Geh lam lơh bơh ngai 07 nhai 03, broă pơrlòng kwơ màng chờ gờm tơnkah 120 nam Ngai crơng gơs càr Dăk Lăk mờ tơngu me “Kơ̆p kờñ bơ̆t bơtàu càr Dăk Lăk pas gơs niam bơnĕ, gơguh jăk, niam chài” neh lơh geh uă cồng nha mùl màl.

Ală anih lơh broă, mpồl lơh broă tàm càr neh lơh uă broă lơh mùl màl, geh cồng nha, bơh tŭ hơ̆, geh uă broă tơrlòng lơh, geh pơnrơ gơguh jăk bè: Kwang àng càr Dăk Lăk neh lơh gơs 1 rơbô 200 nơm hìu ơm dong kờl hìu rơƀah, kal ke bè hìu ơm, hìu nhă cau geh sră dong kờl, làng bol jơi bơtiàn ờ gal cau tàm càr in; Anih duh broă Mặt trận Dà lơgar Việt Nam càr lơh 300 nơm hìu tam klăc ai ală hìu rơƀah in; Anih duh broă Làng bol kơnhoàl Krông Păc lơh jăt broă tơrlòng lơh “Kis tàm nùs nhơm làng bol”; Anih duh broă ƀòn dờng Buôn Ma Thuột mờ ală rơndăp broă lơh ƀlàng nhơl Phan Huy Chú, rùp kah kơlôi Mậu Thân, ƀlàng nhơl Nguyễn Tất Thành.