Là cau ala măt càr Dăk Lăk geh jờng rơ tàm dơ̆ jờng rơ kơnòm bơsram, cau bơsram dờng, ơruh pơnu jơi bơtiàn ờ gal cau jăk ngan, geh pơnrơ dơ̆ 10, nam 2023, oh Đoàn Gia Hân, kòn cau Tày, bơsram ơdŭ 12 cuyên sinh, hìu bơsram kấp 3 Cuyên Nguyễn Du geh cồng nha niam bơnĕ ngan. Oh neh geh uă khà jờng bè: khà Dùl kấp càr mờ khà Bàr kấp dà lơgar Dơ̆ pơrlòng Olimpic dà Mỹ kơnòm bơsram – cau bơsram dờng nam 2022; là “Kơnòm bơsram 3 niam” kấp dà lơgar; cau tàm mpồl kơnờm bơsram jăk dà lơgar môn Siñ họk. Ờ mìng bơsram jăk, Gia Hân gam tus bal uă broă lơh hờ bơdìh ndai, lơh broă mpồl bơtiàn kung bè ală broă lơh Đoàn, Đội dê. Oh là cau tàm Mpồl duh broă sùm Đoàn hìu bơsram, cau tàm Mpồl atbồ Mpồl dà Mỹ kấp càr.

Oh Đoàn Gia Hân yal: oh sùm lơh ngan rơndăp săp sèng tơngai ndrờm bal mờ di pal nàng gơtùi tus bal ală broă lơh. Mờ geh lơh ngan sùm bơsram sră nàng git wă uă. Oh Đoàn Gia Hân đơs: “Oh kờñ pơn jăt tai lơh ngan bơh să tờm dê kung bè là tơmù ờ uă bơta ờ pràn nàng gơtùi geh cồng nha niam ngan nàng wèt rài tơnơ̆ do geh niam rơlao. Tàm tơnơ̆ do den mờ môn tờm là siñ họk den oh kờñ gơs dùl nă cau khoa họk, kơlôi sơnơng bè kông nghệ siñ họk kung bè là kỹ thuật y siñ nàng cèng geh ală bơta chài gơguh jăk, lơh pa tàm broă sơm kòp nàng dong kờl ală cau in”.

Mờ Y Un Diễm, tŭ do gam bơsram nam dơ̆ 3 ơdŭ Lơh pơgru dà Mỹ, hìu bơsram Đại họk Tây Nguyên, jơnau kơ̆p kờñ lòt bơsram neh dong kờl oh sơrlèt mờ ală kal ke, bơta lòng. Tus wơl hìu bơsram nàng pơn jăt tai tơnơ̆ 3 nam gơtìp ơm ing, ùr ơruh kòn cau Triêng neh lơh ngan bơsram mờ tus bal ală broă lơh, mờ gơs “Cau bơsram 5 niam” kấp càr mờ là Cau atbồ tề lam Mpồl lơh geh khà “Mpồl Cau bơsram dờng 5 niam” kấp Dà lơgar. Oh kung dờp uă gơnoar broă bè là Cau atbồ Mpồl Cau bơsram dờng 5 niam kấp hìu bơsram, Cau geh jơng tàm Mpồl dong broă Mpồl cau bơsram dờng Việt Nam càr Dăk Lăk. Lòt bơsram mờ lòt lơh broă bơto mờ dong kờl bơto, Diễm geh tai broă mờng chài, priă geh nàng ngui tàm rài kis. Mờ oh kung kờñ geh dùl rơndăp broă lơh is bơh să tờm dê mờ geh lơh tàm ƀòn tờm tơn tàm tơnơ̆ do. Oh Y Un Diễm yal: “Oh geh dùl rơndăp broă lơh hơ̆ là “cèng dà Mỹ rê tàm ƀòn”. Gơwèt mờ ală bơyô là cau jơi bơtiàn ờ gal cau bè oh dê tàm ƀòn den kal ke mờ kal ke ngan nàng kờñ geh bơsram dà Mỹ. Den tàng tŭ jơh bơsram, oh kơ̆p kờñ là geh rê tàm ƀòn, rê dong kờl wơl ală bơyô hơ̆ in nàng ală bơyô kung geh tus bal bơsram dà Mỹ, geh lòt tus ală tiah pa mờ pơlam nùs nhơm tus ală bơyô in, nàng ală bơyô hơ̆ geh nùs nhơm kơ̆ kơl jăp, geh bơta niam nàng bơsram bè oh dê”.

