Mpồl lơh broă bơh càr Gia Lai dê bơh Phó Củ tịc Anih duh broă Làng bol càr mò Nguyễn Thị Thanh Lịch lơh kwang lam bồ mpồl pa lòt còp, nting bơr sa tềp tus ală mpồl mờ hìu bơnhă cau geh màng mờ dà lơgar pơn rơ ngan tàm 2, 3 sàh tiah đah mat tơngai mut càr. Mpồl lơh broă neh nting bơr sa tềp 25 hìu bơnhă cau geh màng mờ dà lơgar pơn rơ ngan tàm ală sàh: Ia Rbol, Ia Rsai, Uar, Ia Dreh mờ Phú Túc, tơl hìu bơnhă geh jàu 1 bơnah phan pà bơh càr dê mờ 2 tơlak đong priă mat.

Ồng Ksor Chuel ơm tàm ƀòn Rưng Ama Nhiu, sàh Ia Rbol, càr Gia Lai pà git: “Hìu bơnhă añ kung bè làng bol tàm ƀòn, rài kis ngai sơlơ kơ̆ kơnhăp mờ bơtàu tơnguh rlau, hìu lơi kung ndrờm wèt tus rài kis hờm ram, gơboh gơbài. Bơdìh mờ hơ̆, Đảng mờ Dà lơgar sùm sền gròi tus rài kis bơh làng bol jơi bơtiàn dồ êt nă cau tàm tiah Tây Nguyên dê, dong làng bol rơhời bơtàu tơnguh lơh sa, tơnguh niam rài kis. Tơngai tus, añ kơp kờñ Đảng mờ Dà lơgar pơn jat tai sền gròi uă rlau tai, geh tai ală gùng dà broă lơh, bơta lơh nền ngan ngồn nàng làng bol jơi bơtiàn dồ êt nă cau iang nùs lơh broă, lơh sa, gàr kơ̆ kơnhăp rài kis jŏ jòng”.

Gơwèt mờ làng bol kòn cau M’Nông ơm tàm sàh Nâm Nung, càr Lâm Đồng, tiah pôs đồng kăc màng tàm rài tam lơh tŭ do neh tam gơl. Tŭ do, làng bol tàm sàh gam bơtàu tơngguh lơh sa bơh tờm kơphê, tiêu, kòi sre mờ prăp gàr bơhiàn niam chài krơi is jơi bơtiàn dê. Mìng is tàm ƀòn Ja Rah, làng bol kòn cau M’Nông gam prăp gàr geh 20 bòr cing mờ 30 nă cau sùm dròng cing tàm ală broă lơh bơh ƀòn dê; 30 nă cau sùm tàñ ồi, tàñ sơ̆. Jơh ală hìu bơnhă ndrờm prăp gàr drăp yang nàng ƀĕ tơrnờm ờs mờng bơh yau. Ală broă lơh pơrjum lơh chờ lơh yàng bơh kòn cau M’Nông dê bè đơs pơnđik, bơceh mòn phan ngui đơs crih gam geh prăp gàr mờr wil tơl ngan.

Ồng Y Nkrơm, kòn cau M’Nông ơm tàm ƀòn Ja Rah, sàh Nâm Nung, càr Lâm Đồng đơs nền, rài kis pa hờm ram, lơngăp lơngai hơ̆ là cồng nha lơh geh bơh nùs nhơm tam klăc, lơh ngan brồ guh bơh làng bol ală jơi bơtiàn tiah pôs đồng kăc màng nam yau dê: “Nam do lơh jăt lơh sa pa kung cồng nha lơh geh rlau mờ nam lài. Hìu bơnhă geh 1 sào kòi sre lơh geh 20 ƀào kòi. Ai kơphê den lơh geh 5 tấn, cồng nha lơh geh uă rlau, añ gŏ kung chờ rao. Nam do tăc rlau 200 tơlak đong, kờp jơh priă tă bơcri blơi phơng sih kung gam jơngkah nàng bơcri wơl nam tơnơ̆ in mờ blơi prăp phan bơna hìu bơnhă in, gam wơl 20, 30 tơlak đong rơcăng wă rò sa tềp nàng chờ hờp bal mờ làng bol tàm ƀòn. Sa tềp bơhiàn yau den bơyai lơh ñô sa jà làng bol gơ̆p ƀòn; ală hìu tàm dong tàm ồp tê lơh mìr pơgăp 10 hìu, mờ jà oh mi, gơ̆p să rềp ngài tus ñô sa nting bơr chờ hờp ngai sa tềp nting bơr kơ̆p kờñ lơh sa ngai sơlơ bơtàu tơngguh rlau”.