Bal mờ kơnòl atbồ, bơto bơtê cau hạ sĩ quan đơng lam, trung kấp, cao đẳng, đại họk gah ling klàng tàm ală tiah, bơto bơtơl jơnau git wă sền gàr dà lơgar bơta lơngăp lơngai cau tàm tiah 2 in…, Hìu bơsram ling klàng Quân khu 1 geh jào kơnòl pơgồp bal mờ Họk viện Cíñ trị atbồ ơdŭ Bơto ờ jŏ tơngai ai kwang bàng cíñ trị kấp trung đoàn, sư đoàn in, bơto tơngai sơnrờp, sĩ quan kấp phân đội bơta ngăc ngar đại họk tàm Họk viện Quân y.

Tŭ tus bal dơ̆ bơsram, ală cau bơsram ndrờm tơnguh jơnau git wă, ngui geh cồng nha tàm mùl màl mpồl ling dê, tiah lơh broă dê. Ồng Lý Ngọc Minh, Kwang đơng lam bồ Mpồl đơng lam ling klàng sơnah ƀòn Vĩnh Trại, ƀòn dờng Lạng Sơn gam bơsram ơdŭ gơguh bal bơh cao đẳng tus đại họk Gah ling klàng tàm ală tiah pà git: “Tŭ bơsram geh tơrgùm jơnau git wă pa bơh ală cau pơgru bơto añ gŏ geh gơrềng uă ngan, geh rơcang ai nàng kwang bàng lơh broă khoa họk. Bè bồ tơngoh ngui tàm broă lơh geh cồng nha uă rơlao lài mờ tŭ añ geh lòt bơsram”.

Nàng tơnguh uă cồng nha broă bơto, Mpồl Kwang atbồ Hìu bơsram Ling klàng Quân khu 1 neh lam sồr uă broă pơrlòng “Tam klăc bal, lam lài, nền nòn, bơceh pa, jai pha”, “Tam klăc niam, lơh jăt nền nòn, pơrlòng geh jai pha”… Bơh tŭ hơ̆ ai geh uă, lam sồr kwang àng, cau pơgru, cau bơsram tam klăc bal, bơceh lơh, tam gơl pa, uă broă lơh niam, bơceh lơh bơta chài geh lơh uă. Tàm dơ̆ pơrlòng kwang bàng atbồ bơsram tàp jăk, cau pơgru bơto jăk nam 2023 hìu bơsram geh 57 nă cau pơgru geh khà jăk kấp khoa, 31 nă kwang bàng atbồ geh khà jăk kấp tiểu đoàn, 44 nă cau geh khà jăk kấp hìu bơsram.

Tàm nam do, hìu bơsram neh tus bal sền nàng git 01 tơngu me, 02 jơnau bơceh lơh niam bơta chài, 03 pang sră bơto kấp gah lơh broă, 01 tơngu me, 01 jơnau bơceh lơh kấp quân khu; 04 jơnau bơceh lơh bơta chài kấp hìu bơsram mờ geh Quân khu dan geh jờng rơ  01 jơnau bơceh kấp Ƀộ Quốk phòng, Thiếu tá Phạm Tuấn Việt, cau pơgru bơto tàm Khoa Biñ củng, Hìu bơsram Ling klàng Quân khu 1 mờ tơngu me khoa họk bè phan lơh ring bal ai phào dờng in yal: “Tơngu me do geh tơnguh jơh ală bơta niam. Tŭ ờ hềt geh phan lơh ring bal do, cau ling pal ngui kơ-bià nàng tờ ù hơ̆ sồng lơh ring. Tŭ tìp mờ bă ù ờ kră ha là kung kal ke ngan, tơngai kờñ lơh ring den roh 2 phút. Tŭ ngui tơngu me do tơngai mìng roh bơh 10 tus 15 giây”.

