Tềng đăp mờ bơta tơngŏ gơguh ală dơ̆ rềs àr tàm gùng lòt lơh chơ̆t uă cau, mpồl lơh broă geh gơnoar neh tơnguh broă bơto sồr mờ yal lài gơwèt mờ ală cau măi rơndeh tŭ lòt gan ù tiah càr do.

Geh uă bơta tơngŏ ndrờm bal tàm bàr dơ̆ gơtìp rềs àr gùng lòt gơtìp tàm mang ngai 12 mờ mang ngai 14 nhai 02 lài do tàm gùng Hồ Chí Minh, gơl lòt gan kơnhoàl Đăk Glei mờ gùng 40B, gơl lòt gan kơnhoàl Đăk Tô, càr Kon Tum, hơ̆ là: Jơh bàr dơ̆ rềs àr rơndeh pơn diang phan ndrờm gơtìp gơlơ̆p lơh gơtìp 3 nă cau chơ̆t, 4 nă cau sồt să; Jơh bàr nă cau măi rơndeh pơn diang phan gơtìp rềs àr ndrờm là cau hờ bơdìh càr, dùl nă cau bơh càr Thanh Hoá mờ dùl nă cau bơh càr Long An.

Bal mờ bơta ờ mờng gùng lòt, jăt Thượng tá Nguyễn Xuân Hướng, Phó kwang atbồ Phòng Kảñ sát sền gàr gùng lòt, Kwang àng càr Kon Tum yal, cau geh uă nam sền gròi, bơsong ală dơ̆ rềs àr tàm gùng lòt gơtìp chơ̆t uă cau tàm càr Kon Tum den mpồl gơtìp tìs bơh să tờm cau măi rơndeh là bơta tìs tờm ngan lơh gơtìp tus ală dơ̆ rềs àr tàm gùng lòt: “Bol añ gŏ là geh uă ngan là mpồl tìs bơh să tờm cau măi rơndeh lơh gơtìp. Lài ngan là ờ lơh tờm tàm broă lòt jờl. Dơ̆ bàr là jal ir. Geh ală gơl gùng tŭ măi rơndeh lòt pơn jăt bal tàm dùl gơl gùng jòng den geh ờ uă cau măi rơndeh tài jal ir, ờ bài lòt jăt bal di jăt mờ gùng treh tàm gùng lòt neh sơrlèt rơndeh tềng đăp den ni sơna tìp mờ gùng koèl, ală gơl gùng ờ ơnàng lòt bơh đăp den geh ală rơndeh lòt sơlơ̆u wơl lơh gơtìp rềs àr”.

Kung jăt Thượng tá Nguyễn Xuân Hướng yal, tàm ală gơl gùng lòt gan càr Kon Tum geh uă gơl gùng koèl kơh ngòt rơngơ̆t ngan mờ ală cau măi rơndeh pal kah sền gròi, hơ̆ là: gùng koèl kơh Lò Xo, tàm gơl gùng Hồ Chí Minh; koèl kơh Văng Rơi, tàm gùng 40B; koèl kơh Măng Đen, koèl kơh Vi ô lắc tàm gùng 24; koèl kơh Ngọc Vin tàm gùng 14C...

Thượng tá Nguyễn Xuân Hướng pà git tai, tềng đăp mờ bơta tơngŏ gơguh bơh ală dơ̆ rềs àr tàm gùng lòt lơh uă cau gơtìp chơ̆t tàm ală gơl gùng lòt gan càr Kon Tum ală ngai pa do, mpồl kảñ sát sền gàr gùng lòt neh tơnguh broă bơto sồr mờ yal lài mờ ală cau măi rơndeh: “Ală cau măi rơndeh pơn diang phan, rơndeh pơn diang năc tàm hơ̆ kwơ màng ngan là ală cau măi rơndeh pơn diang phan ñjơ̆, lài mờ tŭ guh ha là mù gùng koèl kơh pal ơm rơlô ing, sền wơl thang rơndeh, phan măi rơndeh, lơh mrềt kong rơndeh. Tŭ mù tàm gùng koèl kơh pal sền ngăc ală jơnau cih yal, yal lài bè gùng lòt. Cau măi rơndeh pal mù sồ dềt nàng tơmù bơta pràn măi pleh mờ lơh gơtìp uă ir tus mờ thang rơndeh, bè di gơlan gơtìp ồs sa thang tài duh ir, ờ gơtùi kŭp thang den ngòt rơngơ̆t ngan”.

Ồng Khuất Việt Hùng, Phó Củ tịc drơng broă sùm Ủy ƀan Lơngăp lơngai tàm gùng lòt Dà lơgar pà git, tàm càr Kon Tum đơs is mờ tiah Tây Nguyên đơs bal, bơta tìs mờ kơrnoăt geh ai tàm adăt boh lam bè lơngăp lơngai gùng lòt, bè rơndeh pơn diang ñjơ̆ ir phan, làng bol đì rơndeh Hondan ờ ndao sơgơn gàr bồ, neh ñô ơlăk, bièr kung gam măi rơndeh lòt tàm gùng... gam gơlik geh. Tàm ală gơl gùng lòt tàm tiah do sùm di gơlan gơtìp ală dơ̆ rềs àr tàm gùng lòt lơh chơ̆t jê uă ngan cau. Den tàng, Ủy ƀan Lơngăp lơngai gùng lòt Dà lơgar bal mờ gơnoar atbồ, gah lơh broă geh gơnoar ală càr pal pơn jăt tai lơh pràn broă mblàng yal nàng tam gơl jơnau git wă bal mờ broă lơh bơh ală cau lòt tàm gùng in: “Broă he bơyai lơh yal mblàng ală jơnau bè lơngăp lơngai tàm gùng bè bè: neh ñô ơlăk, bièr ờ măi rơndeh, ờ pơn diang ñjơ̆ ir phan, gal ir cau, bañ lòt wĕt rơwe tàm gùng, bañ lòt jờl ir, sơrlèt ờ di, ndao sơgơn gàr bồ di mờ jơnau kờñ geh ai tŭ măi rơndeh Honda. Ală jơnau yal geh ƀuơn lơh mờ ƀuơn kah. Bơh broă mblàng yal den ală ơruh pơnu, kơnòm pa tào, gal làng bol git kơrnoăt geh ai bơh adăt boh lam dê, git ală jơnau yal bè lơngăp lơngai tàm gùng lòt. Bơh tŭ hơ̆, rơhời geh dong kờl làng bol tơnguh jơnau git wă adăt boh lam bè lơngăp lơngai gùng lòt mờ dong kờl bơta lơngăp lơngai gùng lòt tàm tiah do ngai sơlơ geh gơguh niam”.