Dờp jơnau jà bơh Tổng Ƀí thư Nguyễn Phú Trọng mờ Pơ ùr, Củ tịc lơgar Võ Văn Thưởng mờ Pơ ùr, sơnđờm bơh ngai 12/12, Tổng Ƀí thư, Củ tịc lơgar Lo Tập Cận Bình mờ Pơ ùr rơ̆p còp kấp Dà lơgar tus lơgar Việt Nam tàm 2 ngai. Do là dơ̆ lòt còp lơgar Việt Nam dơ̆ 3 bơh ồng Tập Cận Bình dê tàm gơnoar broă là Tổng Ƀí thư, Củ tịc lơgar Lo, lài hơ̆ là tàm ală nam 2015, 2017 mờ lơgar Việt Nam là lơgar dơ̆ 2 ồng Tập Cận Bình lòt còp tàm nam do mờ ờ pơgồp bal mờ ală broă lơh uă lơgar.

Kờp dŭ tàm dơ̆ lòt còp dơ̆ do, bàr gah rơ̆p cribơyai bè broă tơnguh uă gơnoar broă pa ai bơta gĭt gơ̆p đah 2 gah, chồl tơnguh lơh broă bal kwơ màng tơl làm đah 2 lơgar mut lơh jrô ơnàng làm uă mờ lơh ngan ngồn rlau tai. Bal mờ bơta niam bơta gĭt gơ̆p 2 lơgar dê bè lơh broă bal lơh sa- kă bro, bè bơta gĭt gơ̆p cíñ trị, lơh broă bal, tìp mat lơh kwèng đah Đảng, đah 2 Cíñ phủ, Quôk hội halà Nhân đại, Mặt trận Dà lơgar halà Cíñ hiệp kung bè đah ală Ƀộ, ngàñ kwơ màng bè Cribơyai broă mờ lơgar ndai, Sền gàr Dà lơgar, Kwang àng, ală tiah tiah nhàr lơgar mờ tìp mat lơh kwèng làng bol 2 lơgar lơh geh uă cồng nha geh ngan, cèng wơl bơta kwơ ngan ngồn ai làng bol 2 lơgar in.