Lŏ Nguyễn Thủy Triều, Kwang atbồ Cơl dŭ lơh broă – Kwang gơnoar cih Mpồl tam klăc kơphe Buôn Ma Thuột, càr Dăk Lăk pà git, Mpồl tam klăc kơphe Buôn Ma Thuột tŭ do gam lơh jơh pang website, pang internet mpồl bơtiàn, tus bal mpồl cih jơnau tàm mpồl bơtiàn kơphe bơkah lơgar Việt Nam dê, geh anih priă jền sồ tàm pang internet bơh Anih Bơkah kơphe ală lơgar dê, den tàng jơnau tơngit geh tơrgùm, bơsong pah jơ pah phút, cèng geh ală cau tàm mpồl in bơta niam tus bal ală dơ̆ pơrlòng mờ ràng tơlik tàm ală lơgar.

Ală broă lơh lơh broă bal kơlôi sơnơng, mờ ală ơdŭ bơto bơh jơnau tờm tus mờ jơnau git wă nền nòn, dong kờl kơphe lơgar Việt Nam lơh geh cồng nha bơh bơta bơkah ngan dê. Lŏ Nguyễn Thủy Triều đơs: “Mpồl tam klăc kơphe Buôn Ma Thuột geh dùl mpồl bơtiàn dờng ngan, geh tơl ală bơnah broă. Pah tŭ geh cồng nha kơlôi sơnơng bơta lơi bè kơphe ha là sră dờp bè kơphe den ală cau ndrờm pơyoa tus mpồl in nàng sền, pơyoa tus ai mpồl bơtiàn in. Ha là geh ală jơnau tơngit geh kwơ den cau tàm mpồl geh tam pà bal mơ ai mpồl tam klăc in nàng git mhar. Di lah jòi tàm mpồl bơtiàn internet den jŏ ngan, geh jòi ờ gŏ tơn”.

Bơh nam 2007, tŭ lơh jăt sồ jơh ală gah broă gam ờ hoan git tus, cau bơsram dờng – làng bol lơh broă sa Nguyễn Công Thịnh kis tàm ƀòn dờng Dà Làc, càr Lâm Đồng neh lơh geh dùl pang website mìng dùl tơngu me bè kơphe, tơrgùm nàng git priă tăc kơphe bơh ală drà kă bro ală lơgar dê, gơs mpồl cri bơyai pràn mờ geh kwơ. Tus tŭ do, Tây Nguyên neh geh tai sơlơ uă rơlao broă lơh sa sồ geh ngui geh cồng nha, tàm lơh sa, kă bro, pơgồp bal mờ bơto. Gơwèt mờ bi Đặng Công Kiên, Kwang atbồ Mpồl lơh broă bal lơh sa suơn sre Kiên Thảo Phát, kis tàm ƀòn drà dềt tiah nhàr lơgar Ngọc Hồi, càr Kon Tum đơs, tam gơl sồ ngai sơlơ geh kwơ mờ gơs phan lơh broă nàng bơ̆t bơtàu ală mpồl bơtiàn sồ geh gùng dà broă lơh bal.

Cồng nha bơh ală suơn tam tờm sầu riêng, kơphe hữu kơ bơh Mpồl lơh broă bal dê, ală phan vi siñ mờ Mpồl lơh broă bal lơh geh is, ndrờm kơnờm mờ broă tus bal bơh mpồl bơtiàn sồ bè lơh sa suơn sre niam: “Añ tus bal tàm mpồl bơtiàn lơh sa suơn sre niam mờ tơnơ̆ mờ hơ̆ geh bơsram dùl ơdŭ bè Organic geh ală cau pơgru bơh lơgar Australia bơto tàm 6 nhai tàm internet. Bơh jơnau git wă do añ neh ngui nàng lơh geh ală phan geh bơta bơkah uă. Mpồl lơh broă bal añ dê kung geh phan siñ họk ngui ai broă lơh sa suơn sre in bè kơphe, sầu riêng. Ală bơta ñhơ̆t lơh sơnơm den geh tam tàm mƀur chi nàng lơh gơs ce”.

