VOV4.K’ho – UBND càr Dak Lak pa bơyai lơh Pơrjum tơn jơh kàl mrềt prang 2018 – 2019, sền wơl kàl mìu mờ lam lơh broă rơndap lơh kàl mrềt prang 2019 – 2020. Nam do, kờp jơh bă ù tam chi tam lơyah ngai bơh càr Dak Lak dê geh rlau 332 rbô lồ. Kờp jơh khà phan sa geh gar lơh geh mờr 1 tơlak 300 rbô tấn, gơguh 2 rbô 600 tấn pơn drờm mờ nam lài. Kuơmàng, kàl lơh sa mrềt prang 2018 – 2019 lơh geh cồng nha niam ngan, sơr lèt rlau mờ broă rơndap lơh ai tơlik.

Toès kòi kàl mrềt prang tàm xã Ea Kly, kơnhòal Krông Pách

Tàm pơrjum, gah lơh sa suơn sre kung neh ai tơlik broă rơndap lơh lơh sa kàl mrềt prang 2019 – 2020, mờ kờp jơh bă ù sih tam mờr 47 rbô lồ. Gah lơh sa suơn sre càr sồr ală tiah kờp sền wơl khà dà, rơndap sap sèng sơntìl chi tam ală bơta nàng bơt bơtàu broă rơndap lơhmùl màl, di mờ jơnau kờ` ngan ngồn bơh tơl tiah dê.

Cau mblàng K’Duẩn