Tơnơ̆ mờ 3 nam lơh jăt broă lơh lơh broă bal mblàng yal jơnau, Anih jơnau đơs Việt Nam neh bơyai lơh rơlao 3 rơbô jơnau yal tơngit, jơnau cih, jơnau lùp, pờ tơlik jơnau đơs tơn bè ală gah lơh sa, bơta niam chài, mpồl bơtiàn, bơta lơngăp lơngai-sền gàr dà lơgar tàm càr Dăk Lăk. Mờ neh lơh geh bal mờ pờ tơlik jơnau đơs 1 rơbô 816 jơnau đơs jăt tơngu me dà kòn cau dê, tàm hơ̆ geh: 908 jơnau đơs mờ dà kòn cau Rơđê mờ 908 jơnau đơs mờ đơs dà kòn cau Mnông, do là bàr dà kòn cau kis tàm càr Dăk Lăk dê. Tàm 6 nhai bồ nam 2023, Anih jơnau đơs Việt Nam neh geh 480 jơnau yal tơngit, jơnau cih ală bơta yal ală broă lơh sa, cíñ trị, lơngăp lơngai dà lơgar càr dê.

Tàm tơngai bơta lơngăp lơngai cíñ trị ờ uă kơnhoàl tàm càr Dăk Lăk gơlik geh bơta ờ niam, Anih jơnau đơs Việt Nam neh ai uă ngan tŭ jơ pờ tơlik jơnau yal tơngit, jơnau cih di pal nàng tam dră mờ ală jơnau đơs ờ ngan, ờ di pal, lơh bơchồt, hòi jà bơh ală cau pơlơ̆ dră; yal bè broă lơh niam bơh làng bol dê tềng đăp mờ ală bơta gơlik geh bal mờ bơta tơmàl bơh ală cau neh lơh tìs.

Đơs tàm pơrjum, Kwang geh jơng tàm Đảng Dà lơgar, Kwang atbồ dờng Anih jơnau đơs Việt Nam ồng Đỗ Tiến Sỹ đơs niam, tơnơ̆ mờ 3 nam lơh jăt broă lơh lơh broă bal, broă pơgồp bal yal mblàng gùng dà, broă lơh bơh Đảng, adăt boh lam bơh Dà lơgar dê tus mờ mpồl bơtiàn ƀòn lơgar kis tàm càr Dăk Lăk geh lơh di pal mờ niam bơnĕ rơlao. Càr Dăk Lăk neh mờ gam ai tơl bơta ƀuơn nàng cau lơh ƀăo Anih jơnau đơs Việt Nam tus lơh broă tàm càr. Mờ càr neh di tŭ ai tơl ală jơnau yal tơngit mờ sră ƀăo sền gròi, tàm hơ̆ geh ală bơta tàm rài kis, bơta niam chài, cíñ trị, lơh sa, mpồl bơtiàn, bơta lơngăp lơngai-sền gàr dà lơgar nàng cau iăt rơjô in geh nùs nhơm kơlôi sơnơng di pal, tơl ală bơta mờ di pal ngan.

Kwang atbồ dờng Anih jơnau đơs Việt Nam ồng Đỗ Tiến Sỹ đơs nền, Anih jơnau đơs Việt Nam neh mờ geh sùm lơh broă bal mờ càr Dăk Lăk tàm broă lơh pràn rơlao tai broă yal tơngit, yal mblàng. Tàm hơ̆ pal sền kwơ broă lơh jăt ală gùng dà broă lơh geh bơta krơi is ai tiah Tây Nguyên mờ càr Dăk Lăk dê: “Tàm tơngai tus den bol añ kung gam ai geh bal mờ ală kwang bàng lơh di jăt ală Nghị quyết bơh Đảng Dà lơgar, jơnau đơng lam bơh Cíñ phủ, jơnau đơng lam bơh Mpồl đơng lam 35 bè broă rơcang sơndră mờ bơta gơlik geh ờ niam tus mờ bơta ring lơngai, hơ̆ sồng broă kòn cau, 3 broă lơh jăt jơnau kờñ dà lơgar dê. Tàm hơ̆ kwơ màng ngan là jơnau đơs pơn dŭt sồ 67 bơh Ƀộ Cíñ trị, Nghị quyết sồ 103 bơh Cíñ phủ mờ Nghị quyết sồ 72 bơh Quốk hội bè broă tơrlòng dùl kơrnoăt broă lơh krơi is ai ƀòn dờng Buôn Ma Thuột in, tus do bol añ geh pơgồp bal mờ ală kwang bàng lơh jăt kơnòl broă yal mblàng di pal mờ ală jơnau yal tơngit niam ngan”.

