Đơs tàm dơ̆ cribơyai, Thủ tướng Cíñ phủ ồng Phạm Minh Chính hòi jà ală lơgar pal geh broă lơh pràn cíñ trị uă rơlao tai, bơta pràn priă jền uă rơlao tai, lơh broă pràn rơlao tai ai ală broă lơh, rơndăp broă lơh mùl màl, geh cồng nha rơlao. Tài tơn jơh jơgloh rơƀah ờ mìng geh kwơ kòn bơnus in, mờ gam là dùl tàm ală bơta tờm kwơ màng ngan, lơh gơrềng tơn tus tàm bơta ring lơngai, lơngăp lơngai gùt plai ù.

Di tàm dơ̆ do, Thủ tướng Cíñ phủ ồng Phạm Minh Chính kung neh yal ală cồng nha bơh lơgar Việt Nam bè dùl broă lam lài lơh geh cồng nha tàm broă tơn jơh jơgloh rơƀah. Bơh dùl lơgar jơgloh rơƀah, ờ pràn, gơtìp aniai uă tơnơ̆ mờ mờr 40 nam tam lơh, 30 nam gơtìp kơrian, mờ gùng dà tam gơl pa, lơgar Việt Nam neh lơh geh jơnau tơmù rơƀah uă bơta, geh bal mờ broă bơsong bơta ờ tơl bè lơh sơnơm, bơto bơtê, hìu ơm, dà sàng kloh, tiah kis. Kơnờm mờ hơ̆, den tàng lơgar Việt Nam neh lơh gơs gờñ rơlao 10 nam tàm broă lơh jăt ală Jơnau kờñ bơtàu tơnguh rài rơbô bơh Liên hợp quốk ai.