Geh dùl bơta mùl màl tŭ do, tŭ broă lơh bơ̆t bơtàu ƀòn lơgar pa geh lơh gơs den gùng lòt tàm ală xã tiah kơh bơnơm ñhoa tàm càr Khánh Hoà ndrờm neh geh lơh mờ bê tông jơh, gùng ơnàng, niam. Gùng niam,mơya jơnau git wă tŭ lòt tàm gùng bơh làng bol kis tàm tiah do den ờ hềt di pal, tŭ jơh ală cau kung gam geh nùs nhơm ờ sền gròi tŭ măi rơndeh, tàm hơ̆ uă ngan là ơruh pơnu, bè: Ờ ndao sơgơn gàr bồ, đì rơndeh lòt jờl, sơrlèt ờ di, pơn diang uă ir cau geh ai… Tàm tiah kơh bơnơm, geh uă ngan là ală cau măi rơndeh Honda là ơruh pơnu, hơ̆ là ală cau git bè adăt gùng lòt, git kơrnoăt geh ai là tŭ nggui hờ đang rơndeh là pal ndao sơgơn gàr bồ, mơya git là dùl jơnau mơya gam lơh jăt ha là ờ khăt bè tơl cau dê. Lŏ Cao Thị Dân, kis tàm xã Cầu Bà, kơnhoàl tiah kơh bơnơm Khánh Vĩnh, càr Khánh Hoà pà git: “Geh cau đì rơndeh ndao sơgơn gàr bồ, geh cau den ờ ndao sơgơn gàr bồ tài lòt rềp tềng hìu”.

Tàm tiah kơh bơnơm, geh uă kơnòm dềt mìng rơ̆p bơh 12 tus 13 sơnam neh măi rơndeh Honda lơh is. Bơh dềt tơn neh bè hơ̆ den tàng tus sơnam ơruh pơnu, bŭ lah ờ hềt geh bơsram bè adăt gùng lòt, ờ hềt geh sră măi rơndeh, mơya di lah geh rơndeh Honda den đì lòt mơ. Mùl màl geh uă ngan tàm tiah kơh bơnơm là rơndeh lơh is, den tàng bơta tơl kơl jăp bơh ală rơndeh do dê là ờ geh uă, mơya do là rơndeh lòt rê bơh uă ơruh pơnu dê. Geh ală ơruh pơnu pa jơh ñô sa den măi rơndeh lòt tàm gùng. Ồng Triệu Mạnh Hải, kis tàm kơnhoàl Khánh Vĩnh, càr Khánh Hoà pà git: “Bơta ngăc ngar làng bol tàm do ờ uă, dơ̆ bàr tai là broă bơsram sră kung lờ tus gùng tus dà, den tàng tŭ geh rơndeh là đì lềng làng. Anih lơh broă geh gơnoar lơh glài hơ̆ sồng git să tờm lơh tìs mơya geh gơtìp rơlao bloh”.

