nùs nhơm khin cha kơlôi, khin cha lơh pal jat jơnau cih ờ gŏ di là kờñ lơh bè lơi den lơh ờ. Lồi nam bol añ jat tàm cồng nha ai priă Dà lơgar nàng sền sơ wì, sền sơ wì kwang bàng, mpồl Đảng ƀòn lơgar mờ Đảng viên”.

Nam 2023, càr Quảng Nam geh tam pà mờr 1 rơbô 227 tơmàn đong lơh broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau. Tus jơh nhai 10 nam 2023, càr Quảng Nam neh ai priă Dà lơgar mờr 310 tơmàn đong, lơh geh mờr 50% broă rơndăp lơh nam dê; priă broă lơh ai priă dà lơgar mờr 5 tơmàn đong, lơh geh pơgap 10% broă rơndăp lơh. Mpồl Lơh kơnòl broă sùm Tỉñ ủy càr Quảng Nam jàu kơnòl broă ai kwang bàng, kwang đơng lam bồ in pah nhai lòt tàm ƀòn lơgar, jat sền broă lơh lam lơh jat ală rơndăp broă lơh, rcang tă bơsong kal ke kòl yan, lơh mhar tŭ tơngai ai priă dà lơgar. Phó Củ tịc Ủy ƀan Ñân zân càr Quảng Nam, Kwang atbồ Mpồl đơng lam ală broă lơh jơnau kờñ Dà lơgar càr Quảng Nam Trần Anh Tuấn, pà gĭt, càr do tơrgùm kờp sền wơl ală sră nggal gam tàm rơndăp rơndồl, kal ke kòl yan nàng dan mờ Dà lơgar in tă bơsong, mơkung rcang ai geh gùng dà broă lơh nàng dong kwang bàng in ƀuơn ngan gĭt mờ tơngume sră nggal. Phó Củ tịc Ủy ƀan Ñân zân càr Quảng Nam Trần Anh Tuấn, đơs:“Càr Quảng Nam geh dùl sră nggal tơrgùm bal dùl bă ngan ngồn, nền nòn gơwèt mờ tơl broă lơh jơnau kờñ Dà lơgar is. Rơ̆p cih dùl nơm sră nggal bơto pơlam bal ală mpồl tơngume dờng. Ai gơwèt mờ mpồl tơngume geh ngan tàm lam lơh jat ală broă lơh geh gơrềng tus ală Ƀộ, ngàñ rơ̆p geh dùl nơm sră nggal tơrgùm bal is. Mpồl đơng lam ală broă lơh jơnau kờñ Dà lơgar rơ̆p pơrjum nàng kờp sền wơl tơl broă geh ngan nàng gĭt nền broă lơh gam kal ke kòl yan, kòl yan gơ ơm tàm tiah lơi, tàm bơta lơi den rơ̆p mblàng lơh loh ngan ngồn mờ tơrgùm gơ gơs dùl sră nggal”.

Lơh mhar tŭ tơngai ai priă bơcri dà lơgar ai broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm, càr Quảng Nam đơng lam ală mpồl lơh broă, ală tiah geh jàu priă bơcri rcang lài “lơh gơ jal ngan”. Rơndăp broă lơh lơi neh geh bơto pơlam loh làng, ƀuơn lơh jat den tiah hơ̆ rơ̆p tơrgùm lam lơh gờñ, gàr niam lơh sir tŭ tơngai. Gơwèt mờ ală bơta kal ke kòl yan tàm uă rơndăp broă lơh, rơndăp broă lơh dềt ờ hềt geh tă bơsong, ală cau tờm bơcri priă bañ tàm tuh glài ai broă lơh, kơ̆p gơn Dà lơgar bơto pơlam mờ kờñ pal rcang lài jòi broă lơh nàng tă bơsong, lơh jat niam ală jơnau kờñ bơh rơndăp broă lơh dê.