Sền wơl 3 nam lơh jăt broă lơh lơh broă bal, Kwang geh jơng tàm Đảng Dà lơgar, Ƀí thư Tỉñ ủy càr Dăk Lăk ồng Nguyễn Đình Trung pà git, ală jơnau cih sră ƀăo bơh Anih jơnau đơs Việt Nam yal mblàng bè ală broă lơh bơh càr Dăk Lăk dê neh lời wơl bơta tơngŏ niam bơnĕ ngan mờ geh mpồl bơtiàn đơs niam. Kwơ màng, broă Anih jơnau đơs Việt Nam geh uă Jơnau đơs mờ dà kòn cau tàm càr Dăk Lăk mờ Tây Nguyên là bơta kwơ màng nàng tơnguh cồng nha jơnau yal tơngit mblàng jơnau gơwèt mờ làng bol kis tàm ală ƀòn. Broă pơgồp bal nền nòn neh dong kờl lơh jăt niam yal tơngit, mblàng jơnau tơl ală bơta tàm ală gah broă lơh sa, bơta niam chài, mpồl bơtiàn, bơta lơngăp lơngai-sền gàr dà lơgar tàm càr Dăk Lăk dê.

Bơh tŭ hơ̆, pơgồp bal kwơ màng tàm broă tơnguh bơngă càr, lơh geh uă nùs nhơm pin dờn bơh làng bol dê tàm broă đơng lam bơh kấp ủy, gơnoar atbồ càr, lơh pràn broă bơtàu tơnguh lơh sa, bơta niam chài, mpồl bơtiàn bơh càr dê. Là càr geh tus 49 jơi bơtiàn kòn cau oh mi ơm kis bal, broă kờñ jơnau yal tơngit, mblàng jơnau tàm càr Dăk Lăk là uă ngan. Den tàng, Ƀí thư Tỉñ ủy càr Dăk Lăk kung hòi jà tàm tơngai tus, Anih jơnau đơs Việt Nam pơn jăt tai lơh geh uă rơlao tai ală tơngu me lơh broă bal yal tơngit, mblàng jơnau. Tàm hơ̆, kờñ ngan geh jơnau yal tơngit bè broă bơyai lơh jăt ală gùng dà broă lơh bơh Đảng mờ Dà lơgar tàm càr dê: “Tàm broă bơyai lơh jăt ală broă dong kờl bơh Dà lơgar tàm càr dê den loh làng geh ală bơta kal ke, geh ală kơrnoăt, broă dong kờl tŭ ngui tàm tiah Tây Nguyên den geh ală bơta gơkòl. Bơta do geh tơngŏ loh làng ngan bơh ală broă lơh jăt jơnau kờñ dà lơgar dê hơ̆ sồng geh ală bơta ndai tai. Càr kung kơ̆p kờñ là VOV, tàm hơ̆ uă ngan là VOV Tây Nguyên pal geh ală jơnau đơs, pal geh ală jơnau cih yal pràn kơl dang rơlao tai bè ală bơta gơkòl, ha là ală bơta kal ke tàm broă bơyai lơh jăt ală broă dong kờl nàng bơtàu tơnguh tiah Tây Nguyên in”.

Di tàm dơ̆ tơn jơh ing 3 nam lơh jăt broă lơh lơh broă bal mờ càr Dăk Lăk, Kwang atbồ dờng Anih jơnau đơs Việt Nam neh jào pà Gai lòng lời kir tài broă pờ tơlik jơnau đơs ai ală kwang bàng in, tàm hơ̆ geh ală ồng Nguyễn Đình Trung, Kwang geh jơng tàm Đảng Dà lơgar, Ƀí thư Tỉñ ủy; ồng Phạm Minh Tấn, Phó Ƀí thư Duh broă sùm Tỉñ ủy; ồng Phạm Ngọc Nghị, Củ tịc UɃÑZ càr bal mờ ồng Nguyễn Tuấn Hà, Phó Củ tịc Duh broă sùm UɃÑZ  càr Dăk Lăk.

Kung di tàm dơ̆ do, Anih jơnau đơs Việt Nam neh jào pà càr Dăk Lăk in 3 nơm hìu tam klăc dờng kờp jơh priă lơh 300 tơlăk đong.