Kảñ sát sền gàr gùng lòt sùm lơh anih sền gàr tàm gùng lòt, lơh glài cau lơi tìs, mơya ală anih sền gàr do geh lơh mìng tàm ală gơl gùng dờng, den tàng, ală gơl gùng tàm ală xã, ală thôn sùm gơtìp tìs bơh uă ơruh pơnu ờ hềt gơtìp lơh glài. Ală dơ̆ mblàng yal, bơto bơtê kung gam ờ hềt tam gơl sơl jơnau git wă lơh jăt adăt boh lam tàm gùng lòt bơh làng bol kis tàm tiah kơh bơnơm dê. Dùl tàm ală bơta kal ke gơwèt mờ broă gàr lơngăp lơngai tàm gùng lòt tàm tiah ñhoa là mpồl Kảñ sát sền gàr gùng lòt tàm ală tiah ờ gal, tàm tŭ ù tiah lơh broă ơnàng. Dùl tàm ală broă lơh bơh càr Khánh Hoà dê gơwèt mờ broă tơnguh uă jơnau git wă lơh jăt adăt boh lam tàm gùng lòt ai làng bol kis tàm tiah jơi bơtiàn dùl êt nă cau, tiah kơh bơnơm là ngui gơnoar bơh ală kra ƀòn, kwang atbồ ƀòn, cau geh bơngă pin dờn tàm ƀòn, bơh tŭ hơ̆ lơh geh uă, pơlam ală cau do gơs cau tờm tàm broă mblàng yal, yal jơnau git wă lơngăp lơngai tŭ lòt tàm gùng ai làng bol in. Ồng Nguyễn Ngọc Hoa, at gơnoar ing Củ tịc UɃÑZ xã Khánh Trung, kơnhoàl Khánh Vĩnh, càr Khánh Hoà pà git: “Bol añ pồ dùl nă cau ala măt cau geh bơngă pin dờn tàm ƀòn kung bè làng bol ală jơi bơtiàn dùl êt nă cau nàng pơgồp bal bè uă gah broă gơrềng tus mờ broă bơto bơtê, geh tŭ jào kwang àng in hòi, bơto, lam sồr ală cau sùm gơtìp tìs bè bơta lơngăp lơngai tàm gùng lòt”.

Ngai pah ngai, tàm uă gơl gùng tiah kơh bơnơm kung gam sùm ală ơruh pơnu lòt tàm gùng mờ ală rơndeh lơh is, ờ ndao sơgơn gàr bồ mờ ală bơta lòt tàm gùng lơh cau lơi sền gŏ kung pal nrơ̆t dơl. Cơl dŭ lơh broă Kảñ sát sền gàr gùng lòt Kwang àng càr Khánh Hoà neh lơh broă tơrlòng Lam sồr làng bol chài bè “Mblàng yal, yal, bơto bơtê Adăt boh lam bè bơta lơngăp lơngai tàm gùng lòt ai làng bol kis tàm tiah kơh bơnơm Khánh Vĩnh tơngai bơh nam 2021 tus 2025”. Bơh tŭ hơ̆ neh bơyai lơh mblàng yal uă dơ̆ ai mờr 1 rơbô nă cau ala măt ală gah, mpồl lơh broă, ală mpồl lơh broă cíñ trị mpồl bơtiàn; kra ƀòn; làng bol jơi bơtiàn dùl êt nă cau tàm 3 xã Liên Sang, xã Cầu Bà, xã Sơn Thái, gơwèt kơnhoàl Khánh Vĩnh mờ Hìu bơsram Trung kấp lơh broă jơi bơtiàn ơm tơn kơnhoàl Khánh Vĩnh in… Jào pà 70 nơm sơgơn gàr bồ, pà sră cih mblàng yal bè bơta lơngăp lơngai tàm gùng lòt; jơnau hơ bè broă lơh jăt niam lơngăp lơngai tàm gùng lòt ai ală kơnòm bơsram in; bơ̆t bơtàu mờ crăp 2 pang mblàng lơngăp lơngai tàm gùng lòt mờ tơngu me “Kảñ sát sền gàr gùng lòt tài bơta lơngăp lơngai ală gơl gùng” tàm gơl gùng 27C tàm 2 xã Cầu Bà mờ xã Sơn Thái. Bŭ lah broă gàr niam lơngăp lơngai tàm gùng lòt geh lơh tàm tiah ñhoa, tiah kơh bơnơm bơh càr Khánh Hoà dê kung gam ờ hềt geh cồng nha bè jơnau kơ̆p kờñ, mơya mờ broă tus bal pràn bè tŭ do, di gơlan tàm tơngai tus, broă gàr niam lơngăp lơngai gùng lòt tàm tiah ñhoa geh uă bơta tam gơl niam, pơgồp bal tàm broă tơmù rềs àr tàm gùng lòt tàm gùt càr dê.