Tàm tiah hìu rông ƀòn Kăm, sàh Ia Krái, càr Gia Lai, nùs nhơm lơh chờ sơnam pa sơn rờp mờ “Ngai chờ piang mbar lơm pòng tơlir” tàm ù tiah hô hơng, ram mhŭ. Đơng lam bồ Anih lơh broă đơng lam, atbồ kấp dờng Ling mpồl 15, gơnoar atbồ ƀòn lơgar bal mờ làng bol ală ƀòn geh tam pà gơs 4 mpồl, chờ hờp tàm pơrlòng klơm mbar lơm pòng, lơh geh nùs nhơm duh hồl, tàm klăc bal ling klàng- làng bol. Gùt dar hìu rông là ală “Anih ràng tăc phan zerô đông” drơng làng bol in rcang sa tềp. Uă broă nhơl bơh yau kung geh bơyai lơh, gơ hòi gơ jà gal ngan kơnòm dềt tus bal, cèng wơl săp ñiŏ hô hơng.

 Trồ mang tus, tiah do gơ gơs tiah lơh chờ sơnam pa cèng bềng bơhiàn niam chài is Tây Nguyên mờ gơn ru ồs sàl mờ uă dơ̆ ràng tơlik đơs crih tam ya jờng rơ ƀòn lơgar, dà lơgar bơnĕ bơnài bal mờ săp ntas cing mồng, gùng tam ya bơh yau. Tus bal broă lơh, bi Ksor Nuch – làng bol ƀòn Dọch Krót, sàh Ia Krái brơn brài pà gĭt:“Mpồl ling rê sa tềp bal mờ làng bol den chờ hờp ngan mờ gơboh gơbài ngan. Dơ̆ pơrlòng klơm mbar lơm pòng, ală broă nhơl bơh yau mờ tìp mat lơh kwèng niam chài, sền gĭt phan sa geh bal kòn cau Jrai, Yoan, den tàng lơh geh dơ̆ sền gĭt chờ hờp mờ tàm bơnĕ bơnài bal”.

 Tàm broă lơh, Ling mpồl 15 mờ Mpồl Lơh sa- Sền gàr dà lơgar 715 neh jàu pà gĭt nđờ rơhiang bơnah phan pà ai ală cau geh sră dong kờl dà lơgar, hìu bơnhă rƀah. Anih lơh broă đơng lam, atbồ kấp dờng Ling mpồl 15 neh tus tàm hìu tơn nàng lùp còp, pà phan, gờm chờ sa tềp ală kra ƀòn, kwang lam bồ thôn, cau geh bơngă pin dờn mờ hìu bơnhă geh sră dong kờl dà lơgar; còp, gờm chờ sa tềp Pôs đồng Ling sền gàr tiah nhàr lơgar Ia O, kấp ủy, gơnoar atbồ ală sàh Ia O mờ Ia Krái.

 Thiếu tướng Hoàng Văn Sỹ – Atbồ đơng lam Ling mpồl 15 pà gĭt, ală broă lơh “Sơnam pa tiah nhàr lơgar bềng lìu nùs nhơm ling klàng làng bol” rơ̆p pơn jat tai geh lam lơh. Tàm dơ̆ 1, Ling mpồl rơ̆p pà 30 bơnah phan pà tus kwang bàng, cau lơh broă mờ làng bol ală thôn ƀòn; dong kờl 100 tấn phơng sih hữu kơ vi siñ gơwèt mờ broă lơh “Lơh tơlir Trường sa” nam 2026.

 Bơh ală broă lơh do, Ling mpồl 15 ờ mìng kơlôi rcang rài kis phan bơna, nùs nhơm ai làng bol in lơm mờ gam lơh jat kơnòl broă cíñ trị kwơ màng, pơgồp bơnah sơlơ lơh kơ̆ rlau tai nùs nhơm, bơt bơtàu bơta pin dờn Làng bol dê gơwèt mờ Đảng, Dà lơgar mờ Ling klàng, bơt bơtàu kơnhăp kơ̆ “nùs nhơm rcang gàr lài làng bol” tiah nhàr lơgar Dà lơgar dê. Thiếu tướng ồng Hoàng Văn Sỹ pà gĭt:“Nam 2026, bol añ ngui ală phan bơna tàm dơlam is bơh Ling mpồl dê tàm ală phan pà. Bơh hơ̆ sơlơ đơs nền nùs nhơm jơh nùs bơh Ling mpồl 15 dê tus mờ làng bol, bơt bơtàu tai nùs nhơm tam klăc ring bal di mờ nùs nhơm Anih duh broă đơng lam Đảng Dà lơgar dê sồr lơh là ờ gŏ di lời dồ nă cau lơi gơtìp lời wơl bơh ngkời. Bơh hơ̆, bơta pin dờn rơ̆p sơlơ tơnguh tai mờ ngan ngồn gơ gơs tiah nhàr lơgar kơnhăp kơ̆ sền gàr dà lơgar tàm tơngai pa”.

