VOV4.K’ho- Bal mờ cau pơrlòng gùt lơgar, tàm Tây Nguyên, ală cau tus bal dơ̆ pơrlòng jơh bơsram kâp 3 nam 2022 neh tus anih pơrlòng nàng lơh sră cih mat tus bal pơrlòng tàm mho ngai 06/7 mờ drim do mut tàm môn pơrlòng sơn rờp là môn Ngữ văn. Tàm Dăk Lăk, uă ngan ală oh tŭ geh lùp pà git, sền gŏ gơ lơh pin dờn rơcang mut tàm dơ̆ pơrlòng. Bulah uă dơ̆ pal tam gơl broă bơsram bơh bơsram tơn tus bơsram pờ tơlik tàm internet hơ̆ sồng bơh bơsram tàm internet rê wơl bơsram tơn tài gơ rềng bơh kòp Kovid-19 dê, lơh gơ rềng tus broă cih dờp jơnau bơto bơsram gơ wèt mờ kơnòm bơsram ơdŭ 12, mơya mờ bơta lơh ngan bơh să tờm mờ bơta jơh nùs bơh ală cau pơgru dê tàm tơngai pa do, uă ngan ală kơnòm bơsram pà git, să tờm he neh rơcang lài jơnau bơto bơsram, nùs nhơm niam rơcang tus bal dơ̆ pơrlòng do. Dơ̆ pơrlòng jơh bơsram kâp 3 nam do, Dăk Lăk geh rlau 20 rbô 400 nă cau cih mat tus bal pơrlòng tàm 32 anih pơrlòng.

Bơh drim ngai 06/7, Tỉñ đoàn Gia Lai neh bơyai lơh ai cau lơh broă lam lơh broă lơh “Pơlam- dong kờl nhai pơrlòng” nam 2022. Nàng kờñ dong cau pơrlòng mờ cau tờm hìu bơnhă cau pơrlòng dê tàm dơ̆ pơrlòng jơh bơsram kâp 3 nam 2022, Mpồl đơng lam broă lơh “Pơlam- dong kờl nhai pơrlòng” càr Gia Lai neh crơng gơs 39 mpồl ơruh pơnu lơh broă dong kờl is bal mờ 292 nă cau lơh broă dong kờl is.

Ală đoàn viên ơruh pơnu bơh càr Gia Lai dê neh geh mat tàm ală anih pơrlòng nàng pơlam, dong kờl ai dơ̆ pơrlòng jơh bơsram kâp 3 in

Ală cau lơh broă dong kờl is tus bal mờ kơnòl: yal tơnggit hìu ơm ờ sa priă, hìu ơm ơpah ờ kas priă, anih sàu sa ờ kas, gàr niam ờdo ờdă kloh niam phan sa ai cau pơrlòng mờ cau tờm hìu bơnhă cau pơrlòng in; dong kờl jun mờ rò cau pơrlòng tàm ală anih pơrlòng; dong ală cau pơrlòng geh rài kis kal ke; pà chèu glòm muh mat, dà hùc ờ sa priă ai ală cau pơrlòng in. Tơnơ̆ dơ̆ ai cau lơh broă, ală cau lơh broă dong kờl is neh sơbac mhar geh mat tàm ală anih pơrlòng nàng tus bal broă lơh “Pơlam- dong kờl” ai cau pơrlòng in.

Pơrlòng jơh bơsram kấp pe nam do, càr Lâm Đồng geh rlau 14 rơbô nă kơnòm pơrlòng tus bal cih mat dan pơrlòng. Nàng gàr niam dơ̆ pơrlòng geh bơyai lơh ƀuơn ƀoài, ờdo ờdă, niam mờ di mờ kơrnoat, càr neh ai 38 tiah pơrlòng mờ 629 cơldŭ pơrlòng, tàm hơ̆ geh 6 cơldŭ pơrlòng tàm bơrlŭ bal tàm ală kơnhoàl, ƀòn dờng tàm càr dê. Bơdìh mờ lơh ngan ală broă lơh rcang sơndră kòp, kloh niam, ờdo ờdă phan ngui sa, sền gàr bơta lơngap lơngai, rơndap tap sèng, ờdo ờdă gùng lòt, lòt rê ai ală kơnòm pơrlòng in, càr Lâm Đồng sồr gơnoar atbồ ală tiah tàm càr dong kờl di tŭ ală kơnòm pơrlòng geh rài kis kal ke bè priă jền sào sa, lòt rê.

Kwang đơng lam bồ càr Lâm Đồng lòt sền broă lơh rcang dơ̆ pơrlòng jơh bơsram kấp pe nam 2022 tàm ù tiah càr dê

Jat mò Trần Thị Vũ Loan, Phó Củ tịc Ủy ƀan Ñân zân ƀòn dờng Dà Làc đơs, bơdìh broă lơh geh ală bơta niam ngan rlau jơh ai ală kơnòm pơrlòng in, tài dơ̆ pơrlòng geh bơyai lơh tàm tơngai Dà Làc geh uă năc lòt nhơl tus sền, ơm rlô den jơnau gàr niam bơta ờdo ơdă gùng lòt, lòt rê sùm ai kơnòm pơrlòng in geh lơh lài ngan rlau jơh.

Cau mblàng K’Duẩn mờ K’Hạnh