1-Uă gùng dà broă lơh kwơmàng geh lơh nền tàm nggùl tơngai lơh broă Pơrjum dờng dơ̆ XIII bơh Đảng dê

Tàm pơrjum dơ̆ 7, bal mờ broă sền sơwì tơl làm, di pal ngan ală cồng nha lơh geh, Ƀan Cấp hàñ Dà lơgar neh ai geh 5 jơnau bơsram mờng chài; ai tơlik 5 kơnòl broă tờm tàm nggùl tơngai lơh broă khoă XIII dê; ai sră pồ pin dờn ală kwang bàng Ƀộ Cíñ trị mờ Ƀan Ƀí thư. Tàm pơrjum dơ̆ 8, Ƀan Cấp hàñ Dà lơgar neh ai lơh jat 4 Nghị quyết kwơ màng; sền sơwì, tă pơgồp jơnau đơs rơcăng lài kwang bàng Ƀan Cấp hàñ Đảng tơngai lơh broă bơh nam 2026-2031. Bàr dơ̆ pơrjum Dà lơgar kwơmàng tàm nam lơh jat Nghị quyết Pơrjum dờng dơ̆ XIII đơs nền bơta đơng lam, sồr lơh kơ̆ kơl jăp, di gùng di dà bơh Ƀan Cấp hàñ Dà lơgar, Ƀộ Cíñ trị, Ƀan Ƀí thư mờ ală kấp ủy, mpồl Đảng dê tàm broă lam lơh jat Nghị quyết Pơrjum dờng dơ̆ XIII bơh Đảng dê, bơsong di tŭ, geh cồng nha uă broă pa gơlik geh tàm bơta geh ngan nàng jơh ală anih lơh broă cíñ trị in jơh nùs lơh ngan, pơnđơl pràn lơh ngan lơh sir geh cồng nha ală jơnau kờñ bơtàu tơnguh mờ Pơrjum dờng dơ̆ XIII dê neh ai.

2. Broă lơh Lơh broă mờ lơgar ndai đơs nền gơnoar broă mờ bơngă pin dờn bơh lơgar Việt Nam dê

Ală dơ̆ lòt còp kấp Dà lơgar tus lơgar Việt Nam bơh Tổng Ƀí thư, Củ tịc lơgar Lo Tập Cận Bình, Kwang atbồ lơgar Mỹ Joe Biden mờ uă kwang đơng lam bồ kấp dờng ală lơgar dê; ală dơ̆ lòt còp ngan ngồn bơh bơh Kwang đơng lam bồ Đảng, Dà lơgar Việt Nam dê tus uă lơgar lơh geh ală tềl lời wơl kwơmàng bơh broă lơh Lơh broă mờ lơgar ndai bơh lơgar Việt Nam dê. Nam 2023, lơgar Việt Nam mờ lo neh ring bal bơt bơtàu “Mpồl bơtiàn tam pà bal rài tơnơ̆ do đah Việt Nam mờ Lo” tơnguh bơta gĭt gơ̆p tus “Lơgar lơh broă bal kwơ màng tơl làm” mờ lơgar Mỹ mờ Nhờk, tơnguh bơta gĭt gơ̆p tus lơh broă bal tơl làm, lơh broă bal kwơ màng mờ lơh broă bal jŏ jòng tơl làm mờ 30 lơgar, tàm hơ̆ geh 5 nă Kwang bàng lơh broă sùm tàm Hội đồng Bảo an Liên hợp quôk. Pang sră “Bơt bơtàu mờ bơtàu tơnguh rài lơh broă mờ lơgar ndai, cribơyai broă mờ lơgar ndai lơgar Việt Nam tơl làm, pa ngan, cèng bềng bơhiàn niam bơnĕ “Tờm gle Việt Nam” bơh Tổng Ƀí thư Nguyễn Phú Trọng dê tơlik mat, là bơnàng jă kwơ màng bè jơnau cih tàm sră pơ àr mờ bơta geh ngan, tơngŏ bồ tơngoh ờ tŭ lơi tam gơl, lơh sùm bơh Đảng dê bè gùng dà broă lơh lơh broă mờ lơgar ndai, cribơyai broă mờ lơgar ndai bơh lơgar Việt Nam dê. Cồng nha bơh broă lơh lơh broă bal mờ lơgar ndai nam 2023 neh lơh ngan ngồn gùng dà broă lơh lơh broă bal mờ lơgar ndai tàm Pơrjum dờng dơ̆ XIII bơh Đảng dê, pơgồp bơnah lơh geh mờ gàr kơ̆ tiah ơm kis ring lơngai, kơ̆ kơl jăp nàng bơtàu tơnguh, tơnguh uă gơnoar broă mờ bơngă pin dờn bơh Dà lơgar dê.

