VOV4.K’ho – Festival Bơkàu Dà Làc nam 2019 mờ ua\ broă lơh niam chài, đơs crih tamya niam ngan neh gơ hòi gơ jà rlau 200 rbô dơ\ nac nhơl chờ tàm lơgar mờ lơgar ndai. Tàm ală tiah tiơng pơn rơ bè Sươn bơkàu [òn dờng, Thung lũng tình yêu, Đồi Mộng mơ, tơnau dà Xuân Hương, khà nac tus sền ngai sơlơ gal ngan.

Tàm bơta trồ tiah noat mrềt, bềng lìu ală bơta bơkàu, ua\ anih tus sền tàm [òn dờng Dà Làc, khà nac nhơl chờ ua\ rlau git nđờ jơt dơ\ pơn drờm mờ ngai ờs. Bơ yô Lê Trần Bảo Quân, dùl nă nac nhơl chờ tus bơh càr Đồng Nai đơs: “Do là dơ\ sơn rờp a` lòt nhơl di tu\ lơh Festival, trồ tiah tàm do mrềt niam ngan, bơkàu niam ngan, a` kờ` ngan. Phan sa dà hùc tàm do bơkah ngan, khà pria\  tac kung di đau, ờ kas ir mờ cau Dà Làc den gơ lơh ngềr ngan. A` geh tus Dà Làc ua\ dơ\ tai nàng sền jơh ală bơta niam bơh [òn dờng bơkàu dê tàm tơngai tus”.

Nac cùp rùp kir sơnrai

Ờ mìng tàm ală anih lòt sền, ală tiah drà bơh [òn dờng dê kung duh hồl mờ gal ngan cau, ndrờm bè jơh bal ngai mờ mang tơn. Nac nhơl chờ Hoàng Thị Thúy Hồng tus bơh [òn dờng Hồ Chí Minh, lòt drà Hòa Bình tàm trồ mang đơs là, Festival Bơkàu Dà Làc dơ\ do geh lơh niam ngan: “Tu\ tus ndo sền go\ bơkàu den a` gơ lơh rài ngan tàm să mờ kờ` ngan. Ală bă tiah geh bơka drơng Festival in niam ngan. Trồ mang a` lòt nhơl den trồ tiah noat mrềt niam ngan, rơndeh rơn dồ ờ gơ kòl, lơngap lơngai geh sền gàr niam”.

Nac sền dùl anih bơka mờ bơkàu kềng gah gùng

Jat khà kờp bơh sơn rờp bơh Mpồl bơyai lơh dê, Festival Bơkàu dơ\ do neh geh rlau 250 rbô dơ\ nac lòt sền. Rlau 1 rbô 800 anih ơm wơl bal mờ mờr 23 rbô 400 cơldu\ ơm ơpah neh geh ai ngui jơh nàng drơng nac nhơl chờ in. Mò Trần Thị Vũ Loan, Phó Chủ tịch UBND [òn dờng Dà Làc pà git, tus tu\ do, jơh ală broă lơh drơng Festibal in ndrờm geh lơh niam lơm. Bơta kòl rơndeh, nac nhơl chờ gơtìp tơnguh khà pria\ ngui sa ờ hềt gơlik geh. Ală ngai tus, khà nac nhơl chờ tus mờ Festival Bơkàu Dà Làc pơn jat tai gơguh ua\: “Tàm broă lơh mblàng yal den [òn dờng Dà Làc neh yal ală jơnau bè lơh chờ tàm anih yal tơnggit [òn dờng dê. Mơkung bơh ală ma\\i mok ngui ală phần mềm ngac ngar bơh [òn dờng dê bè nhơl chờ ngac ngar, ală App pờ tơn tàm internet, [òn dờng neh mblàng yal tai tơngume Festival Bơkàu tus mờ làng bol bal mờ nac nhơl chờ in. Bal mờ hơ\, [òn dờng gam pờ gùng che điện thoại lơh broă sùm nàng dờp di tu\ ală jơnau đơs gơ rềng tus broă bơyai lơh Festival Bơkàu”.

Bơkàu bềng lìu tàm làm gùt tiah

Jat ồng Phan Văn Đa, Phó Chủ tịch UBND càr Lâm Đồng, Phó Kuang atbồ Mpồl đơng lam Festival Bơkàu Dà Làc dơ\ 8 đơs, bơdìh mờ ràng tơlik bơkàu, Festival Bơkàu dơ\ do gam geh ua\ broă lơh niam ndai bè: ràng tơlik chi bơka; Broă lơh tìp mat lơh quèng niam chài đơs crih tamya Việt Nam – Hàn Quốc; ràng tơlik Gùng lòt bè ală phan lời wơl niam chài lơh hìu đam; Poh niam chài ce mờ bìai bơr teh Lâm Đồng: “Mờ bơta kơp kờ` Festival dơ\ tơ nơ\ pal niam rlau, gơ hòi gơ jà geh ua\ nac nhơl chờ rlau, lơh jat bơta kơp kờ` bơh làng bol, nac nhơl chờ tàm lơgar mờ lơgar ndai dê. Bol a` neh geh bơta tam gơl 2, 3 broă lơh tàm Festival Bơkàu nam do bè broă lam lơh, tơngume, broă bơyai lơh niam rlau mờ ală dơ\ Festival Bơkàu lài”.

Cau mblàng K’Duẩn