Tàm gùl ală nsừc dà lềng gơ rơya, bồt lŭ Cô Lin sền gŏ bè dùl anih kơ̆ kơl jăp pơr đồng tàm dùl tiah dà lềng dờng ơning ơnàng ngan. Anih hơ̆ geh ală cau ling hòi  nhơl “ là 6 anih drơng gak”. Bồt ơm tềng hơđang bơnàng san hô ngơr dà, den tàng rài kis pah ngai bơh ală kwang bàng, cau ling gam gơtìp uă ngan kal ke. Mờ bơta is rơmis pơgồp bal tam lơh is, trồ tơngai duh trơ ồl, pah nam kwang bàng, cau ling bồt Cô Lin wă rò 6 nhai trồ tơngai mờ 6 nhai trồ mìu. Ală ngai dà lềng mìu càl, nsừc dà lềng dờng, càl khồm pràn neh lơh gơrềng uă ngan tus broă lơh bơh bồt dê, mơya ờ rngòt kal ke ală cau ling sùm ngai mang ơm gak sền gàr lơngap lơngai ai hơđang kơl wàng trồ, tiah dà lềng Dà lơgar dê in. Thiếu tá ồng Nguyễn Xuân Duy, Kwang đơng lam bồ bồt Cô Lin pà gĭt: “Ală rơnàng kwang bàng, cau ling bồt Cô Lin den ndrờm bơsram jrô ơnàng   làm uă ngan bơhiàn bơh bồt dê mờ ngan là kơnòl broă bơh bồt dê; sùm sùm gàr kơ̆ kung bè lơh jat niam bơhiàn tàm jơh bal tàm tŭ pơlam tàp mờ bơsram, broă lơh, pơgồp bơnah gàr kơ̆ gơnoar tờm bồt bơlào dà lềng, ù tiah mờ tàm tiah dờp lơh kơnòl broă dê”. 

Tàm ală nam do, kwang bàng, cau ling tàm ală bồt gơ wèt bồt dờng Trường Sa ờ lời gơlik geh jơnau tìs tàm bồt, sùm bơsong niam ngan ală bơta gơlik geh, ală ơhò, plung bơh lơgar ndai lơh tìs gơnoar tờm kơnhoàl ù tiah nhàr dà lềng bơh lơgar he dê. Jat Trung tá ồng Trần Danh Hoàng, Kwang đơng lam bồ bồt Sinh Tồn yal: Kwang bàng, cau ling lơh broă tàm bồt ờ geh ngai ơm rlô, sùm rcang lài tam lơh là kơnòl broă geh ơn lài ngan rlau jơh. Tơl ală bơta gơlik geh tàm dà lềng ndrờm geh cih dờp, jat sền mờ yal di tŭ nàng geh broă lơh bơsong di tŭ mờ di pal ngan, ờ gŏ lời gơlik geh ală bơta gơlik geh rơmơ̆p ndơl, nisơna ờ. Jat Trung tá ồng Trần Danh Hoàng, đơs:“Bol añ lòt tàm bồt nàng lơh kơnòl broă, do là bơta pơn yờ să ngan mờ geh kơnòl dờng màng ngan bơh cau ling dê đơs is mờ cau kòn ù tiah Việt Nam dê đơs bal. Kwang đơng lam bồ bồt boto bơtê ai oh mi in sền gĭt loh làng do là mhàm ntìng, là phan bơna bơh ồng pàng dê lời wơl. Kơnòl bơh tơl rơnàng kòn sau tŭ do là cơnđòa jơng lòt tàm Trường Sa là pal sùm sùm lơh broă uă rlau 2 dơ̆, 3 dơ̆; sùm pal pơnđơl pràn lơh ngan, lơh ngan sùm nàng ai Dà lơgar, ai làng bol tàm ù gơl in iang nùs rlau tai. Bol añ sùm sùm ià kơ̆ ngkơr phàu, sùm là tiah kơldìng kơ̆ kơl jăp nàng ai làng bol lơh ka in lơh broă tàm dà lềng”.