3. Lơh sir broă lơh gròi sền gơnăp gơnoar; lơh pràn rcang sơndră sa kuề, sa kuà mờ bơta ờ niam

Nam 2023, Ƀộ Cíñ trị ai lơh jat uă jơnau cih bè gròi sền gơnăp gơnoar, rcang lài sơndră sa kuề sa kuà mờ bơta ờ niam tàm broă lơh kwang bàng; lùp sền, yal yă, cah rơña, lơh jat kơrnoat lơh glài; lòt sền, jat sền, lơh jat kơrnoat lơh glài Đảng mờ broă lơh lùp sền, kờp dŭ dơ̆ ngui priă jền. Ală jơnau sồr do pơgồp bơnah tơnguh tai gròi sền kràñ gơnăp gơnoar bơh kwang bàng, đảng viên, ngan là bơh cau lam bồ dê. Pang sră : “Kràñ cê jơh nùs, kơ̆ dơn nùs nhơm rcang lài sơndră sa kuề sa kuà mờ bơta ờ niam, pơgồp bơnah bơt bơtàu Đảng mờ Dà lơgar he dê ngai sơlơ sàng goh, pràn kơl dang, kơ̆ kơl jăp” bơh Tổng Ƀí thư Nguyễn Phú Trọng dê tơlik mat, pơgồp bơnah lơh loh làng nùs nhơm bồ tơngoh kơlôi sơnơng jơnau cih tàm sră pơ àr bơh Đảng he dê bè broă lơh rcang lài sơndră sa kuề, sa kuà mờ bơta ờ niam, lơh niam wơl Đảng. Broă pơn jat tai lùp sền rề ơnàng tơngai dơ̆ 2 dơ̆ lơh tìs gơrềng tus Kông ty Việt Á, dơ̆ lơh tìs gơlik geh tàm Kụk Lãñ sự (Ƀộ Ngoại giao); ală dơ̆ lơh tìs gơlik geh tàm Tập đoàn FLC, Tân Hoàng Minh, Ƀòn brê bơnơm Kông ty AIC, dơ̆ lơh tìs gơlik geh tàm Ngân hàng SCB, Tập đoàn Vạn Thịnh Phát, Kông ty An Đông... lơh glài uă cau lơh tìs là kwang bàng kấp dờng, geh bal cau gam tàm tơngai at gơnoar broă mờ cau neh jơh sơnam lơh broă jat nùs nhơm “ờ geh tiah kơryan, ờ geh bơta bơdìh, bulah cau hơ̆ là cau lơi” pơgồp bơnah bơt bơtàu bơta pin dờn bơh kwang bàng, đảng viên mờ làng bol dê gơwèt mờ Đảng, Dà lơgar.

4. Lơh sa Việt Nam bơtàu tơnguh kơ̆ kơl jăp tàm dùl dunia bềng bơta ờ niam

Nam 2023, ală jơnau kờñ dờng bơh rài lơh sa dê neh lơh geh, lơh sa dờng sền bal là kơ̆ kơl jăp, kờp dŭ lài gơguh GDP kờp dŭ lơh geh rlau 5%, ală tàm pơndrờm bal dờng geh gàr niam. Dùl ròt broă lơh nam priă jền, priă ngui tàm khà dờng ngan rlau jơh bơh lài tus tŭ do geh lam lơh dùl ròt bal, kràñ cê jơh nùs nàng kờñ dong kờl bơtàu tơnguh wơl, bơtàu tơnguh lơh sa- mpồl bơtiàn; lơh sir ală broă lơh, broă dong kờl nàng lơh niam tiah bơcri priă lơh, lơh sa kă bro, gàr niam giă, giă phan bơna kwơ màng mờ tă bơsong kal ke ai drà priă jền, ù tiah, bơt bơtàu, kă bro hìu đam in. Bulah ờ lơh geh jơnau kờñ gơguh lơh sa geh ai, mơya do là bơta pơnđơl pràn lơh ngan pal cih dờp ngan tàm tơngai lơh sa lơgar Việt Nam dê kong mờ bơta gơrềng bơh uă “bơta kal ke dê”.