Tam gơl sồ lơh sa suơn sre tàm Tây Nguyên tŭ do pơn jăt tai wèt jăt broă lơh gơs phan tŭ geh tai ală phan sồ mìng geh ngui nàng drơng tàm broă lơh sa suơn sre lơgar Việt Nam dê, bè AutoAgri, MobiAgri, VNPTGreen… Gam dong kờl ală mpồl lơh broă bal tam sầu riêng tàm kơnhoàl Krông Păc, càr Dăk Lăk lơh jăt broă ngui VNPT GREEN, Thạc sĩ Nguyễn Lê Anh Dũng, Kwang atbồ Anih tờm Măi mok pa (VNPT Dăk Lăk) pà git: bơdìh mờ broă ngui nàng ai ală suơn mờ mpồl lơh broă bal in, VNPT gam lơh jăt broă lơh niam lơh sa suơn sre sồ AIMS, dong kờl atbồ tơl ală bơta bơh broă lơh sơntìl tus mờ broă tam, sền gàr phan tam, ròng phan, lơh sơnơm phan ròng, phan tàm dà, bơtàu tơnguh lơh sa suơn sre tus mờ broă atbồ bơta bơkah phan geh lơh bơh lơh sa suơn sre, brê bơnơm, phan tàm dà dê: “Bol añ gam lơh jăt nền nòn tus tơl tiah nàng lơh geh mpồl cau lơh broă gam kơnòm, wă bè măi mok pa nàng tus bal mờ lơh broă bal tàm broă lơh geh khà broă ai bơta niam sồ in mờ bol añ gam lơh tàm do. Tus nam 2030, rơ̆p ai geh bơta kwơ khà geh neh lơh gơs tàm broă lơh mùl màl”.

Tàm pơrjum Hòi jà bơcri priă tàm gah lơh sa suơn sre, ƀòn lơgar tiah Tây Nguyên pa geh bơyai lơh tàm càr Gia Lai, Ƀộ trưởng Broă lơh sa mờ Bơtàu tơnguh Ƀòn lơgar ồng Lê Minh Hoan đơs sùm, Tây Nguyên mờ ală anih lơh broă bơh Ƀộ, bal mờ ală mpồl lơh sa kă bro… pal ngui ală bơta lơh sa sồ nàng lơh broă geh cồng nha rơlao, dong kờl lơh sa suơn sre bơh tiah do dê bơtàu tơnguh tơl jơh bè brê bơnơm, tam phan mờ ròng phan, lơh geh lơh sa suơn sre uă bơta kwơ bè jơnau kờñ neh geh ai tàm Jơnau lơh nền sồ 23 nam 2023 bơh Ƀộ Cíñ trị dê: “Añ sồr càr Gia Lai, Kon Tum, Dăk Lăk, Dăk Nông mờ Lâm Đồng lơh geh dùl dơ̆ cri bơyai nàng ai geh uă rơlao tai bơta niam hòi jà bơcri priă ai gah lơh sa suơn sre in, tơrgùm geh uă bơta kwơ ờ gŏ di mìng geh dùl bơta kwơ tai. Do là jơnau lơh nền bơh Đảng dê bloh. Tŭ do geh bơta niam pa bloh, dunia ring bloh, geh uă broă lơh nàng he lơh broă bal. Kwơ màng ngan là jơnau kờñ he dê lơh geh”.

Broă tam gơl sồ gam geh lơh pràn kơl dang, dong kờl tơl cau lơh broă sa, mpồl lơh sa kă bro, mpồl tam klăc gah broă lơh tàm Tây Nguyên (tàm hơ̆ uă ngan là tàm gah broă lơh sa suơn sre) sền gŏ loh làng ală bơta niam nàng tus bal, ñhăp ñhar sơn đờm mŭt lơh broă mờ lơh geh cồng nha.