Di tơnkah 96 nam ngai crơng gơs Đảng Kộng sản Việt Nam, chờ gờm cồng nha Pơrjum dờng dơ̆ XIV Đảng dê mờ rơcang wă rò Satềp nam pa nam Ơseh 2026, drim òr (10/02), Tổng Ƀí thư ồng Tô Lâm neh tus chu ñàng, pơdơng bơkào tơnkah ală Kwang đơng lam lài do bơh Đảng dê bal mờ ală cau ling khin cha jăk chài tàm Hưng Yên mờ Bắc Ninh.

Tàm nùs nhơm nền nòn, ngoh rơngăc, tàm Tiah lời kir ƀồc Tổng Ƀí thư ồng Nguyễn Văn Cừ (sơnah ƀòn Phù Khê, càr Bắc Ninh), Tổng Ƀí thư ồng Tô Lâm bal mờ Mpồl cau ala măt neh chu nàng, pơdơng bơkào kah kơlôi mờ ưn ngài broă lơh dờng màng bơh ƀồc Tổng ƀí thư ồng Nguyễn Văn Cừ dê, cau kộng sản lam lài, cau kòn jăk bơh jơi bơtiàn Việt Nam bal mờ ƀòn lơgar Bắc Ninh dê. Tàm Hìu kah kơlôi ƀồc Tổng Ƀí thư ồng Nguyễn Văn Linh (sàh Nguyễn Văn Linh, càr Hưng Yên), Tổng ƀí thư ồng Tô Lâm bal mờ Mpồl kwang bàng ala măt neh pơdơng bơkào, chu nàng tơlik nùs nhơm ưn ngài tềng đăp rùp Tổng Ƀí thư ƀồc ồng Nguyễn Văn Linh dê, cau đảng viên dờn song, jơh rài kis, tam dră tài bơta krơi is jơi bơtiàn mờ củ nghĩa sàh hội, cau đơng lam bồ jăk chài, bơceh lơh, lam lài “đơs mờ lơh”, cau kơnòm bơsram jăk bơh Củ tịc Hồ Chí Minh dê, cau kòn jăk ƀòn lơgar Hưng Yên dê.