5. Bơtàu tơnguh mhar tàm bơt bơtàu phan bơna gùng lòt- lơh geh bơnàng jă tơnguh mhar bơtàu tơnguh

Nam 2023, Việt Nam neh pơnđơl pràn lơh ngan tă bơsong bơta kal ke bè broă lơh, broă dong kờl, lơh geh bơtàu tơnguh mhar bè broă lơh bơt bơtàu phan bơna bè sơnđờm mut lơh rơndăp broă lơh Anih năc ơm gơn mờ gùng mù mờ par blàng rơndeh par Long Thành; lơh sir 730 kơi sồ gùng lòt mhar, tơnguh kờp jơh bơta jòng gùng lòt mhar gùt lơgar dê  tŭ do là mờr 1 rơbô 900 kơi sồ; tŭ do gam mut lơh mờr 1 rơbô 700 kơi sồ gùng lòt mhar tàm tơrbŏ bal tiah đah Tô- đah Jum Dà lơgar, tiah đah Mat tơngai lik- đah mat tơngai mut Dà lơgar. Bal mờ hơ̆ là dùl ròt ală rơndăp broă lơh phan bơna bơt bơtàu gùng lòt ndai mờ kờp jơh khà bơcri priă Dà lơgar dê rlau 94 rơbô tơmàn đong, pơgồp bơnah tă bơsong ală bơta kal ke gùng lòt, hời rơ hời lơh sir broă tàm tơrbŏ bal mờ kơnhoàl ù tiah, lơh geh bơta gơn kơnờm nàng tơnguh mhar bơtàu tơnguh lơh sa- mpồl bơtiàn. Mờ bơta đơng lam kràñ cê jơh nùs bơh Cíñ phủ dê, ală Ƀộ, ngàñ, ală tiah neh geh tam gơl dờng tàm bồ tơngoh kơlôi sơnơng, geh broă lơh bơceh lơh, tơrmù ƀà sră nggal mờ ală broă lơh ndai, tơnguh uă nùs nhơm geh kơnòl, gàr geh tŭ tơngai lơh ală broă lơh, rơndap broă lơh dê.

6. 80 nam Tơngume bè niam chài Việt Nam

Tơngume bè niam chài Việt Nam, mờ 3 kơrnoat pal jat lơh geh rài niam chài kăc màng Việt Nam; jơi bơtiàn, khoa họk mờ làng bol, lòt gan 80 nam kờp bơh tŭ crơng gơss, kung gam gàr niam ală bơta kwơ tờm bơh dùl sră nggal cèng gơnoar broă đơng lam dê, gam bè ờs bơta kwơ jơnau cih tàm sră pơ àr mờ bơta pa tŭ do jrô ơnàng làm uă, pơn jat tai sòl gùng ai broă lơh bơt bơtàu mờ sền gàr Dà lơgar. Ală broă lơh tơngkah kir sơnrai 80 nam tơlik mat sră Tơngume bè niam chài Việt Nam neh mblàng uă jơnau yal tơngĭt geh kwơ ngan, nàng kờñ pơn jat tai ngui niam bơta kwơ kah yau, bơta kwơ geh ngan bơh Tơngume dê, nàng bơta niam chài ngan ngồn gơ gơs bơnàng jă nùs nhơm dê, bơta pràn tàm dơlam is, bơta gơn kơnờm bơtàu tơnguh Dà lơgar mờ sền gàr Dà lơgar dê bè jơnau sồr tàm Nghị quyết Pơrjum dờng dơ̆ XIII bơh Đảng dê.