Nàng di pal mờ broă bơto bè broă Đảng, cíñ trị tàm bơta pa, Hìu bơsram Ling klàng Quân khu 1 neh bơ̆t bơtàu geh ală jơnau bơto, sră bơto di pal mờ ală sră nggal geh bơto sồr, lơh jăt broă tàp ling di pal mờ jơnau kờñ tàm bơta pa. Đại tá Dương Xuân Thuỷ, Kwang atbồ Khoa Khoa họk xã hội mờ Ñân văn, Hìu bơsram ling klàng Quân khi 1 pà git: “Hìu bơsram bơto broă Đảng broă cíñ trị pơgồp bal mờ broă bơto jơnau tàm mùl màl, do là ală môn mờ cau bơsram tơnơ̆ do geh pal lơh tơn, rơcang lài bơta ngăc ngar ai cau bơsram in. Môn do bơsram jơh tàm gơnoar broă bơh cau bơsram dê tơnơ̆ do geh ngui lơh broă tơn. Bè tàm gơnoar broă bơh cau bơsram dê, Ƀí thư Ci ƀộ, Ƀí thư đoàn bol añ geh rơcang bơta ngăc ngar, jơnau git wă tàm mùl màl bơh ală cau bơsram pal lơh, bè gùng dà broă bơyai lơh dùl dơ̆ pơrjum Ci ƀộ, bơyai lơh pơrjum đoàn ơruh pơnu, ha là bơta git wă bè mblàng yal den bol añ ndrờm geh bơh broă lơh mùl màl pơgồp bal mờ ală cau bơsram nàng lơh”.

Lơh jăt Nghị quyết sồ 1657 bơh Quân ủy Dà lơgar, Nghị quyết sồ 20 bơh Đảng ủy Quân khu bè tam gơl pa broă bơto mờ bơsram di pal mờ jơnau kờñ kơnòl bơ̆t bơtàu ling klàng tàm bơta pa mờ tơnguh uă bơta niam broă tàp ling, Hìu bơsram Ling klàng Quân khu 1 neh lơh uă gùng dà broă lơh niam nàng lơh gơs niam kơnòl broă geh jào mờ gùng dà broă lơh bơ̆t bơtàu hìu bơsram pràn kơl dang tơl ală bơta “lam lài, geh pơnrơ” pơgồp bal tàm broă bơ̆t bơtàu mờ sền gàr Dà lơgar Việt Nam xã hội củ nghĩa tàm bơta pa. Đại tá Đào Văn Minh, Phó Kwang atbồ hìu bơsram Hìu bơsram Ling klàng Quân khu 1 pà git: “Tàm broă bơto ờ mìng geh bơto bè jơnau git wă mờ gam geh bal broă lơh kòn bơnus. Pah nam bol añ geh tus sền bơta niam cau bơsram tŭ neh jơh bơsram, bơsram cau atbồ tiểu đội bơh 3 tus 5 nhai tŭ neh jơh bơsram den bơta mhar tàm lơh broă niam rơlao ngan mờ ală cau ling ờ hềt geh lòt bơsram. Sĩ quan zự ƀị bơh ală anih lơh broă sră nggal Đảng tơnơ̆ mờ tŭ geh bơsram tàm hìu bơsram rê lơh broă bơh kấp kơnhoàl rơlao hờ đang den geh bơta mhar lơh broă krơi is ngan”.

Tàm nùs nhơm chờ hờp bơh broă pơrlòng chờ gờm 78 nam ngai bơhiàn mpồl ling klàng Quân khu 1, tơnkah 80 nam Ngai crơng gơs Ling klàng làng bol Việt Nam ngui cồng nha neh lơh geh, Đảng ủy, Mpồl Kwang atbồ Hìu bơsram Ling klàng Quân khu 1 pơn jăt tai lơh pràn ală broă pơrlòng nàng tơnguh uă cồng nha broă bơto mờ bơsram, ngui niam bơhiàn kờñ gơboh mờ dà lơgar, bồ tơngoh ngăc ngar, pràn kơl dang is, kơ̆p kờñ geh lơh broă, lơh gơs jăk chài kơnòl broă geh jào.