Olimpic Tin họk câu Á Thái Bìñ Dương nam 2023 geh bơyai lơh jăt broă lơh pơrlòng tàm internet mờ 1 rơbô 471 nă cau pơrlòng gơwèt 36 lơgar mờ kơnhoàl ù tiah tus bal (tàm hơ̆ geh 3 lơgar là Canada, Mexico, Brazil geh jà tus bal pơrlòng ờ geh jào khà); lơgar Lo là lơgar geh dờp bơyai lơh. Mpồl pơrlòng lơgar Việt Nam geh 15 nă cau, pơrlòng tàm internet tàm Hìu bơsram Đại họk Kông nghệ, Đại họk dà lơgar Hà Nội ngai 20 nhai 5 nam 2023.

Jăt kơrnoăt bơh Mpồl bơyai lơh pơrlòng Olimpic Tin họk câu Á Thái Bìñ Dương dê, lơgar Việt Nam geh rơwah 06 nă cau pơrlòng geh điểm uă ngan tus bal rơwah khà. Jăt cồng nha bơh Mpồl bơyai lơh dê, jơh 6 nă cau pơrlòng geh rơwah khà lơgar Việt Nam dê ndrờm geh gai lòng, lơgar Việt Nam ơm dơ̆ 9. Mờ cồng nha do neh ai gŏ bơta niam broă bơto bơtê phổ thông mờ gùng dà lòt di tàm broă gŏ, rơwah, bơto bơtơl kơnòm bơsram jăk bơh Ƀộ Giáo dục mờ Đào tạo dê. Mờ ai gŏ broă lơh ngan, lơh ngan uă bơh kơnòm bơsram, cau pơgru, hìu bơsram bal mờ gah bơto bơtê mờ bơsram dê tàm broă bơto jăk, bơsram jăk.