7. Uă dơ̆ ồs sa, bơr toh kơn jơ̆ ngan lơh gơbàn jơnau gơ lời wơl kơn jơ̆ kơn jŭt ngan

Mờr 2 rơbô dơ̆ ồs sa, bơrtoh, mờr 150 nă cau chơ̆t, lơh hoàc huơr phan bơna kơn jơ̆ kơn jŭt ngan tàm nam 2023, tàm hơ̆ kơn jơ̆ ngan rlau jơh là dơ̆ ồs sa hìu làng bol ơm kis bal dềt gơlik geh tàm ngai 12 nhai 9 tàm quận Thanh Xuân, ƀòn dờng Hà Nội, lơh 56 nă cau chơ̆t mờ 37 nă cau sồt să. Ală khà do bềng bơta gơ tơngòr đơs tus bơta pal tơngkah lài tàm broă lơh rcang sơndră ồs sa mờ crùh ồs sa dê, tàm hơ̆, geh bơta ờ hềt jơh nùs atbồ lời gơlik geh bơt bơtàu uă broă lơh tìs mờ kơrnoat boh lam, ờ gàr niam bơta lơngăp lơngai bè rcang sơndră ồs sa mờ crùh ồs sa; broă lơh lùp sền, lòt sền ờ hềt kràñ gơ lam tus broă lơh tìs jŏ jòng; bơta gĭt uă gàr niam bơta lơngăp lơngai, rcang sơndră ồs sa mờ crùh ồs bơh làng bol dê ờ hềt uă... sồr pal geh tam gơl wơl, lơh niam wơl kràñ cê jơh nùs.

8. Bơta ờ tơl sơnơm, phan bơna măi mok gah lơh sơnơm ờ hềt geh bơsong jơh

Bulah Quôk hội, Cíñ phủ mờ Ƀộ Y tế neh ai lơh jat uă sră nggal nàng kờñ “tă bơsong kal ke” ai gah lơh sơnơm in, mơya bơta ờ tơl sơnơm, ờ tơl phan bơna mai mok gah lơh sơnơm tàm ală hìu sơnơm bơh Dà lơgar tus ală tiah dê kung gam ờ hềt geh bơsong jơh. Jơnau tờm là tài gơrềng bơh kòp dờng Kovid-19, tài bơh ală sră nggal adat boh lam gam ờ hềt di pal; broă lơh jat tàm pơrlòng giă blơi phan, ngan là tàm pơrlòng giă tơrgùm gam kòl yal, ngan là geh nùs nhơm rơngòt, rngòt lơh tìs tàm uă cau dùl nă să, mpồl lơh broă mờ ală tiah dê... Bè jŏ jòng sồr pal geh ală broă lơh pràn kơl dang rlau tai nàng bơsong jơh bơta do.

9. Lơh nền tơngai lơh jat tam gơl pa broă lơh priă nhai

Broă lơh jat tàm gơl pa ală bơta broă lơh priă nhai jat tàm tiah lơh broă, gàr niam ờ lơyah rlau mờ priă nhai geh dờp tŭ do rơ̆p geh lơh jat bơh ngai 01/07/2024. Jơnau kờñ lam lài bơh broă lơh do dê là nàng priă nhai pal ngan ngồn là khà priă lơh tờm gàr tơl ngui tàm rài kis cau lơh broă mờ hìu bơnhă dê; dờp priă nhai di nàng bơcri ai bơtàu tơnguh mpồl cau lơh broă, lơh geh bơta gơn kơnờm tơnguh uă cồng nha lơh broă mờ gơtùi lơh broă, pơgồp bơnah kwơ màng lơh jat gơguh jak mờ ring bal mpồl bơtiàn, gàr niam kơ̆ kơl jăp cíñ trị- mpồl bơtiàn, chồl tơnguh, tơnguh uă bơta niam gơguh lơh sa mờ bơtàu tơnguh kơ̆ kơl jăp.   

10. Ờ tam gơl ală môn pơrlòng jơh bơsram kấp pe bơh nam 2025

Dơ̆ pơrlòng jơh bơsram kấp pe bơh nam 2025 rơ̆p geh bơyai lơh mờ 4 môn pơrlòng, tàm hơ̆ 2 môn sồr pal pơrlòng là Toán, Ngữ văn mờ 2 môn sac rơwah tàm ală môn pơrlòng tàm ơdŭ 12. Broă lơh do tơrmù ƀà bơta kơn jơ̆ pơrlòng mờ jat tàm nùs nhơm tam gơl pa bơh broă lơh bơto bơtê pe kấp, đơs di pal bơta pràn jak, tŭ tơngai bơsram sră bơh kơnòm bơsram dê dùl bă ngan ngồn, dong kơnòm bơsram lơh jat niam bơta pràn jak să tờm dê di pal mờ gùng dà pơlam broă bơto bơtê tàm kấp pe. Geh lơh jat bơh nam 2025, broă lơh do dờp geh bơta dùl nùs bal uă bơh uă ngan kơnòm bơsram, mè bèp kơnòm bơsram mờ cau pơgru dê.