Ala măt mpồl Củ tịc Pơrjum dờng, Củ tịc Mpồl cau lơh broă sa Việt Nam Lương Quốc Đoàn pà git, tàm khà 119 nă kwang bàng geh jơng tàm Mpồl đơng lam Mpồl cau lơh broă sa Dà lơgar Việt Nam khoă VIII, Pơrjum dờng pồ geh 111 nă kwang bàng, tơnơ̆ mờ hơ̆ geh pồ bơtơl 8 nă kwang bàng tàm tơngai di pal.

100% kwang bàng neh ring bal mờ khà măt geh ai tơlik mờ bơyai lơh đùh sră pồ Mpồl đơng lam Mpồl cau lơh broă sa Dà lơgar Việt Nam khoă 8, tơngai lơh broă bơh nam 2023 tus 2028. Tơnơ̆ mờ tŭ ală kwang bàng đùh sră, Mpồl kwang bàng kờp sră pồ bơh Pơrjum dờng neh bơyai lơh kờp sră. Mờ nùs nhơm geh kơnòl, mhar, ring bal, song dơ pă, lơh tờm, Mpồl kwang bàng kờp sră pồ  neh lơh gơs kơnòl broă geh jào. Jăt broă rơndăp lơh geh ai, ngai do (27.12) Pơrjum dờng geh bơyai lơh pơrjum tơn jơh. Mpồl đơng lam Mpồl cau lơh broă sa Dà lơgar Việt Nam khoă 8, tơngai lơh broă bơh nam 2023 tus 2028 geh tơlik măt Pơrjum dờng.