Càr Dăk Lăk tŭ do geh rơlao 170 rơbô nă kơnòm bơsram, cau bơsram dờng jơi bơtiàn ờ gal cau gam bơsram tàm ală kai bơsram mờ hìu bơsram Cao đẳng, đại họk. Lơh broă bal mờ kơnòm bơsram, cau bơsram dờng, tàm tơngai do càr Dăk Lăk neh geh uă broă lơh nàng dong kờl, pơlam, lam sồr kơnòm bơsram, cau bơsram dờng brồ guh, ai tơl bơta niam mờ bơta pràn nàng ală oh in iang nùs bơsram sră. Oh H’ Phương Hoa Êban, cau bơsram dờng khoa lơh pơgru bơto dà Mỹ, hìu bơsram Đại họk Tây Nguyên pà git: “Tàm broă bơsram sră mờ bơsram tàp, oh sùm dờp geh ală broă dong kờl bơh Đảng mờ Dà lơgar dê, den oh gơlơh să tờm gơtùi tơrgùm rơlao tàm broă bơsram sră kung bè bơsram tàp. Bơdìh hơ̆ tai kung geh bơh nùs nhơm kơ̆p kờñ geh bơsram sră nàng lơh broă jơh pràn ai mpồl bơtiàn đơs bal kung bè mpồl bơtiàn làng bol jơi bơtiàn ờ gal cau oh dê đơs is, oh kung kờñ geh bơsram uă rơlao tai ală broă mờng chài, bơta ngăc ngar nàng lơh broă jơi bơtiàn ờ gal cau oh in”.

Bal mờ ală broă dong kờl bơh Đảng mờ Dà lơgar, mờ gơnoar broă ala măt mờ sền gàr gơnoar kwơ di pal bơh cau bơsram dờng dê, Mpồl Cau bơsram dờng Việt Nam càr Dăk Lăk gam sền kwơ tàm broă lơh Tơnguh uă bơta pràn dà Mỹ mờ jơnau git wă tơrgùm bal dunia ai cau bơsram dờng in; lơh rơndăp broă Lơh broă bal, dong kờl mờ bơtàu tơnguh cau bơsram dờng jơi bơtiàn ờ gal cau in. Lŏ H’ Giang Niê, Ƀí thư Tỉñ đoàn, Củ tịc Mpồl Cau bơsram dờng Việt Nam càr Dăk Lăk pà git: ală cau bơsram dờng jơi bơtiàn ờ gal cau geh pơnrơ jăk là ală cau lam lài lơh geh uă jơnau kơ̆p kờñ lơh broă, brồ guh ai rơnàng kơnòm să in, tàm hơ̆ uă ngan là gơwèt mờ ală bơyô kơnòm să tàm ƀòn. Lŏ H’ Giang Niê đơs: “Bol añ kờñ là ală oh geh ai tơngŏ gơnoar bơh ală oh dê tàm broă lơh bal Đoàn, Mpồl dê; ngui gơnoar tờm là kơnòm bơsram, cau bơsram dờng, ơruh pơnu jơi bơtiàn ờ gal cau tàm broă prăp gàr, ngui bơta niam chài jơi bơtiàn, tus bal tam gơl sồ. Bol añ kơ̆p kờñ mpồl do geh gơguh niam mờ geh bal mờ Tỉñ đoàn, Mpồl cau bơsram dờng lơh niam ală jơnau kờñ”.

Mờ ală broă dong kờl lơh broă bal, dong kờl bal, uă kơnòm bơsram, cau bơsram dờng jơi bơtiàn ờ gal cau tàm càr Dăk Lăk neh khin, pin dờn rơlao tàm ală broă lơh, mpồl lơh broă. Ală oh kung tus bal bơsram sră, bơsram jơnau ngăc ngar nàng rơcang geh ală broă lơh niam ngan ai rơnàng tơnơ̆ do in mờ jơnau kơ̆p kờñ geh lơh broă jơh pràn, jơh bơta ngăc ngar bơh să tờm dê ai mpồl bơtiàn, ƀòn lơgar in.