Ai tàm tiah nhàr lơgar dà lềng bơh càr Dăk Lăk dê nùs nhơm sơnam pa tus gờñ rlau mờ ală broă lơh nùs nhơm tàm sơnđàc bal bơh kwang bàng, cau ling Mpồl ling sền gàr tiah nhàr lơgar dê sền gròi sa tềp ai làng bol in, ngan là ală hìu bơnhă geh rài kis kal ke, pa kong hoàc huơr kơn jơ̆ kơn jŭt ngan tài bơh trồ tiah lơh aniai, mìu càl rơbŭt dờng dà tih dà lìu.

Tàm sơnah ƀòn Sông Cầu, càr Dăk Lăk, Pôs đồng ling sền gàr tiah nhàr lơgar pơgồp bal mờ Mpồl tam klăc cau ùr sơnah ƀòn dê bơyai lơh “Ngai chờ mbar lơm pòng tơlir”. Gĭt nđờ rơhiang nơm ƀañ nùs nhơm tàm sơn nđàc geh jàu tus tàm tê ală hìu bơnhă rƀah, hìu bơnhă geh sră dong kờl dà lơgar, pơgồp bơnah cèng tus dùl dơ̆ sa tềp ram mhŭ, tơl làm rlau tai. Dờp bơnah phan pà bơh mpồl ling sền gàr tiah nhàr lơgar dê, ồng Dương Bình Yên, ơm tàm thôn Phú Hòa, sơnah ƀòn Sông Cầu, ngoh rơngăc pà gĭt:“Chờ hờp ngan geh bơta dong kờl, geh pà ală phan pà ai ală làng bol rƀah, ală tiah gơtìp mìu càl rơbŭt dờng, dà tih dà lìu pa do, nàng geh dùl dơ̆ Sa tềp nam Ơseh chờ hờp mờ gơboh gơbài”.

Tàm sơnah ƀòn Hòa Hiệp, Pôs đồng ling sền gàr tiah nhàr lơgar Hòa Hiệp Nam pơgồp bal mờ ală mpồl lơh broă bơyai lơh broă lơh “Sơnam pa tiah nhàr lơgar, ram nùs làng bol ƀòn lơgar”. Mpồl  bơyai lơh neh jàu 110 bơnah phan pà geh bal priă mat mờ phan ngui sa kờñ pal geh ai ală hìu bơnhă geh sră dong kờl dà lơgar, hìu bơnhă geh màng mờ dà lơgar, hìu bơnhă rƀah, ală kơnòm dềt tàm broă lơh “Dong kờl oh lòt bơsram”. Bal mờ hơ̆, mpồl lơh sơnơm ling klàng gam bơyai lơh kham kòp, bơto pơlam pràn kơl dang să jan mờ pà sơnơm ờ sa priă ai pơgap 100 dơ̆ làng bol in.

Kung tàm ală ngai do, ală pôs đồng ling sền gàr tiah nhàr lơgar tàm gơl gùng dà lềng Dăk Lăk gam pơgồp bal mờ ală mpồl geh nùs nhơm niam dong kờl is dong kờl lơh niam wơl hìu ơm ai uă hìu bơnhă kal ke in, dong làng bol gờñ bè ờs wơl tiah ơm, iang nùs lơh broă sa mờ wă rò sa tềp lơngap lơngai. Thiếu tá Vũ Lý Huỳnh, Cíñ trị viên phó Pôs đồng ling sền gàr tiah nhàr lơgar Xuân Đài, Mpồl đơng lam Mpồl ling sền gàr tiah nhàr lơgar càr Dăk Lăk pà gĭt:“Broă lơh sa tềp ling klàng làng bol nam do den kwang bàng, cau ling Pôs đồng ling sền gàr tiah nhàr lơgar Xuân Đài geh uă tam gơl pa rlau, lam lơh tus tiah lùp còp, pơndờm pơnđiang ală làng bol lơh ka pa do neh gơtìp hoàc huơr tài bơh mìu càl rơbŭt dờng sồ 13 mờ dơ̆ mìu dờng dà tih dà lìu. Di tŭ pơndờm pơnđiang mờ jàu pà phan nàng làng bol in lik lòt tàm dà lềng tras kŭp ka, bal mờ mpồl ling sền gàr tiah nhàr lơgar sền gàr gơnoar tờm dà lềng, lơngăp lơngai rơndăp tăp sèng tàm tiah nhàr lơgar dà lềng mờ pơgồp bơnah bơtàu tơnguh lơh sa mpồl bơtiàn tàm tiah do dê”.