Tàm sàh Sa Loong, càr Quảng Ngãi nggồr chờ nùs nhơm wă rò dùl kàl prang dùl sơnam pa is ồn ngan – Sơnam pa Sền gàr nhàr lơgar ram nùs làng bol ƀòn lơgar. Broă lơh bơh Mpồl Đơng lam Cau ling Sền gàr nhàr lơgar càr Quảng Ngãi pơgồp bal mờ Anih duh broă Làng bol sàh Sa Loong bơyai lơh, bềng lơm nùs nhơm ling klàng làng bol tiah nhàr lơgar. Cau ling Sền gàr nhàr lơgar càr Quảng Ngãi ai ală cau lơh sơnơm bềng bơta mờng chài să tờm tơn kham kòp, bơto pơlam mờ pà sơnơm ờ sa priă ai làng bol in. Mò Lường Thị Lá, ơm tàm thôn Hào Phú, sàh Sa Loong, pà gĭt: “Añ gơtìp kòp gơguh mhàm, kòp kồ ntìng, kòp ñâm ño jơng tê. Añ tus ndo den kham, den cau ling sền gàr nhàr lơgar kham añ in, den geh sơnơm. Ală kòp añ dê tŭ yal den ƀak sìh kung pà sơnơm sơl. Bơh dơ̆ Sa tềp do den digơlan chờ hờp, geh cau ling sền gàr nhàr lơgar, đơs bal là kâp hơđăng sền gròi den là añ ưn ngài ngan”.

Nùs nhơm Sa tềp sơlơ nggồr chờ tai bal mờ ală broă lơh klơm piang mbar kơnâm lơmpòng, kơnâm jòng mờ dar drà “zero đong”. Ală cau ling Sền gàr nhàr lơgar bal mờ làng bol klơm dơ̆ dùl nơm ƀanh, jàu tơl bơnah phan pà, cèng tus ai làng bol in dùl bơta Sa tềp ram mhŭ.

Tàm broă lơh “Sơnam pa Sền gàr nhàr lơgar ram nùs làng bol ƀòn lơgar” nam 2026 bơh Mpồl Đơng lam Cau ling Sền gàr nhàr lơgar càr Quảng Ngãi bal mờ ală mpồl lơh broă lòt bal neh jàu 450 bơnah phan pà, kờp priă mờr 300 tơlak đong pà ală hìu bơnhă dờp bơta dong kờl bơh mpồl bơtiàn dê, hìu rƀah mờ kơnòm dềt geh rài kis kal ke ir in. Pôs đồng Sền gàr nhàr lơgar Sa Loong gam dong kờl dùl hìu bơnhă rƀah dùl nơm kơnrồ sơntìl, lơh geh broă lơh broă sa nàng làng bol brồ guh klàs bơh rƀah.

Đại tá ồng Trương Thiên An, Ƀí thư Đảng ủy, Cíñ ủy Mpồl Đơng lam Cau ling Sền gàr nhàr lơgar càr Quảng Ngãi pà gĭt: “Bơh ală broă lơh, Cau ling Sền gàr nhàr lơgar càr Quảng Ngãi neh hòi jà dong kờl pà phan Sa tềp ai pơgăp 2 rbô hìu làng bol geh rài kis kal ke, hìu rƀah mờ hìu dờp bơta dong kờl mpồl bơtiàn dê tàm jơh gùt ù tiah càr; dong kờl broă lơh broă sa ai rlau 10 hìu bơnhă in. Ală sau kơnòm bơsram tàm broă lơh “Dong kờl oh lòt bơsram”, bol hi hòi tơrgùm ală bơnah dong kờl phan bơna, priă măt nàng ală oh geh priă blơi tai àu mpha, sră cih sră bơsram pơn jăt tai bơsram sră”.