Hìu bơnhă bi Bàn Thị Hằng là dùl tàm ală hìu bơnhă bơtàu tơnguh lơh sa jak bơh xã Quân Chu, kơnhoàl Đại Từ, càr Thái Nguyên dê. Kơnờm bơta tryăng tryồng, ờ ngòt kal ke, bàr nă ùr bơklau bi Hằng neh lơh gơtùi broă lơh tam chi sa plai mờ rlau 3 lồ prìt tiêu hồng, mờr 3 rbô tờm plai bung, pơ ồs mờ gơ àl, ai priă jền lơh geh sùm git nđờ rhiang tơlak đông pah nam. Bi Bàn Thị Hằng pà git, do kung là cồng nha bơh bơta ring bal, bơta tam pà bal bơh ùr bơklau bi dê bơh tŭ bau tus tŭ do: “Tàm rài kis hìu bơnhă, bơklau añ dê tam pà bal broă hìu bơnhă mờ broă lơh pah ngai. Den tàng, añ geh uă tŭ jơ nàng gròi sền ai să tờm he dê in”.

Bi Nguyễn Văn Dân, bơklau bi Hằng dê đơs: “Añ kơlôi sơnơng là he dong kờl pơ ùr in. Lơh jơh broă den rê tàm hìu rơp dong pơ ùr trŭ piang, lơh suơn, ală broă tàm hìu nàng dong ùr kòn. Añ gŏ bè hơ̆ den hơ̆ sồng he kis chờ hờp, gơboh gơbài”.

Ai gơ wèt mờ bi Nguyễn Thị Luyện ơm tàm xã Đồng Thịnh, kơnhoàl Định Hóa, càr Thái Nguyên đơs, bơta chờ hờp pah tŭ lơh jơh broă là broă hìu bơnhă mờ ròng siam oh kòn neh geh bơklau bi dê kơlôi rơcang jơh. Bulah deh mìng kòn ùr lơm, broă lơh sa bơtàu tơnguh, mơya hìu bơnhă bi kung ờ geh jơnau kờp dŭ rơp deh tai nàng jòi kòn klau. Bơta tàm sòr dong ùr bơklau bi kis gơboh gơbài, ală kòn gơ lòng sồr, bơsram jak den tàng uă nam sùm hìu bơnhă bi ndrờm geh khà jờng hìu bơnhă niam chài. Bi Luyện pà git: “Añ lơh pơgru mầm non, do là dùl broă krơi is, kung bòl ngan mơya bơklau añ dê tam pà bal broă mờ añ, tàm hìu den lơh ală broă bè lơh suơn sre, lơh broă hìu, ròng siam oh kòn den tàng añ chờ hờp ngan”.

Lài do tàm làng bol jơi bơtiàn dồ êt nă cau dùm geh bơta kơlôi sơnơng “sền dờng màng cau klau, sền ờ sơp cau ùr”. Ală bơhiàn bơh yau neh jŏ rài, lơh cau ùr gơ gơs là mpồl cau ờ sô. Nàng rơhời tam gơl bơta kơlôi sơnơng do, mò Dương Thị Thanh Luyến, Củ tịc Mpồl tam klac cau ùr kơnhoàl Đại Từ, càr Thái Nguyên pà git: “Bol hi kung sồr lơh ală broă lơh, geh ală broă lam lơh, pơn yơu ală broă lơh, ală mpồl rơcang sơndră lơh aniai cau ùr, kơnòm dềt, mpồl rơcang sơndră lơh pờng tàm hìu bơnhă; dong kờl cau ùr lơh ală hợp ták xã, ală mpồl lơh broă bal kơlôi sơnơng lơh bal, mpồl bơta kờñ bơh cau ùr dê nàng sơlơ bơtàu tơnguh lơh sa mpồl bal”.

Kờp tus jơh nam lài, khà cau ùr geh ƀằng thạk sĩ tàm kờp jơh khà cau geh ƀằng thạk sĩ bơh càr Thái Nguyên dê geh 54%. Khà cau ùr lơh kwang atbồ, lơh cau tờm mpồl lơh sa kă bro, hợp ták xã geh rlau 28%... Bơdìh hơ̆ tai, neh geh git nđờ rbô hìu bơnhă rƀah bơh cau ùr lơh tờm, lơh ngan brồ guh neh lik klàs rƀah, pơgồp bơnah tơrmù khà hìu bơnhă rƀah tàm ù tiah càr gơmù gam rlau 4%. Ồng Hoàng Văn Chính, Phó Kwang atbồ Ƀan Jơi bơtiàn càr Thái Nguyên đơs ngan: “Tơngai tus do, Ủy ƀan Jơi bơtiàn càr Thái Nguyên kung gam pơn jat tai tă pơgồp jơnau đơs ai kâp ủy mờ gơnoar atbồ tàm ƀòn lơgar bơh càr in là ală tiah pal jơh nùs, pơn jat tai sơlơ tơnguh tai mblàng yal bè ring bal ùr klau. Kuơmàng là ală tơngume neh geh cih tàm broă lơh jơnau kờñ dà lơgar bè bơtàu tơnguh lơh sa mpồl bơtiàn tiah làng bol jơi bơtiàn dồ êt nă cau mờ tiah kơh bơnơm”.

Ring bal ùr klau là broă rơndap lơh ờ gơtùi tam cah is tàm tŭ bơt bơtàu mờ bơtàu tơnguh lơh sa- mpồl bơtiàn tiah làng bol jơi bơtiàn dồ êt nă cau. Broă sơlơ lơh geh bơta ring bal ùr klau tàm tiah làng bol jơi bơtiàn dồ êt nă cau gơ jat bal mờ bơtàu tơnguh ndrờm bal bè phan bơna pal geh neh dong lơh sa- mpồl bơtiàn bơh càr Thái Nguyên dê ngai sơlơ bơtàu tơnguh. Bơh hơ̆ rơp ngai sơlơ geh uă cau ùr geh tŭ niam nàng đòm jat bal mờ gơp, ngui niam gơnoar broă mờ gơ gơs là bơta kuơmàng, pơgồp bơnah tàm bơta bơtàu tơnguh bal bơh mpồl bơtiàn dê.