VOV4.K’ho-Uă nam do, kơnhoàl Dăk Glong sùm ơm tềng đap bơta kơn jơ\ kơn ju\t ngan gơguh kơnòm bơsram, tàm tu\ kung gam ờ tơl cau pơgru sơl, lơh gơlik uă bơta kal ke ai bơta niam bơto mờ bơsram in. Mu\t tàm nam bơsram pa, kơnhoàl Dăk Glong kung gam ờ tơl rlau 300 nă cau pơgru ai kấp bơsram mầm non in lơh tus pơgăp 1600 nă kơnòm dềt ờ geh lòt bơsram. Tềng đap bơta geh ngan do, gah bơto bơtê bơh tiah do dê mờ tơl hìu bơsram neh geh uă lơh ngan nàng bơsong dùl bơnah lơi kal ke nàng gàr niam ai broă bơto mờ bơsram in.

Bàr pe nam do, Hìu bơsram mầm non Hoa Lan tàm xã Dăk R’Măng, kơnhoàl Dăk Glong là dùl tàm ală hìu bơsram ờ tơl pơgru uă ngan rlau jơh bơh kơnhoàl Dăk Glong dê. Tàm ală nam bơsram lài, hìu bơsram geh 9 ơdu\ den tàng tơl nă pơgru, kuang bàng pal dờp bơto bơh 2 tus 4 ơdu\. Nam do, kal ke rlau tu\ hìu bơsram mìng geh 3 nă pơgru biên chế lơm mơya pal bơto tus 12 ơdu\ tơn.

Ùr pơgru Dương Thị Hằng, Kuang atbồ Hìu bơsram mầm non Hoa Lan pà gi\t: Kal ke dờng ngan rlau jơh bơh hìu bơsram dê tu\ do là geh tus 4 phân hiệu, tàm tu\ pơgru den ờ tơl uă ngan. Jat jơnau ai bơh kơrnoat boh lam dê, den tu\ do hìu bơsram ờ tơl 21 nă pơgru bơto. Ờ geh pơgru den tàng bồ sơnam pa, hìu bơsram neh pal hòi jơh ală cau, geh bal kuang bàng atbồ, cau lơh broă ndrờm pal bơto kơnòm sơl. Ngan den bè hơ\, nam bơsram do, tàm kờp jơh khà 359 nă kơnòm bơsram, hìu bơsram mìng gơtùi bơto geh kơnòm bơsram 5 sơnam lơm, gam rlau 250 nă kơnòm bơh 3 tus 4 sơnơm digơlan ờ hềt gơtùi dờp mu\t bơsram:

Lài do, hìu bơsram geh 12 ơdu\ jat gùng dà bơh kơnhoàl Dăk Glong dê den geh 9 nă pơgru ki\ sră pơrgon lơh broă jat tơngai kàl hơ\ là 9 nhai dùl nam. Mơya, nam do, gùng dà là ờ geh ki\ sră pơrgon mờ pơgru den tàng bồ nam bơsram pa bol a` ờ gơtùi rwah kơnòm bơsram 100% ờ. Hìu bơsram kung neh ai ală pơgru lòt bơto 2 ơdu\ tàm dùl ngai, ai kuang bàng atbồ, den geh a` mờ ùr pơgru kuang jat jơng atbồ hìu bơsram kung bơto 4 ơdu\ sơl, lơh broă jơh bơta pràn nàng ai lài kơnòm bơsram 5 sơnam in lòt bơsram lơm.

Ai tàm Hìu bơsram mầm non Sơn Ca tàm xã Quảng Sơn, kơnhoàl Dăk Glong, bal mờ broă ờ tơl 13 nă pơgru bơto ơdu\, hìu bơsram gam ờ tơl 4 cơldu\ bơsram nàng bơto ai rlau 400 nă kơnòm bơsram tàm nam bơsram don in. Ùr pơgru Trần Thị Sâm, Kuang atbồ Hìu bơsram mầm non Sơn Ca, pà git:

Ờ tơl pơgru ndang mờ ờ tơl phan bơna tai, dilah bè ai kơnòm bơsram in geh lòt bơsram nàng kờ` gàr geh gơnoar kuơ ai ală sau in den phan bơna ờ geh wơl. Ờ geh pơgru den gi\t lơh bè lơi, den pal tơrgùm bal ală ơdu\, dùl ơdu\ kung pal bơh 40 tus 50 nă kơnòm bơsram, bè hơ\ den geh gơrềng tus cồng nha kung bè broă lơh atbồ kơnòm bơsram, bàr bơta kal ke hơ\ nđờ nam do ndrờm gơtìp lơm.

