VOV4.K’ho - Tàm hìu lơh broă Chính phủ, Thủ tướng ồng Nguyễn Xuân Phúc neh wă ồng Nurlan Nigmatulin, Chủ tịch Hạ viện lơgar Kazakhstan, dùl tàm 5 lơgar bơh mpồl tam klăc bal lơh sa châu Á mờ châu Âu (EAEU), mpồl tam klăc bal geh FTA mờ lơgar Việt Nam.

Thủ tướng ồng Nguyễn Xuân Phúc đơs niam, broă lơh jăt FTA lơgar Việt Nam – Mpồl tam klăc lơh sa châu Á mờ châu Âu nam 2016 neh cèng wơl ală tam gơl niam tàm broă lơh sa kă bro, bơcri priă bơh bàr lơgar.

Khà priă kă bro bal bơh bàr lơgar nam 2017 geh rơlao 200 tơlăk đôlar Mỹ, nam 2018 geh 268 tơlăk đôlar Mỹ mờ di gơlan tàm nam do geh sơrlèt mờ khà priă tàm nam 2018.

Thủ tướng sồr, bàr gah pal pơn jăt tai chồl pràn broă tam gơl mpồl anih lơh sa kă bro, bơyai lơh chờ drà tăc phan, ràng tơl^k,pơrjum cri bơyai anih lơh sa kă bro tàm bàr lơgar; chồl pràn broă bơcri priă bal; tơnguh broă lơh bal tàm ală gah broă geh bơta pràn ndai bè lơh sa suơn sre, bơto bơtê mờ bơsram, khoa học – kỹ thuật, bơta chài rơgơi tàp pràn să jan, nhơl chờ.

Cau mblàng Ndong Brawl