Jat jơnau yal, kes priă dà lơgar nam 2024 dong kờl lam lơh 3 Broă lơh jơnau kờñ dà lơgar (geh: Broă lơh bơtàu tơnguh lơh sa – mpồl bơtiàn tiah làng bol jơi bơtiàn dồ êt nă cau mờ tiah kơh bơnơm; Broă lơh tơrmù rƀah kơ̆ kơljap mờ Broă lơh bơt bơtàu ƀòn lơgar pa) tiah Tây Nguyên là rlau 5 rbô 500 tơmàn đông, tàm hơ̆ priă bơcri bơtàu tơnguh rlau 3 rbô 400 tơmàn đông, priă bơcri broă lơh rlau 2 rbô 100 tơmàn đông. Ai priă bơcri dà lơgar tus ngai 30/6/2024, ală càr Tây Nguyên neh ai geh rlau 1 rbô 500 tơmàn đông, geh rlau 36% broă rơndap lơh.

Tus tŭ do, tiah Tây Nguyên geh mờr 373 xã geh jơnau lơh nền dờp tơl khà ƀòn lơgar pa; khà hìu bơnhă rƀah jat tơl khà rƀah uă gah nam 2024 bơh tiah do dê gơmù bơh 3 tus 4% pơn drờm mờ nam 2023. Tàm pơrjum, Phó Thủ tướng ồng Trần Lưu Quang đơs nền, nàng lam lơh geh cồng nha ală Broă lơh jơnau kờñ dà lơgar, ală càr pal lơh jơh kơnòl, jơh nùs, kràñ cê rlau tai tàm tơngai tus; ală càr pal tàm bơsram bal mờ gơp, càr lơi ờ hềt lơh gơtùi den pal bơsram ală càr lơh niam nàng bal mờ gơp lam lơh geh cồng nha kơnòl broă geh jàu.