VOV4.K’ho- Drim 3/12, Mpồl đơng lam Đảng bộ càr Gia Lai sơnđờm mu\t pơrjum dơ\ 20, yal kơrnoat bơh Ban Bí thư dê bè broă lơh kuang bàng. Jăt bơta jàu kơnòl bơh Ban Bí thư Đảng dà lơgar dê, ồng Dương Văn Trang, Ủy viên Đảng dà lơgar, Bí thư Tỉnh ủy Gia Lai neh jàu kơrnoat bơh Ban Bí thư dê bè broă pồ ồng Nguyễn Xuân Phước, Kuang ătbồ Cơldu\ lơh broă Tỉnh ủy tus bal lơh broă Ủy viên Mpồl đơng lam Đảng bộ càr Gia Lai tơngai bơh nam 2015- 2020.

Ồng Nguyễn Xuân Phước deh nam 1972, [òn tờm kơnhoàl Nga Sơn, càr Thanh Hoá, geh pồ lơh Kuang ătbồ Cơldu\ lơh broă Tỉnh ủy Gia Lai bơh nhai 11 nam 2018. Lài hơ\, ồng Phước neh lơh uă gơnoar broă tàm Cơldu\ lơh broă Tỉnh ủy Gia Lai.

Tàm pơrjum dơ\ do, Mpồl đơng lam Đảng bộ càr Gia Lai geh pơrjum cribơyai uă tơngume kuơmàng, bè: sền swì broă lơh jăt kơnòl broă lơh broă nam 2019, rong bal ală broă jàu, kơnòl broă tờm tàm nam 2020; ring bal jơnau yal broă lơh sền swì, gròi sền, lơh jăt kơrnoat lơh glài tàm Đảng nam 2019, gùng dà broă lơh mờ kơnòl broă nam 2020; sền sră yal bè rcăng cih dơ\ sơnrờp Jơnau yal chính trị bơh Mpồl đơng lam Đảng bộ càr khoá 15 dê yal mờ Pơrjum dờng cau ala măt Đảng bộ càr dơ\ 16, tơngai lơh broă bơh nam 2020- 2025.

Cau mblàng Lơ Mu K’Yến