Thủ tướng Cíñ phủ đơs nền, bơta gĭt gơ̆p đah Việt Nam mờ Brazil tus tŭ do tơrgùm 5 bơta ndrờm bal, bơtơl nùs nhơm tờm, geh bal: geh bồ tơngoh kơlôi sơnơng ndrờm bal, pin dờn bal; geh bơhiàn niam chài rềp mềr, geh rài lơh sa dong kờl bal mờ sơlơ tơnguh tai bal mờ gơ̆p; geh bal bơta kơ̆p kờñ ring lơngai brồ guh uă ngan. Thủ tướng Cíñ phủ jờng rơ tàm ală bơta ndrờm bal hơ̆, bơta gĭt gơ̆p đah Việt Nam mờ Brazil tàm tơngai pa do neh geh ală broă lơh bơtàu tơnguh jơh nùs tàm uă gah, tàm hơ̆ geh 2 lơgar sùm tàm pơgồp mpồl kwang bàng kấp dờng mờ ală kấp, lơh sa- kă bro phan gơguh kơ̆ kơl kăp, mờ 2 gah kung pơgồp bal niam tàm ală  dơ̆ pơrjum uă lơgar.

 Tơngŏ bơta ring bal mờ ală jơnau đơs bơh Thủ tướng Cíñ phủ ồng Phạm Minh Chính dê, Kwang atbồ lơgar Brazil ồng Lula da Silva ring bal rơ̆p pơgơl bal lam lơh ală broă lơh sơlơ tơnguh rlau tai bơta gĭt gơ̆p 2 lơgar tàm tơngai tus, geh bal sơlơ tơnguh tai tàm pơgơl mpồl kwang bàng mờ tìp mat kwang bàng ală kấp, is ồn tàm kwang bàng kấp dờng; pơgồp bal lam lơh geh cồng nha ală sră nggal lơh broă bal neh kĭ hơ.