Jăt jơnau yal tàm pơrjum, tơngai lơh broă bơh nam 2021- 2025, ală càr Tây Nguyên geh Dà lơgar dê jàu rlau 11 rbô 700 tơmàn đong nàng lơh 03 Broă lơh Jơnau kờñ Dà lơgar dê. Priă jền do geh tus rlau 11,73% kờp jơh priă bơcri bơtàu tơnguh bơh Dà lơgar dê ai 03 Broă lơh Jơnau kờñ Dà lơgar dê tàm jơh gùt lơgar. Mìng is nam 2022, Dà lơgar pà 3 rbô 878 tơmàn đong mờ ală càr Tây Nguyên neh ai 877,024 tơmàn kes priă càr dê nàng lơh ală broă lơh. Tus ngai 31/12/2022, ală càr tàm tiah Tây Nguyên rơ̆p pa ai 34,77% khà priă Dà lơgar dê jàu, (lơyah rlau 2,96% pơndrờm mờ khà ai priă kờp bal bơh gùt lơgar dê). Nhai 01/2023, neh geh 3 tàm khà 05 càr là Kon Tum, Lâm Đồng, Dăk Nông lơh sir broă tam pà priă bơh nam dê.

            Yal mờ Phó Thủ tướng in bè bơta geh ngan lam lơh ală broă lơh, ală càr tàm tiah Tây Nguyên ndrờm yal uă bơta gơkòl, bè ờ tơl ală sră nggal bơto pơlam tơngume bơh Dà lơgar dê; bàr pe jơnau bơto pơlam, jơnau ai neh geh ai lơh jăt mơya bơta wă wờng ờ hềt ring bal halà ờ hềt dipal mờ bơta geh ngan tàm tiah Tây Nguyên mờ tơl tiah dê. Mò Nguyễn Thị Thanh Lịch, Phó Củ tịc Ủy ƀan Ñân zân càr Gia Lai, đơs: Tŭ do, ală tŭ lơh nàng dùl ròt bal ală jơnau bơto pơlam bơh Cíñ phủ, ƀộ, ngàñ mờ càr dê gam tìp uă kal ke. Dơ̆ bàr là, ală broă jàu lơh, geh bàr pe broă jàu ờ hềt ngan ngồn dipal mờ ală bơta lơh sa- mpồl bơtiàn tàm càr Gia Lai. Broă dơ̆ pe là broă lam lơh pơgồp bal ală bơnah priă, broă jàu, bơto pơlam nàng ngan ngồn geh cồng nha, gơ gơs bơta pràn bơtàu tơnguh lơh sa- mpồl bơtiàn gam tìp uă kal ke, gơkòl.

            Bơh bơta geh ngan ală bơta gơkòl tàm Tây Nguyên, kwang đơng lam bồ ală càr neh dan geh bàr pe broă lơh nàng Cíñ phủ in sền swì. Ồng Nguyễn Hữu Tháp, Phó Củ tịc Ủy ƀan Ñân zân càr Kon Tum, đơs: Ală jơnau dan tàm do là gờñ ai lơh jăt ală jơnau ai bè pơgồp bal bơnah priă tàm ƀòn lơgar. Dơ̆ bàr là gờñ ai lơh jăt ai khà, bơto pơlam, tàm hơ̆ geh ù ơm, ù lơh sa ai làng bol in, kwơmàng là tiah sar lơgar ngài. Tàm tơngai ơm kơ̆p bơto pơlam loh làng rlau, càr kung gam tơrgùm lam lơh jăt broă rơndăp lơh nàng kờñ lơh geh broă jơnau kờñ broă rơndăp lơh mờ tơrgùm ai priă jền nàng lơh jăt di tơngai ai priă jền.

            Tơnơ̆ tŭ iăt ală tiah yal, dan, Phó Thủ tướng Cíñ phủ ồng Trần Lưu Quang cih dờp mờ jờng rơ ngan bàr pe bơnah broă mờ ală càr Tây Nguyên neh lơh geh, lơh geh bơnàng jă nàng lơh ală bơnah broă pơn jăt tai. Phó Thủ tướng sồr ală tiah gờñ lơh sir broă jàu priă; ngui priă dipal gơwèt mờ tơl broă lơh; sồr ală anih lơh broă, ƀộ ngàñ dà lơgar lơh tơn broă kờp sền, lơh sir ală jơnau ai tơngume gam ờ hềt geh. Bè đah ală tiah, Phó Thủ tướng sồr pơn jăt tai lơh mhar ală broă gam lơh; sơlơ tơnguh tai broă lơh pơgồp bal đah ală tiah mờ ƀộ ngàñ dà lơgar mờ broă lơh pơgồp bal tàm ală anih lơh broă, ală tiah bơh càr dê tàm tŭ lam lơh jăt. Phó Thủ tướng Cíñ phủ ồng Trần Lưu Quang, đơs: Añ sồr, tàm càr, oh mi Củ tịc Ủy ƀan Nhân zân càr halà Phó Củ tịc Ủy ƀan Ñân zân càr drơng kơnòl broă ală broă lơh rơ̆p là “cau đơng pơlam pơgồp bal”, ơm nggui đah ală anih lơh broă nàng geh jơnau đơs bơsong. Mờ gơnoar broă là Phó Thủ tướng Cíñ phủ, Kwang ătbồ Mpồl đơng lam Dà lơgar, añ rơ̆p là cau đơng pơlam pơgồp bal ơm nggui bal mờ ală tiah mờ ală oh mi là ƀộ trưởng, thứ trưởng ờ hềt ring bal jơnau đơs, nàng ală oh mi khin cha lơh. Kơ̆p kờñ ală tiah tàm lùp bơsram bal bơta mờng chài bal mờ gơ̆p, geh tiah ai priă mhar ngan, lơh niam ngan. Kung tàm bơta jăt tàm bơnàng jă adat boh lam hơ̆ den bè đah sră pơ àr là khi kung geh broă lơh, mờng chài, broă lơh lơi hơ̆ mờ he pal bơsram.

Phó Thủ tướng Cíñ phủ ồng Trần Lưu Quang kung đơs là, tơngai nàng lơh sir ală Broă lơh Jơnau kờñ Dà lơgar dê ờ gam uă tai, ală tiah tàm Tây Nguyên pal tơrgùm lam lơh mờ pal mhar bơsong ală bơta ờ hềt pràn jak; bơtơl ală broă gam ờ hềt dipal, gam ờ tơl mờ pal lơh sir jơh tàm qúy I nam 2023 do. Lồi dơ̆ pơrjum, Phó Thủ tướng Cíñ phủ ồng Trần Lưu Quang sồr tàm tơngai tus, Cơldŭ lơh broă Cíñ phủ tơrgùm wơl, tơrgùm kờp, dan mờ Phó Thủ tướng geh sră nggal sồr ală ƀộ, ngàñ ală tiah lơh tơn ală broă loh làng, geh pơn jăt bal tŭ tơngai yal mờ Cíñ phủ in.