Bơh tơrgùm kờp bơh Phòng Giáo dục mờ Đào tạo kơnhoàl Dăk Glong dê, nam bơsram 2019- 2020, jơh gùt kơnhoàl geh 5.632 nă kơnòm tàm sơnam lòt bơsram. Ală nam bơsram lài, mìng gơguh pơgăp 1 rbô nă kơnòm mơya nam do gơguh tus bàr dơ\. Tài ờ tơl phan bơna mờ hìu bơsram den tàng kơnhoàl mìng gơtùi ai geh pơgăp 4 rbô nă kơnòm bơsram in lòt bơsram. Bè hơ\, geh pơgăp rlau 1.600 nă kơnòm dềt tàm sơnam lòt bơsram digơlan ờ geh lòt bơsram. Jơh gùt kơnhoàl Dăk Glong tu\ do ờ tơl 450 nă cau pơgru tàm ală kấp bơsram. Tàm hơ\, kấp mầm non ờ tơl uă ngan rlau jơh, bal mờ rlau 306 nă pơgru.

Ồng Đoàn Văn Phương, Kuang atbồ Phòng Giáo dục mờ Đào tạo kơnhoàl Dăk Glong geh jơnau đơs gơlơh ờ gi\t lơh bè lơi: Bulah kung gi\t sơl là gơnoar kuơ bơh kơnòm dềt dê, mơya gah bơto bơtê ờ gam gùng dà lơi ndai tai, ờ khin ai jơh ală kơnòm dềt in lòt bơsram, mìng ai lài kơnòm dềt 5 sơnam in lơm nàng bơto akhar. Tu\ do, kơnhoàl gam tơrgùm jơh ală priă jền nàng lơh pa tai 80 cơldu\ bơsram ală kấp den tàng bơta kơn jơ\ kơn ju\t ờ tơl cơldu\ bơsram digơlan geh gơmù đau dùl êt. Mơya, bòl glar ngan rlau jơh là jơnau ờ tơl pơgru.

Gơrềng tus phan bơna den kơnhoàl gơtùi bơsong geh, dilah bè ờ geh pơgru den geh rwah kơnòm bơsram nàng bơsram tàm ală hìu pơrjum niam chài thôn dê, halà jồm hìu làng bol den kung gam gơtùi bơto geh sơl, mơya ngan là jơnau ờ tơl pơgru den là kal ke ngan. Tềng đap bơta ờ tơl pơgru bulah neh geh gùng dà sơl mơya càr kung gam ờ hềt geh kơrnoat tam pà dipal nàng rơndăp tăp sèng mpồl kuang bàng bơh bồ nam bơsram pa tơn. Kung kơ\p kờ` sơl là ală kấp gơnoar atbồ lơh bè lơi nàng ai gờ` pơgru.

Bơh kờp sền, khà kơnòm dềt bơh 3 tus 4 sơnam ờ hềt geh lòt bơsram tơrgùm uă ngan tàm ală xã Dăk R’Măng mờ Quảng Hoà, là ală xã kal ke uă ngan bơh kơnhoàl Dăk Glong dê. Ờ tơl pơgru lơh khà kơnòm dềt tàm sơnam lòt bơsram mầm non ờ geh lòt bơsram pơn jat tai gơtìp gam wơl uă ngan, lơh gơlik bơta kơn jơ\ kơn ju\ ngan ai broă bơto mờ bơsram tàm ală nam pơn jat tai in.

Cau mblàng Lơ Mu K’Yến