VOV4.K’ho- Lơh jăt broă rơndăp lơh bơh Ủy ban Nhân dân càr Gia Lai dê bè broă dờp làng bol Việt Nam bơh lơgar Lo mờ ală lơgar geh kòp as sồt gùng tă nhơm mhar kơn jơ\ tài bơh jơi pa virus Corona rê hờ Việt Nam lòt gan gơl gùng nhàr lơgar bơh càr dê, 3 kơnhoàl Đức Cơ, Chư Prông mờ Ia Grai lơh 8 anih dờp, cih măt, sac rwah tam cah is bơh sơnrờp.

Tàm kơnhoàl Chư Prông geh 3 anih dờp, tàm hơ\ geh tiah nhàr lơgar gơ wèt Pôs đồng ling sền gàr tiah nhàr lơgar Ia Puch, Pôs đồng ling sền gàr tiah nhàr lơgar Ia Mơr mờ Pôs đồng ling sền gàr tiah nhàr lơgar Ia Lốp. Tàm ală tiah do, neh lơh ală anih kơryan tàm gùng nhàr lơgar mờ là tiah dờp cih măt bơh sơnrờp; lơh ală hìu toaltăng, cơldu\ ơm lơh anih tam cah is ing ai ală cau tơnơ\ mờ tu\ neh geh sac rwah tam cah is bơh sơnrờp in. Tu\ do, ală anih geh mpồl ling sền gàr tiah nhàr lơgar mờ ală mpồl lơh broă geh gơnoar drơng gak sùm ngai kung bè mang rcăng lơh jăt kơnòl broă. 

Cau mblàng Lơ Mu K’Yến