Tàm bồt dờng Trường Sa, nhơm trồ tiah tam pà gơs 2 kàl, kàl prang mờ kàl mìu. Tài bơh ờ geh dà căt tàm dơlam ù den broă ngui dà mìu tàm bồt dê pal tềm pềr uă ngan. Tàm kàl prang, tơl nă kwang bàng, cau ling mìng geh bơh 3 tus 5 lĭt dà drơng ngui tàm rài kis pah ngai lơm. Bè hơ̆ mơya tàm bồt tơlir niam ngan dùl dà tơlir bơh ală tờm chi mờ ală suơn tam biăp bal mờ tơl ală bơta biăp. Lơh geh dà tơlir hơ̆ là gĭt nđờ dà kơl hề bơh gĭt nđờ rài kwang bàng, cau ling tàm tiah do dê. Thiếu tá ồng Võ Văn Hiệp lơh broă tàm bồt Lŭ Đông A yal: kong mờ ală bơta kal ke, kwang bàng, cau ling Trường Sa bơh rơnàng do tus rơnàng ndai neh tàm bơto yal bal ală broă lơh nàng gơtùi “sơr lèt gan trồ tơngai duh, jai mờ trồ mìu”. Thiếu tá ồng Võ Văn Hiệp, đơs:“Bulah kal ke mơya tơnơ̆ tŭ pơlam tàp bol añ lời tŭ jiơ sơng ka sền gàr phan tam nàng bơtàu tơnguh lơh sa. Dà ngui sa den ngui tềm pềr ngan, tuh muh mat jơh là ai dà hơ̆ tuh biăp in tơn. Geh tŭ geh dơ̆ tàm trồ mang bol añ sòl đèng kŭp tu, koăt ai biăp in. Dà tơlir bơh tờm chi, bơta niam bơnĕ bơh tờm bơkào dê... ai bol añ in lơh roh ƀà bơta bòl glar tơnơ̆ dơ̆ pơlam tàp. Gơlơh bè rềp mờ ù gờl rlau tai”.

Kong gơrềng tơn sùm bơh trồ tơngai, trồ duh, mìu càl rơbŭt nisơna, tàm bồt uă ngan là san hô mờ bràs kò, dà ngui sa jơh ală kơnờm jơh lơm tàm dà mìu. Bulah bè hơ̆ pal sền gŏ tơn mờ mat sền ală suơn tam biăp lơpươn, sơbê, biăp rơpoal, plai nhồng, bơl  hong... gơ tơ̆t plai uă ngan; ală tờm chi, tờm chi geh lơh niam hơ̆ sồng sền gŏ bơta chài ngan, jak ngan bơh ală cau ling tàm bồt dê. Bulah rài kis phan bơna gam suơ̆u siar rlau mờ tàm ù gờl mơya nùs nhơm bồ tơngoh kwang bàng, cau ling tàm bồt dê sùm sền gĭt rcang lài kơnòl broă tam lơh, sền gàr gơnoar tờm tiah dà lềng, bồt bơlào mờ ù tiah kwơ màng king crŭ bơh Dà lơgar dê. Thượng tá ồng Nguyễn Công Chính, Cín trị viên bồt dờng Trường Sa pà gĭt: Geh lơh broă tàm bồt dờng Trường Sa là bơta pơn yờ să ngan, chờ hờp ngan bơh tơl nă kwang bàng, cau ling dê.

Thượng tá ồng Nguyễn Công Chính, đơs:“Bol añ sùm bơsram lơh jat jrô ơnàng  làm uă kơnòl broă geh jàu mờ sùm gĭt wă uă ngan bè bơhiàn niam bơnĕ bơh mpồl ling dê, bơta phi să, tă pơgồp dà kơl hề bơh ală rơnàng bèp bi lòt lài dê. Bol añ sùm pơn yờ să bè bơhiàn hơ̆ mờ sùm tơngkah bal mờ gơ̆p gàr kơ̆ mờ lơh jat niam rlau tai bơhiàn bơh mpồl ling Trường Sa khin cha jak chài dê. Tơl nă kwang bàng, cau ling Trường Sa jơh nùs lơh ngan gàr kơ̆ gơnoar tờm bồt bơlào, Dà lềng, ù tiah dờng màng king crŭ bơh Dà lơgar dê. Sùm sền gĭt “bồt là hìu dà lềng dờng là ƀòn lơgar tờm” jơh nùs lơh ngan gàr kơ̆ tơl thơk vuông ù tàm bồt bơlào, dà lềng dờng màng king crŭ bơh Dà lơgar dê”.

 Tŭ gam kis Củ tịc Hồ Chí Minh neh nting tơngkah “Lài do he mìng geh mang mờ brê, tŭ do he geh ngai, geh trồ, geh dà lềng. Dà lềng he dê jòng niam bơnĕ ngan, he pal gĭt sền gàr gơ”, kwang bàng, cau ling mờ làng bol bồt Trường Sa tam klăc bal dùl nùs, sơr lèt gan tơl ală bơta kal ke bòl glar, sùm rcang ngăc, ià kơ̆ ngkơr phàu, rcang lài tam lơh uă, lơh sir niam ngan kơnòl broă sền gàr gơnoar tờm dờng màng king crŭ bơh Dà lơgar dê.