Tus bal broă lơh “Nam pa cau ling” nam 2026 tàm sàh Quảng Trực, Đại tướng ồng Nguyễn Trọng Nghĩa, Kwang geh jơng Ƀộ Cíñ trị, Kong kơnòl Tổng kụk Cíñ trị Ling klàng làng bol Việt Nam pơyua jơnau lùp còp, pơn jờng ling klàng – làng bol tiah nhàr lơgar càr Lâm Đồng; mờ kung cih dờp, đơs niam cồng nha sền gàr dà lơgar, sền gàr lơngăp lơngai mờ broă lơh gàr niam ờdo ờdă rài kis mpồl bơtiàn bơh Ling tiah 7 dê, ngan là tàm tiah sar lơgar ngài, tiah nhàr lơgar: “Añ jờng rơ ngan Ling tiah 7 mờ Anih duh broă Làng bol càr Lâm Đồng neh geh broă lơh ngan ngồn, geh kuơ, dong làng bol tàm tiah nhàr lơgar bơh càr dê. Añ kơp kờñ là Đảng ƀộ, gơnoar atbồ, ling klàng mờ làng bol càr Lâm Đồng pơn jat tai tàm pơ dờn wơl, đòm jat nùs nhơm bơh 3 càr là Dăk Nông, Lâm Đồng mờ Bình Thuận dê nàng bơtàu tơnguh rlau tai, gàr niam kơnòl sền gàr dà lơgar, lơngăp lơngai; làng bol jơh nùs lơh broă, lơh sa, brồ guh lik klàs rƀah mờ lơh pas”.

Tàm tơngume broă lơh “Nam pa cau ling”, Ling tiah 7 neh sơn đờm lam lơh anih làng bol ơm kis rềp anih ơm gak ling klàng – làng bol tiah nhàr lơgar, mờ broă lam lơh 60 nơm hìu ơm rềp bal. Tơl hìu ơnàng 90 thơk vuông, geh broă lơh drơng hìu bơnhă in wil tơl, geh ƀlàng ìs, hìu ƀềp bal mờ ală cơldŭ ờs mờng ndai. Là dùl tàm ală hìu bơnhă pơn yờ să ngan geh rơ wah dờp hìu, bi Điểu Cường, kòn cau M’nông ơm tàm ƀòn Bu Nung, sàh Quảng Trực đơs: “Tŭ git hìu bơnhă añ geh mat geh jàu hìu dơ̆ do, bol hi chờ hờp ngan. Hìu geh lơh dờng niam, kơnhăp kơ̆ rơp dong jơh hìu bơnhă añ mut ơm kis. Ờ git đơs bơta lơi rlau mờ jơnau ưn ngài Ling tiah 7 mờ ală kâp, gah broă lơh. Hìu bơnhă añ rơp pơn đơl lơh sa, ơm kis, pơgồp bal mờ mpồl ling klàng sền gàr kơnhăp kơ̆ gơnoar tờm, lơngăp lơngai tiah nhàr lơgar mờ ƀòn lơgar Quảng Trực”.

Sàh Quảng Trực geh bă ù ơnàng mờr 559 kơi sồ vuông, ơnàng dơ̆ 2 gùt lơgar mờ mờr 40 kơi sồ gùng nhàr lơgar rềp càr Moundulkiri, lơgar Campuchia. Sàh geh mờr nggùl khà kờp làng bol là cau jơi bơtiàn dồ êt nă cau. Trung tướng ồng Lê Xuân Thế - Đơng lam Ling tiah 7 pà git, broă lơh ală anih làng bol ơm kis rềp anih ơm gak ling klàng – làng bol geh kuơ dờng màng ngan, pơgồp bơnah gàr gơnoar tờm lơngăp lơngai tiah nhàr lơgar: “Geh bơta ring bal bơh kâp ủy, gơnoar atbồ ală ƀòn lơgar dê, Gah đơng lam Ling tiah 7 neh lam lơh ală jơnau lơh nền ai ală anih làng bol ơm kis lơh tờm, rơhời lam lơh ală ƀòn làng bol ơm kis jat kềng gùng nhàr lơgar. Bơh hơ̆, ling klàng kơnờm tàm làng bol nàng sền gàr tiah nhàr lơgar, làng bol kơnờm tàm ling klàng nàng lơh broă, lơh sa, bơtàu tơnguh lơh sa, gàr kơ̆ rài kis, pơgồp bơnah sền gàr kơ̆ gơnoar tờm kơnhoàl ù tiah, lơngăp lơngai tiah nhàr lơgar bơh gờñ, bơh ngài, bơt bơtàu mpồl rơcang gàr tàm làng bol tàm tiah nhàr lơgar.”