Mŭt tàm nam bơsram 2023- 2024, mpồl Kảñ sát Gùng lòt rơndăp tăp sèng gơ wèt Kwang àng kơnhoàl Bắc Yên neh rơcăng lài pơgồp bal mờ ală hìu bơsram tàm kơnhoàl dê lơh pràn broă lơh mblàng yal, bơto bơtê, bơto pơlam adat boh lam lòt rê tàm gùng ai ală kơnòm bơsram in.

Đại úy ồng Lê Hữu Nhân, Phó Kwang ătbồ Mpồl Kảñ sát gùng lòt- Rơndăp tăp sèng gơ wèt Kwang àng kơnhoàl Bắc Yên, pà gĭt, tàm nhai 09 nam 2023, là nhai kơnòm bơsram sơnđờm lòt bơsram bồ nam bơsram pa. Nàng tơnguh uă bơta gĭt wă, bồ tơngoh geh kơnòl lơh jăt is adat lòt rê tàm gùng ai cau lòt rê tàm gùng in là ală kơnòm bơsram, ngan là kơnòm bơsram là oh kòn làng bol jơi bơtiàn dồ êt nă cau ơm kis tàm ală ƀòn lơgar ngài mờ hìu bơsram, rơndeh lòt bơsram mìng là rơndeh măy, mpồl kảñ sát gùng lòt Kwang àng kơnhoàl Bắc Yên neh jàu kơnòl ai ală mpồl lơh broă in lòt sền jơh tàm ù tiah kơnhoàl dê tàm ngai kung bè mang. Đại úy Lê Hữu Nhân, pà gĭt tai: Mpồl Kảñ sát gùng lòt jàu broă ai ală mpồl lơh broă in lòt sền jơh làm gùt ù tiah kơnhoàl dê ngai kung bè mang tơn. Kwơmàng, bol hi tơrgùm tàm sơnam kơnòm bơsram geh ală bơta gơ tơngŏ lơh tìs, bè tơrgùm gal să, lòt mhar, pleh ƀơi tàm gùng, ờ hềt wă wờng ngan, ờ ndau sơgơn gàr bồ tŭ lòt rê tàm gùng, mơkung pơgồp bal mờ mpồl ătbồ ală hìu bơsram bơyai lơh mblàng yal, bơto yal adat boh lam tơnguh uă bơta gĭt wă kung bè pơgồp bal mờ mè bèp kơnòm bơsram dê bơto tơngkah gơ wèt mờ ală oh lơh tìs, mơkung yal mờ hìu bơsram in nàng geh broă bơsong jăt jơnau cih bơh adat boh lam dê.

Nam bơsram 2023- 2024, jơh gùt kơnhoàl Bắc Yên geh 45 hìu bơsram bal mờ rlau 20 rbô nă kơnòm bơsram ală kâp bơh mầm non, kâp dùl, kâp bàr tus kâp pe. Nàng ală oh mhar gĭt ală jơnau bơto, Kảñ sát gùng lòt gơ wèt Kwang àng kơnhoàl Bắc Yên sac rwah tơngume mblàng yal dipal mờ sơnam deh kơnòm bơsram dê. Oh Lèo Thị Nga Diệu, bơsram ơdŭ 11A, Anih tờm Bơto bơtê sùm kơnhoàl Bắc Yên, yal: Bơh ngai mblàng yal ngai do den dong oh mờ jơh tơl nă cau gĭt wă geh bè Adat lòt rê lơngăp lơngai tàm gùng hơđang ù gơl, dong jơh tơl nă cau gĭt geh tŭ lòt rê tàm gùng den pal ndau sơgơn gàr bồ, ờ gŏ di lòt mhar, lòt sơrlèt ƀơi, pleh gùng ƀơi...

Oh Lèo Thị Nga Diệu yal tai: Bơta geh ngan tàm kơnhoàl Bắc Yên bol oh den uă bơyô là kơnòm bơsram ờ tus sơnam măy rơndeh mơya kung gam geh ală mè bèp jàu rơndeh ai lòt bơsram sơl. Uă tŭ lik bơsram, ală bơyô hơ̆ sùm pơndiang gơ̆p lòt mhar ngan, mờ tàm tŭ lòt tàm gùng den geh uă ngan ală bơyô là kơnòm bơsram gam lòt jơng rê tàm hìu den tài. Oh gŏ gơlơh sơbơng roh ngan. Neh geh dơ̆ oh mong gơtìp ală bơyô đì rơndeh măy lòt mhar in tơm tàm să. Wih, ngòt ngan ih.

Tàm 9 nhai bồ nam 2023, Mpồl Kảñ sát gùng lòt rơndăp tăp sèng gơ wèt Kwang àng kơnhoàl Bắc Yên neh pơgồp bal mờ ală Hìu bơsram Kâp pe Bắc Yên, Hìu bơsram kòn cau ơm sa tơn tàm hìu bơsram kâp bàr mờ kâp pe Bắc Yên, Anih tờm Bơto bơtê sùm- Bơto bơtê broă lơh bơyai lơh mblàng yal bè Adat lòt rê lơngăp lơngai tàm gùng geh 3 ƀùi ai 1 rbô 130 nă kơnòm bơsram in, pà sră pang gĭt nđờ rbô pang mblàng yal bè rơndăp tăp sèng lơngăp lơngai lòt rê tàm gùng. Cơldŭ Bơto bơtê kơnhoàl Bắc Yên pơgồp bal bơyai lơh mblàng yal geh 42 dơ̆ ai mờr 9 rbô 700 nă kwang bàng ătbồ, cau pơgru mờ kơnòm bơsram in. Klau pơgru Bạc Văn Ân, Phó Kwang ătbồ Hìu bơsram Kòn cau ơm sa tơn tàm Hìu bơsram kâp bàr mờ kâp pe Bắc Yên, pà gĭt: Hìu bơsram Kòn cau ơm sa tơn tàm hìu bơsram Kâp bàr mờ Kâp pe Bắc Yên neh mblàng yal kơnòm bơsram in ală jơnau cih bơh adat boh lam dê bơh uă broă lơh bè pơrjum gờm chờ bồng bi bồ poh, bơyai lơh ală dơ̆ bơsram bơdìh ơdŭ bơsram tàm hơ̆ jà ală oh mi mpồl kảñ sát gùng lòt rơndăp tăp sèng gơ wèt Kwang àng kơnhoàl Bắc Yên pơgồp bal mờ hìu bơsram nàng lam bơto bơtê ai ală oh in bè adat lơngăp lơngai lòt rê tàm gùng ù gờl, bơh hơ̆ dong ai adat boh lam gơ lòt mŭt tàm rài kis mờ ală oh geh bơta wă wờng rlau tàm broă lơh jăt ală jơnau cih bơh adat boh lam dê.

Mờ uă broă lơh dồ ròt bal, dipal ngan mờ bơta geh ngan geh lơh bơh ală broă rơndăp lơh nền cê, loh làng, gĭt wă bơh kơnòm bơsram tàm tiah kơh bơnơm Bắc Yên, càr Sơn La dê ngai sơlơ geh tơnguh tai, bulah bè hơ̆ broă sền gàr niam lơngăp lơngai lòt rê tàm gùng sùm là broă kờñ pal bơsong mhar tơn, bal mờ bơta mŭt lơh bal bơh ală mpồl lơh broă geh gơnoar dê kờñ pal geh bơta sơm băt tê bal bơh jơh gùt mpồl bơtiàn dê, nàng niam chài lòt rê tàm gùng ngan ngồn gơrề làm uă mờ jrô ơnàng.