Lơh broă mờ lơgar ndai mờ mut gơrờm bal mờ dunia ai mpồl ùr Kwang đơng lam bồ in ờ mìng là yal ai oh mi in ală jơnau yal pơlam gùng dà bè broă lơh yal tơngĭt jơnau lơh broă mờ lơgar ndai bơh lơgar Việt Nam dê tàm bơta pa; Bơta gĭt gơ̆p đah ală lơgar dờng tàm dunia mờ bơta gơrềng tus lơgar Việt Nam; Broă lơh mblàng yal jơnau pa mờ ngui uă gah yal tơngĭt jơnau jăt tàm bơnàng jă sồ; Ală jơnau sồr bè yal tơngĭt jơnau lơh broă mờ lơgar ndai, bơyai lơh pơrjum, cribơyai dunia... mờ ngan là bơh tàm ală bơnah broă geh ngan tơnguh uă bơta pràn jak ùr kwang bàng in.

Tàm càr Sóc Trăng, broă sền gròi, sền sơwì nàng kờñ tơnguh uă bơta chài ai mpồl kwang bàng, kông cứk Ủy ƀan Ñân zân kấp xã in, tàm hơ̆ geh ùr kwang bàng là cau jơi bơtiàn dồ ết nă cau, lơh geh bơta niam nùs bơh cau dùl nă să is mờ mpồl cau dê gơwèt mờ bơta drơng broă bơh ală anih lơh broă sră nggal Dà lơgar dê tŭ lơh broă tàm anih lơh broă dà lơgar, pơgồp bơnah lơh niam Sơñio khà tam gơl pa wơl sră nggal là broă lơh sùm sùm, tàm pơn jat sùm. Bơh ală dơ̆ lòt sền, sền sơwì dong mpồl kwang bàng, kông cứk kấp xã, ală oh mi cau ùr là kwang bàng xã gĭt nền loh làng kơnòl broă, bơh hơ̆ lơh sir niam ngan kơnòl broă geh jàu, Kông cứk Cơl dŭ lơh broă- Tơrgùm kờp, Ủy ƀan Ñân zân sơnah ƀòn 2, thị xã Ngã Năm, càr Sóc Trăng Phan Thị Lầu pà gĭt: “Añ gŏ jơh ală kwang bàng, kông cứk tŭ do sùm lơh jat ală broă lơh tàm phần mềm dùl mpồng ală gah drơng broă dà lơgar tàm internet lơm. Den tàng sồr kwang bàng, kông cứk pal gĭt loh bè tin họk, chài ngan tàm broă lơh nàng lơh niam ngan kơnòl broă”.

Tơnguh uă bơta pràn jak ùr kwang bàng in dong cau ùr sơlơ pin dờn lơh broă bơh să tờm dê, pin dờn mut gơrờm bal dunia. Tàm càr Phú Yên, uă tiah neh mờ gam lơh jat niam gơnoar broă đơng lam cau ùr tàm kấp ủy ală kấp dê, pơgồp bơnah bơt bơtàu anih lơh broă cíñ trị kơ̆ kơl jăp pràn kơl dang tơl làm. Là kwang bàng Đảng ủy, uă nam lơh Củ tịc Mpồl cau ùr xã Sông Hinh, kơnhoàl Sông Hinh, ù tiah geh rlau 90% làng bol jơi bơtiàn dồ ết nă cau, bi K’So H’ Vỹ sùm lơh jat niam gơnoar broă đơng lam, mblàng yal, hòi jà làng bol lơh jat gùng dà broă lơh bơh Đảng, adat boh lam bơh Dà lơgar dê mờ bơtàu tơnguh lơh sa hìu bơnhă, tam gơl rài kis brồ guh lik klàs rƀah. K’So H’ Vỹ, đơs:“Mpồl kung neh pờ ală ơdŭ pơrjum tàm ală Ci hội, bơh hơ̆ nàng ai oh mi tàm mpồl cau ùr in gĭt loh geh jơnau kờñ bơtàu tơnguh lơh sa bơh tơl nă oh mi dê”.

Mờ gùng dà broă lơh rơndăp kwang bàng bal mờ tơn pồ kwang bàng cau ùr, ngan là ală kwang bàng kơnòm să geh bơta jak chài mờ bơta chài lơh broă uă, kơnhoàl  Sông Hinh neh lơh dơ̆ lĕ bal broă lơh tàm pơdar kwang bàng mờ broă lơh pơgồp kơnòl broă tơn bơh Ƀí thư Đảng ủy xã mờ lơh jat ală broă rơndăp lơh jat Nghị quyết geh ai, Bí thư Đảng ủy xã Ealy, kơnhoàl Sông Hinh Trương Thị Thu Hà, pà gĭt: “Bol añ kung geh sền gròi nàng bơto bơtê mờ bơto pơlam. Ngan là ală broă lơh tàm pơdar kwang bàng do kung là dùl tŭ tơngai niam nàng bol añ in lơh broă ngan ngồn tàm ƀòn lơgar, gĭt loh geh ală bơta, lùp bơsram bơh tàm ƀòn lơgar mờ nàng lơh niam rlau tai ai să tờm he in”.

Phó Kwang atbồ Mpồl rơndăp broă Tỉñ ủy càr Phú Yên Nguyễn Bá Kim, pà gĭt: “Kấp ủy, gơnoar atbồ mờ ală anih lơh broă, mpồl lơh broă den kung neh sền gròi tus broă lơh rơndăp kwang bàng. Jat tàm broă lơh rơndăp kwang bàng, ngan là mpồl ùr kwang bàng jơi bơtiàn dồ ết nă cau in tus bal khoă bơto bơtê, bơto pơlam. Tơnguh uă bơta chài, broă lơh đơng lam atbồ”.

Rơndăp kwang bàng gờñ, bơto bơtê di gùng, khin cha jàu broă jat bơta mờng chài lơh broă pơgồp bal mờ nùs nhơm pơnđơl pràn lơh ngan brồ guh bơh să tờm ală oh mi dê, bơta pràn jak bơh ùr kwang bàng tàm tiah kơh bơnơm, tiah làng bol jơi bơtiàn dồ ết nă cau tàm càr Phú Yên neh ngan ngồn geh lơh jat mờ cèng wơl cồng nha tàm broă pơlam gùng dà bơtàu tơnguh lơh sa mpồl bơtiàn tàm ù tiah do dê. Do kung là bơnàng jă nàng ùr kwang bàng jơi bơtiàn dùl ết nă cau in yờ tơnguh uă bơta pràn jak bè broă lơh lơh broă mờ lơgar ndai mờ mut gơrờm bal mờ dunia.