VOV4.K’ho – Drim òr (24/9), UBND càr Dak Lak bơyai lơh pơrjum  sền wơl broă bơt bơtàu rài sền gàr dà lơgar gùt làng bol tơngai bơh nam 2009 tus nam 2019.

At gơnoar broă lơh tờm tiah Tây Nguyên dê, càr Dak Lak dê geh bă ù geh is rlau 13 rbô kơi sồ vuông, khà kờp làng bol mờr 1 tơlak 900 rbô nă cau mờ 47 jơi bơtìan kòn cau ơm kis bal. Bal mờ broă sơlơ tơnguh rlau tai broă đơng lam bồ, pơlam; lơh niam broă mblàng yal, pơlam lơh jat ală gùng dà, broă lơh bơh Đảng, dà lơgar dê bè sền gàr dà lơgar mờ bơt bơtàu rài sền gàr dà lơgar gùt làng bol; Dak Lak neh lơh jat broă dong kờl ai rlau 25 rbô nă cau ling kòp tê jê să, hìu bơnhă cau ling chơt màng, cau geh màng mờ dà lơgar in.

Ală mpồl ling tàm càr neh pơgồp bal lơh mờ jàu pà 244 nơm hìu nùs nhơm, kờp priă rlau 10 tơmàn priă; hòi jà tă pơgồp geh 82 tơmàn priă nàng lơh ală broă lơh drơng rài kis làng bol tàm tiah nhàr dà lơgar. Gùt càr neh lơh geh 380 broă lơh làng bol atbồ is bè sền gàr lơngap lơngai, ờ do ờ dă. Broă lơh rơ wah cau lòt ling pah nam sùm geh 100% khà geh sồr mờ bơta niam ngai sơlơ tơnguh niam rlau.

Cau mblàng K’Duẩn